ഡി.ആർ. കോംഗോയിൽ എബോള അതിവേഗം പടരുന്നു; പ്രഭവകേന്ദ്രത്തിന് പുറത്തും രോഗബാധ ഉയരുന്നു

കിൻഷാസ: ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (ഡി.ആർ. കോംഗോ) എബോള വൈറസ് വ്യാപനം പ്രഭവകേന്ദ്രമായ ഇറ്റൂരി പ്രവിശ്യയ്ക്ക് പുറത്തേക്കും അതിവേഗം വ്യാപിക്കുന്നതായി ആഫ്രിക്ക സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ (Africa CDC) അറിയിച്ചു. ഇറ്റൂരിയിൽ കഴിഞ്ഞ ഏതാനും ആഴ്ചകളായി പുതിയ രോഗബാധയും മരണങ്ങളും കുറഞ്ഞെങ്കിലും അയൽപ്രവിശ്യകളായ നോർത്ത് കിവു, ഹൗട്ട്-ഉലെ എന്നിവിടങ്ങളിൽ കേസുകൾ ഗണ്യമായി വർധിച്ചതായാണ് റിപ്പോർട്ട്.

വ്യാഴാഴ്ച പുറത്തുവിട്ട കണക്കുകൾ പ്രകാരം 3,310 മരണങ്ങൾ ഉൾപ്പെടെ 6,843 എബോള കേസുകളാണ് ഇതുവരെ റിപ്പോർട്ട് ചെയ്തിരിക്കുന്നത്. 5,400ലധികം കേസുകൾ റിപ്പോർട്ട് ചെയ്ത ഇറ്റൂരി തന്നെയാണ് നിലവിൽ ഏറ്റവും കൂടുതൽ രോഗബാധയുള്ള പ്രദേശം.

2014-16ലെ വ്യാപനത്തേക്കാൾ ഗുരുതരമാകുമോ?
നിലവിലെ എബോള വ്യാപനം 2014-2016 കാലത്തെ പശ്ചിമ ആഫ്രിക്കൻ വ്യാപനത്തിന്റെ തീവ്രത മറികടക്കാൻ സാധ്യതയുണ്ടെന്ന് ലോകാരോഗ്യ സംഘടന മുന്നറിയിപ്പ് നൽകിയിട്ടുണ്ട്. അന്ന് ഏകദേശം 28,000 കേസുകൾ സ്ഥിരീകരിക്കുകയും 11,000 പേർ മരിക്കുകയും ചെയ്തിരുന്നു.

നിലവിലെ വ്യാപനത്തിൽ രണ്ട് മാസത്തിനുള്ളിൽ തന്നെ മരണസംഖ്യ 1,000 കടന്നതായി അധികൃതർ ചൂണ്ടിക്കാട്ടുന്നു. 2,500 കേസുകൾ റിപ്പോർട്ട് ചെയ്യപ്പെട്ട വേഗത 2014-2016 കാലയളവിനെ അപേക്ഷിച്ച് ഏകദേശം മൂന്നിരട്ടിയാണെന്നും റിപ്പോർട്ടുകൾ വ്യക്തമാക്കുന്നു.

നിലവിലെ വ്യാപനത്തിന്റെ ഏറ്റവും ഗുരുതരമായ ഘട്ടം ഇനിയും എത്തിയിട്ടില്ലെന്ന ആശങ്കയും അധികൃതർക്കുണ്ട്. നിരീക്ഷണ സംവിധാനത്തിൽ ഉൾപ്പെട്ട കേസുകൾക്ക് പുറത്തുനിന്നാണ് പുതിയ രോഗബാധകളിൽ വലിയൊരു പങ്കും റിപ്പോർട്ട് ചെയ്യപ്പെടുന്നതെന്നത് ആശങ്ക വർധിപ്പിക്കുന്നു.

വാക്സിനേഷൻ ശക്തമാക്കുന്നു
കോംഗോയിലെ ആരോഗ്യപ്രവർത്തകർക്കും മറ്റ് മുൻനിര പ്രവർത്തകർക്കുമായി കഴിഞ്ഞ മാസം മുതൽ എർവെബോ (Ervebo) വാക്സിൻ ഉപയോഗിച്ചുള്ള പ്രതിരോധ കുത്തിവയ്പ്പ് ആരംഭിച്ചിട്ടുണ്ട്. സാധാരണയായി സെയർ വേരിയന്റ് എന്നറിയപ്പെടുന്ന എബോള വൈറസിനെതിരെ ഫലപ്രദമായ വാക്സിനാണിത്.

