"കേൾക്കാൻ ഒരാളുണ്ടെങ്കിൽ തിരികെ കൊണ്ടുവരാം ഓരോ ജീവിതവും"; ഇന്ന് ലോക ആത്മഹത്യ പ്രതിരോധ ദിനം

സെപ്റ്റംബർ 10 ലോക ആത്മഹത്യാ പ്രതിരോധ ദിനമായി ആചരിക്കപ്പെടുമ്പോൾ, മാനസികാരോഗ്യ ബോധവൽക്കരണത്തിന്റെ അത്യന്താപേക്ഷിതമായ ആവശ്യകതയിലേക്കാണ് ഈ വിഷയം വിരൽ ചൂണ്ടുന്നത്. 'ആത്മഹത്യയെക്കുറിച്ചുള്ള ആഖ്യാനം മാറ്റുക' എന്നതാണ് ലോക ആത്മഹത്യാ പ്രതിരോധ ദിന സന്ദേശം. മാനസിക രോഗങ്ങളെയും ആത്മഹത്യാ പ്രവണതകളെയും അപമാനത്തോടെയോ കുറ്റപ്പെടുത്തലോടെയോ കാണുന്ന സാമൂഹിക മനോഭാവം മാറ്റാനും തുറന്ന സംഭാഷണങ്ങൾ ആരംഭിക്കാനും ഇത് ആഹ്വാനം ചെയ്യുന്നു.

ആഗോളതലത്തിൽ പ്രതിവർഷം ഏഴു ലക്ഷത്തിലധികം ആളുകളാണ് ആത്മഹത്യയിലൂടെ ജീവൻ വെടിയുന്നത്. സാമ്പത്തിക പ്രതിസന്ധികളും വ്യക്തിപരമായ മാനസിക സംഘർഷങ്ങളും കുടുംബപ്രശ്നങ്ങളും സൃഷ്ടിക്കുന്ന ആഘാതങ്ങൾ വ്യക്തികളെ മാത്രമല്ല, കുടുംബങ്ങളെയും സമൂഹത്തെയും മൊത്തത്തിൽ ബാധിക്കുന്നു. 2021-ല്‍ 1.64 ലക്ഷം ആത്മഹത്യാ കേസുകളാണ് നമ്മുടെ രാജ്യത്ത് രജിസ്റ്റര്‍ ചെയ്തത്. ദേശീയ ക്രൈം റെക്കോര്‍ഡ്‌സ് ബ്യൂറോയുടെ കണക്കുകള്‍ പ്രകാരം ഒരു ലക്ഷം ആളുകള്‍ക്ക് 12 പേര്‍ എന്ന തോതിലാണ് നമ്മുടെ ആത്മഹത്യാ നിരക്ക്. പുരോഗമനപരമായ ആരോഗ്യ സംരംഭങ്ങള്‍ക്ക് പേരുകേട്ട നമ്മുടെ കേരളവും വര്‍ധിച്ചുവരുന്ന ആത്മഹത്യാനിരക്ക് അഭിമുഖീകരിക്കുന്നു. പ്രതിവര്‍ഷം 8,000 ആത്മഹത്യകളാണ് സംസ്ഥാനത്ത് റിപ്പോര്‍ട്ട് ചെയ്യപ്പെടുന്നത്. രാജ്യത്തെ ഏറ്റവും ഉയര്‍ന്ന ആത്മഹത്യാനിരക്കുള്ളവയിലൊന്നാണ് കേരളമെന്നതാണ് ഞെട്ടിപ്പിക്കുന്ന കാര്യം.

