താരപുത്രി അല്ലു അർഹയ്ക്ക് ഹൃദയസ്പർശിയായ പിറന്നാൾ ആശംസകൾ നേർന്ന് നടൻ അല്ലു അർജുൻ. അർഹയുടെ പത്താം പിറന്നാൾ ദിനത്തിലാണ് സ്നേഹം നിറഞ്ഞ കുറിപ്പുമായി താരം എത്തിയത്. അച്ഛനും മകളും തമ്മിലുള്ള ആഴമേറിയ ആത്മബന്ധം കാണിക്കുന്ന മനോഹരമായ ഒരു ബ്ലാക്ക് ആൻഡ് വൈറ്റ് ചിത്രത്തിനൊപ്പം, 'എന്റെ ജീവിതത്തിലെ സന്തോഷത്തിന് പിറന്നാൾ ആശംസകൾ' എന്നാണ് അല്ലു അർജുൻ കുറിച്ചത്. ഈ പോസ്റ്റ് ഇതിനോടകം സാമൂഹികമാധ്യമങ്ങളിൽ വലിയ ശ്രദ്ധ നേടിക്കഴിഞ്ഞു.
എസ്. ജാനകി ആലപിച്ച 'കിളിയേ കിളിയേ' എന്ന ഗാനത്തിന്റെ പശ്ചാത്തലത്തിലാണ് താരം ആശംസാ പോസ്റ്റ് പങ്കുവെച്ചത്. തിരക്കേറിയ സിനിമാ ജീവിതത്തിനും വെള്ളിത്തിരയിലെ പ്രകടനങ്ങൾക്കുമിടയിലും കുടുംബത്തോടൊപ്പമുള്ള സന്തോഷനിമിഷങ്ങൾ ആരാധകരുമായി പങ്കുവെക്കാൻ അല്ലു അർജുൻ എപ്പോഴും സമയം കണ്ടെത്താറുണ്ട്.
അർഹയുടെ പത്താം പിറന്നാൾ ആഘോഷം കൂടുതൽ അവിസ്മരണീയമാക്കുന്നതിനായി അല്ലു അർജുനും കുടുംബവും ശ്രീലങ്കയിലേക്ക് യാത്ര തിരിച്ചു. ഷൂട്ടിങ് തിരക്കുകൾക്കിടയിലും കുടുംബാംഗങ്ങൾക്കൊപ്പം ചെലവഴിക്കാനും മനോഹരമായ ഓർമകൾ സമ്മാനിക്കാനും താരം എന്നും മുൻഗണന നൽകാറുണ്ട്.
ഗുണശേഖർ സംവിധാനം ചെയ്ത 'ശാകുന്തളം' എന്ന ചിത്രത്തിലൂടെ ഭരത രാജകുമാരനായി വേഷമിട്ടാണ് അർഹ സിനിമയിൽ അരങ്ങേറ്റം കുറിച്ചത്. അഞ്ചാം വയസ്സിൽ ലോകത്തിലെ ഏറ്റവും പ്രായം കുറഞ്ഞ ചെസ് പരിശീലക എന്ന നേട്ടത്തിലൂടെ നോബിൾ ബുക്ക് ഓഫ് വേൾഡ് റെക്കോർഡ്സിലും അർഹ ഇടംനേടിയിരുന്നു. തെലുങ്ക് ഭാഷയിലുള്ള മികച്ച പ്രാവീണ്യവും സംസ്കാരത്തോടുള്ള അടുപ്പവും കാരണം അർഹ പലപ്പോഴും വാർത്തകളിൽ ഇടംനേടാറുണ്ട്.
ബ്ലാക്ക് ആൻഡ് വൈറ്റ് ചിത്രവും 'കിളിയേ കിളിയേ' ഗാനവും; മകൾ അർഹയുടെ പിറന്നാൾ ആഘോഷമാക്കി അല്ലു അർജുൻ