ആലപ്പുഴ: ആലപ്പുഴയിൽ നിന്ന് ബെംഗളൂരുവിലേക്കുള്ള കെ.എസ്.ആർ.ടി.സി-സ്വിഫ്റ്റ് സർവീസ് പുനരാരംഭിക്കുന്നു. കെ.സി. വേണുഗോപാൽ എം.പിയുടെ ആവശ്യപ്രകാരം ഗതാഗത മന്ത്രി സി.പി. ജോൺ ആണ് സർവീസിന് അനുമതി നൽകിയത്. ആഗസ്റ്റ് 16 ഞായറാഴ്ച കെ.സി. വേണുഗോപാൽ എം.പി ബസ് സർവീസ് ഫ്ലാഗ് ഓഫ് ചെയ്യും.
മുമ്പ് ഈ റൂട്ടിൽ സർവീസ് ഉണ്ടായിരുന്നുവെങ്കിലും പിന്നീട് നിർത്തിവെക്കുകയായിരുന്നു. ആലപ്പുഴയിൽ നിന്നും വൈകുന്നേരം 6.00-ന് പുറപ്പെടുന്ന കെ.എസ്.ആർ.ടി.സി-സ്വിഫ്റ്റ് എക്സിക്യൂട്ടീവ് ക്ലാസ് എസി ബസ് മണ്ണുത്തി ബൈപാസ്, പാലക്കാട് ചന്ദ്രനഗർ, കോയമ്പത്തൂർ എൽ & ടി ബൈപാസ്, സേലം വഴി അടുത്ത ദിവസം രാവിലെ 6.25-ന് ബെംഗളൂരുവിൽ എത്തും.
തിരികെ രാത്രി 8.00-ന് ബെംഗളൂരുവിൽ നിന്ന് പുറപ്പെട്ട് അടുത്ത ദിവസം രാവിലെ 8.00-ന് ആലപ്പുഴയിൽ എത്തിച്ചേരുന്ന രീതിയിലാണ് സമയം ക്രമീകരിച്ചിരിക്കുന്നത്. ആദ്യഘട്ടത്തിൽ ഒറ്റയും ഇരട്ടയുമായി ഒരു ദിവസം ഇടവിട്ടായിരിക്കും ഈ സർവീസ് പ്രവർത്തിക്കുക.