സാമ്പത്തിക പിരിമുറുക്കം, കുടുംബപ്രശ്നങ്ങള്‍, മാനസികാരോഗ്യാവസ്ഥകള്‍ എന്നിവയുള്‍പ്പെടെയുള്ള സങ്കീര്‍ണ്ണമായ സാമൂഹിക-സാമ്പത്തിക ഘടകങ്ങളാല്‍ നയിക്കപ്പെടുന്ന, ആത്മഹത്യകളുടെ പേരില്‍ ധാരണകളെക്കാള്‍ കൂടുതല്‍ പ്രചരിപ്പിക്കപ്പെടുന്നത് തെറ്റിദ്ധാരണകളാണ്. ആത്മഹത്യ തടയുന്നതിനുള്ള ഏറ്റവും വലിയ തടസ്സങ്ങളിലൊന്ന് മാനസികാരോഗ്യവുമായി ബന്ധപ്പെട്ട സമീപനമാണ്. ആത്മഹത്യയെയും മാനസികാരോഗ്യ വെല്ലുവിളികളെയും കുറ്റപ്പെടുത്തലോടുകൂടിയും ലജ്ജയോടെയും കാണുന്ന സാമൂഹിക മനോഭാവമാണ് സഹായം തേടുന്നതിൽ നിന്നും ആളുകളെ പിന്നോട്ടടിക്കുന്നത്. മാനസിക പ്രയാസങ്ങൾ അനുഭവിക്കുന്നവരെ നിശബ്ദരാക്കുന്നതിനു പകരം, അനുഭാവത്തോടെ കേൾക്കാനും മാനസികാരോഗ്യ ബോധവൽക്കരണം ഉറപ്പാക്കാനുമുള്ള അന്തരീക്ഷം നാം ഒരുക്കേണ്ടതുണ്ട്.

തെറ്റിദ്ധാരണകള്‍

• ആത്മഹത്യയെക്കുറിച്ച് സംസാരിക്കുന്നത് അത് പ്രോത്സാഹിപ്പിക്കും: ഇത് തെറ്റാണ്, ആത്മഹത്യയെക്കുറിച്ച് തുറന്ന സംഭാഷണങ്ങള്‍ ആത്മഹത്യാ സാധ്യത കുറയ്ക്കാന്‍ സഹായിക്കും. ആത്മഹത്യയെക്കുറിച്ച് സംസാരിക്കുന്നത് ഒരാളുടെ മനസ്സില്‍ ആശയം വളര്‍ത്തിയെടുക്കുമെന്ന് ചിലര്‍ വിശ്വസിക്കുന്നു, എന്നാല്‍ തുറന്ന സംഭാഷണത്തിന് യഥാര്‍ത്ഥത്തില്‍ ആശ്വാസം നല്‍കാനും ആത്മഹത്യ തടയാനും കഴിയുമെന്ന് ഗവേഷണങ്ങള്‍ കാണിക്കുന്നു.
• ആത്മഹത്യയെക്കുറിച്ച് സംസാരിക്കുന്നത് ശ്രദ്ധ തേടാന്‍ വേണ്ടിയാണ്: ഇത് തെറ്റാണ്.ആത്മഹത്യയെക്കുറിച്ച് സംസാരിക്കുന്നത് ആഴത്തിലുള്ള മാനസിക വേദനയുടെ അടയാളമാണ്. 
•  മാനസികാരോഗ്യ പ്രശ്‌നങ്ങളുള്ളവര്‍ക്കേ ആത്മഹത്യാ ചിന്തകള്‍ ഉണ്ടാകൂ: ഇത് തെറ്റാണ്, ജീവിതത്തിലെ വിവിധ സാഹചര്യങ്ങള്‍, ട്രോമ, നഷ്ടം, അത്യന്തം സമ്മര്‍ദ്ദം എന്നിവ നേരിട്ടവര്‍ക്കും നേരിടുന്നവര്‍ക്കും ആത്മഹത്യാ ചിന്തകള്‍ക്ക് കാരണമാകാം.

ആത്മഹത്യാ പ്രതിരോധത്തിന് എന്ത് ചെയ്യാം?