അതേസമയം, നിലവിലെ വ്യാപനത്തിന് കാരണമായ ബൂൻഡിബുഗ്യോ വൈറസിനെതിരെ അംഗീകൃത വാക്സിൻ കണ്ടെത്തുന്നതിനുള്ള ക്ലിനിക്കൽ പരീക്ഷണങ്ങളും പുരോഗമിക്കുകയാണ്. കിഴക്കൻ പ്രവിശ്യകളായ ഷോപോ, ഹൗട്ട്-ഉലെ, ബാസ്-ഉലെ എന്നിവിടങ്ങളിലാണ് വാക്സിൻ പരീക്ഷണങ്ങൾ ആരംഭിച്ചതെന്ന് Africa CDC റിസർച്ച്, ക്ലിനിക്കൽ ട്രയൽസ് ആൻഡ് ഇന്നൊവേഷൻ ഡയറക്ടർ പ്ലാസിഡ് മബാല കിംഗെബെനി അറിയിച്ചു.

എബോള എങ്ങനെ പകരും?
എബോള വൈറസ് പ്രധാനമായും രോഗബാധിതരുടെയോ രോഗം ബാധിച്ച് മരിച്ചവരുടെയോ രക്തം, വിസർജ്യം, മറ്റ് ശരീരസ്രവങ്ങൾ എന്നിവയുമായുള്ള നേരിട്ടുള്ള സമ്പർക്കത്തിലൂടെയാണ് മനുഷ്യരിലേക്ക് പകരുന്നത്. കുരങ്ങുകൾ, വവ്വാലുകൾ, മാൻ, മുള്ളൻപന്നി, പന്നി തുടങ്ങിയ മൃഗങ്ങളിലും വൈറസ് കാണപ്പെടാം. രോഗബാധിത മൃഗങ്ങളുമായി നേരിട്ടുള്ള സമ്പർക്കത്തിലൂടെയും ശരിയായി പാകം ചെയ്യാത്ത മാംസം കഴിക്കുന്നതിലൂടെയും രോഗബാധയുണ്ടാകാം.

വായുവിലൂടെയോ വെള്ളത്തിലൂടെയോ സാധാരണ ഭക്ഷണത്തിലൂടെയോ എബോള പകരുന്നതായി കണക്കാക്കുന്നില്ല. അതിനാൽ രോഗബാധിതരുമായി സമ്പർക്കം ഒഴിവാക്കുകയും ആവശ്യമായ സുരക്ഷാ മുൻകരുതലുകൾ സ്വീകരിക്കുകയും ചെയ്യുന്നത് രോഗവ്യാപനം തടയുന്നതിൽ നിർണായകമാണ്.

പ്രധാന ലക്ഷണങ്ങൾ
വൈറസ് ശരീരത്തിൽ പ്രവേശിച്ച് സാധാരണയായി 2 മുതൽ 21 ദിവസത്തിനുള്ളിൽ ലക്ഷണങ്ങൾ പ്രകടമാകാം. തുടക്കത്തിൽ പനി, തലവേദന, പേശിവേദന, തൊണ്ടവേദന തുടങ്ങിയ ലക്ഷണങ്ങളാണ് സാധാരണയായി കാണുന്നത്. തുടർന്ന് ഛർദ്ദി, വയറിളക്കം, ചർമ്മത്തിൽ തിണർപ്പ് തുടങ്ങിയവയും ഉണ്ടാകാം.

ചില രോഗികളിൽ രോഗം ഗുരുതരമായി രക്തസ്രാവത്തിലേക്ക് നീങ്ങാം. സാധാരണയായി രോഗം ആരംഭിച്ച് അഞ്ച് മുതൽ ഏഴ് ദിവസത്തിനുള്ളിൽ ഗുരുതര രക്തസ്രാവം ഉൾപ്പെടെയുള്ള സങ്കീർണതകൾ പ്രകടമാകാം. തുടർന്ന് കരൾ, വൃക്ക തുടങ്ങിയ അവയവങ്ങളുടെ പ്രവർത്തനം തകരാറിലാകുന്നത് മരണത്തിലേക്ക് നയിച്ചേക്കാം.

പ്രതിരോധമാണ് പ്രധാനം
എബോള വ്യാപനം തടയുന്നതിൽ രോഗബാധിതരെ നേരത്തെ കണ്ടെത്തി ഐസൊലേറ്റ് ചെയ്യുന്നതും സമ്പർക്കപ്പട്ടിക തയ്യാറാക്കുന്നതും നിർണായകമാണ്. രോഗബാധിതരുടെയോ മരിച്ചവരുടെയോ രക്തം, വിസർജ്യം, മറ്റ് ശരീരസ്രവങ്ങൾ എന്നിവ കൈകാര്യം ചെയ്യുമ്പോൾ കർശനമായ സുരക്ഷാ മുൻകരുതലുകൾ സ്വീകരിക്കണം.

രോഗബാധ സംശയിക്കുന്നവർ എത്രയും വേഗം ആരോഗ്യസംവിധാനവുമായി ബന്ധപ്പെടുകയും ആവശ്യമായ പരിശോധനയും ചികിത്സയും തേടുകയും വേണം. രോഗബാധിതരുമായി അടുത്ത സമ്പർക്കം ഒഴിവാക്കുന്നതും ഭക്ഷണത്തിനായി ഉപയോഗിക്കുന്ന മാംസം നന്നായി പാകം ചെയ്യുന്നതും രോഗസാധ്യത കുറയ്ക്കാൻ സഹായിക്കും.