സംസ്ഥാനത്ത് ഐഎഎസ് തലപ്പത്ത് അഴിച്ചുപണി; ശ്രീറാം വെങ്കിട്ടരാമന് പുതിയ ചുമതല

തിരുവനന്തപുരം: സംസ്ഥാനത്ത് ഐഎഎസ് തലപ്പത്ത് വൻ അഴിച്ചുപണി. നിരവധി മുതിർന്ന ഉദ്യോഗസ്ഥർക്ക് പുതിയ ചുമതലകൾ നൽകി സർക്കാർ ഉത്തരവിറക്കി. ശ്രീറാം വെങ്കിട്ടരാമനെ കൃഷിവകുപ്പിൽ നിന്ന് മാറ്റി വനംവകുപ്പ് ജോയിന്റ് സെക്രട്ടറിയായി നിയമിച്ചു. കശുവണ്ടി വികസന വകുപ്പ് ജോയിന്റ് സെക്രട്ടറിയുടെ അധിക ചുമതലയും ശ്രീറാം വെങ്കിട്ടരാമന് നൽകി.

അരുൺ കെ. വിജയനെ പൊതുവിദ്യാഭ്യാസ ഡയറക്ടറായി നിയമിച്ചു. ഡോ. രേണു രാജിന് നാഷണൽ ഹെൽത്ത് മെഡിസിന്റെ അധിക ചുമതല നൽകി.

തിരുവനന്തപുരം ജില്ലാ കളക്ടറായ അനു കുമാരിയെ ജിഎസ്ടി കമ്മീഷണറായി നിയമിച്ചു. സ്നേഹിൽ കുമാർ സിംഗിനെ വ്യവസായ വകുപ്പിലേക്ക് മാറ്റി. കെഎസ്ഐഡിസി എംഡിയുടെയും അധിക ചുമതല സ്നേഹിൽ കുമാർ സിംഗിന് നൽകി.

ശ്രീധന്യ സുരേഷിനെ കാസർഗോഡ് ജില്ലാ കളക്ടറായി നിയമിച്ചു. തിരുവനന്തപുരം സബ് കളക്ടർ ആൽഫ്രഡ് ഒ.വിയെ മിഷൻ സമുദ്രയുടെ നോഡൽ ഓഫീസറായി നിയമിച്ചു. അഞ്ചു കെ.എസിനാണ് തിരുവനന്തപുരം ജില്ലാ കളക്ടറുടെ ചുമതല.

അർജുൻ പാണ്ഡ്യനെ കൃഷിവകുപ്പിലേക്ക് മാറ്റി. തൃശൂർ ജില്ലാ കളക്ടർ ശിഖ സുരേന്ദ്രന് കേരള ഇൻസ്റ്റിറ്റ്യൂട്ട് ഓഫ് ലോക്കൽ അഡ്മിനിസ്ട്രേഷന്റെ (കില) അധിക ചുമതല നൽകി. ദിലീപ് കെ.യെ ശബരിമല എഡിഎമ്മായും നിയമിച്ചു.

പുതിയ ചുമതലകൾ സംബന്ധിച്ച സർക്കാർ ഉത്തരവിന്റെ അടിസ്ഥാനത്തിൽ ഉദ്യോഗസ്ഥർ ഉടൻ ചുമതലയേൽക്കും.