• വിദ്യാഭ്യാസം: ആത്മഹത്യയും മാനസികാരോഗ്യവും സംബന്ധിച്ചുള്ള സത്യങ്ങള്‍ അറിയുക. ഈ വിവരങ്ങള്‍ സുഹൃത്തുക്കളുമായി, കുടുംബവുമായി, സഹപ്രവര്‍ത്തകരുമായി പങ്കിടുക.
• ആത്മഹത്യയെക്കുറിച്ച് സംസാരം ആരംഭിക്കുക: മാനസികാരോഗ്യവും ആത്മഹത്യയും സംബന്ധിച്ചുള്ള സംഭാഷണങ്ങള്‍ ആരംഭിക്കാന്‍ മടിക്കരുത്. ആരെങ്കിലും ബുദ്ധിമുട്ടുന്നുവെന്ന് ശ്രദ്ധിച്ചാല്‍, അവരെ സഹാനുഭൂതിയോടെ സമീപിക്കുക.
•  മാനസികാരോഗ്യ പ്രശ്‌നങ്ങളെ കണ്ടെത്തി, അര്‍ഹമായ ചികിത്സ ലഭ്യമാക്കുക എന്നത് സമൂഹത്തിന്റെ കൂടി ഉത്തരവാദിത്തമാണ്. തലച്ചോറിലെ രാസഘടകങ്ങളില്‍, അവയുടെ പ്രവര്‍ത്തനങ്ങളില്‍ വരുന്ന വ്യതിയാനങ്ങള്‍ കാരണമായിട്ടാണ് പലപ്പോഴും മാനസികാരോഗ്യപ്രശ്‌നങ്ങള്‍ സംഭവിക്കുന്നത്. അതുകൊണ്ട് അവയുടെ ഗൗരവമനുസരിച്ച് മരുന്നുകള്‍ ഉപയോഗിച്ചുള്ള ചികിത്സയോ, കൗണ്‍സിലിംഗ്, സൈക്കോതെറാപ്പി പോലുള്ള ചികിത്സകളോ ലഭ്യമാക്കുയാണ് പരിഹാരം.

ഈ ലോക ആത്മഹത്യാ പ്രതിരോധ ദിനത്തില്‍, നമ്മുടെ കുടുംബങ്ങളിലും ജോലിസ്ഥലങ്ങളിലും കമ്മ്യൂണിറ്റികളിലും ആത്മഹത്യയെക്കുറിച്ചുള്ള സംഭാഷണങ്ങള്‍ ആരംഭിക്കാം. ആഖ്യാനം മാറ്റുന്നതിലൂടെ, ആളുകള്‍ക്ക് സഹായം തേടുന്നത് സുഖകരവും മാനസികാരോഗ്യം മൊത്തത്തിലുള്ള ക്ഷേമത്തിന്റെ അവിഭാജ്യ ഘടകമായി കാണുന്നതുമായ ഒരു അന്തരീക്ഷം വളര്‍ത്തിയെടുക്കാന്‍ നമുക്ക് കഴിയും. ഓരോ ചെറിയ സംഭാഷണവും പ്രാധാന്യമര്‍ഹിക്കുന്നു-കാരണം നിശബ്ദത ഭേദിക്കുന്നത് ജീവന്‍ രക്ഷിക്കുന്നതിനുള്ള ആദ്യപടിയാണ്.

ജീവിതത്തിലെ കടുത്ത മാനസിക സംഘർഷങ്ങളും വെല്ലുവിളികളും അനുഭവിക്കുമ്പോൾ ആരും ഒറ്റയ്ക്കല്ല എന്ന ഓർമ്മപ്പെടുത്തലാണ് പ്രധാനം. സമയബന്ധിതമായ പിന്തുണയും കൗൺസിലിംഗും വഴി പ്രതിസന്ധികളെ അതിജീവിക്കാൻ സാധിക്കും. നിങ്ങളോ നിങ്ങള്‍ക്കറിയാവുന്ന ആരെങ്കിലുമോ ആത്മഹത്യാ ചിന്തകളുമായി മല്ലിടുകയാണെങ്കില്‍, സഹായത്തിനായി എത്താന്‍ മടിക്കരുത്. കൗണ്‍സിലിംഗും പിന്തുണയും ലഭ്യമാണ്. നമുക്കൊരുമിച്ചാല്‍ ആത്മാര്‍ത്ഥമായി കരുതുന്ന ഒരു സമൂഹം കെട്ടിപ്പടുക്കാം.