സ്വർണവില വീണ്ടും കുതിച്ചു; കേരളത്തിൽ പവന് ₹1,17,680, ഗ്രാമിന് ₹₹14,710

കൊച്ചി: കേരളത്തിലെ സ്വർണവിലയിൽ വീണ്ടും വൻ വർധന. ഗ്രാമിന് 110 രൂപ ഉയർന്ന് ഒരു ഗ്രാം സ്വർണത്തിന്റെ വില 14,710 രൂപയായി. പവന് 880 രൂപ വർധിച്ചതോടെ ഒരു പവൻ സ്വർണത്തിന്റെ വില 1,17,680 രൂപയിലെത്തി. 18 കാരറ്റ് സ്വർണത്തിനും വില ഉയർന്നു. ഗ്രാമിന് 90 രൂപ വർധിച്ച് 12,085 രൂപയായി. പവന്റെ വില 96,680 രൂപയായും ഉയർന്നു.

ആഗോള വിപണിയിലും സ്വർണവില മുന്നേറി. തുടർച്ചയായ മൂന്നാം ആഴ്ചയും നേട്ടത്തിൽ വ്യാപാരം അവസാനിപ്പിക്കാനുള്ള ഒരുക്കത്തിലാണ് സ്വർണം. വെള്ളിയാഴ്ച സ്പോട്ട് ഗോൾഡ് വില 0.5 ശതമാനം ഉയർന്ന് ഔൺസിന് 4,540.18 ഡോളറിലെത്തി. ജൂൺ ആദ്യവാരത്തിന് ശേഷമുള്ള ഏറ്റവും ഉയർന്ന നിലവാരമാണിത്.

ഈ ആഴ്ച മാത്രം ആഗോള സ്വർണവില 3.6 ശതമാനം ഉയർന്നു. യുഎസ് ഗോൾഡ് ഫ്യൂച്ചേഴ്സ് വിലയും 0.6 ശതമാനം ഉയർന്ന് 4,596.60 ഡോളറിലെത്തി. യുഎസ് ഡോളറിന്റെ ദൗർബല്യമാണ് നിലവിൽ സ്വർണവിലയ്ക്ക് പ്രധാന പിന്തുണ നൽകുന്നത്. ഡോളർ ദുർബലമാകുമ്പോൾ മറ്റ് കറൻസികൾ കൈവശമുള്ള നിക്ഷേപകർക്ക് ഡോളറിൽ വില നിശ്ചയിക്കുന്ന സ്വർണം കൂടുതൽ ആകർഷകമാകും.

ദീർഘകാല യുഎസ് ട്രഷറി ബോണ്ടുകൾ തിരിച്ചുവാങ്ങാനുള്ള യുഎസ് ട്രഷറിയുടെ തീരുമാനവും സ്വർണവിലയെ പിന്തുണയ്ക്കുന്ന ഘടകമാണ്. ഓരോ ബൈബാക്കിലും കുറഞ്ഞത് 4 ബില്യൺ ഡോളർ മൂല്യമുള്ള ദീർഘകാല ബോണ്ടുകൾ തിരിച്ചുവാങ്ങാനാണ് ട്രഷറി ലക്ഷ്യമിടുന്നത്. അതേസമയം, സ്വർണവിലയുടെ അടുത്ത നീക്കത്തിൽ നിർണായകമാകുക യുഎസ് ഫെഡറൽ റിസർവിന്റെ പലിശനിരക്ക് തീരുമാനമായിരിക്കും. സെപ്റ്റംബറിലെ യോഗത്തിൽ പലിശനിരക്കിൽ മാറ്റം വരുത്താതെ തുടരാനാണ് വിപണി നിലവിൽ കൂടുതൽ സാധ്യത കൽപ്പിക്കുന്നത്.

ഇതിനിടെ ഇറാനെതിരായ കൂടുതൽ കടുത്ത ഉപരോധങ്ങളെക്കുറിച്ചുള്ള യുഎസ് ട്രഷറി സെക്രട്ടറി സ്കോട്ട് ബെസന്റിന്റെ പ്രഖ്യാപനവും ആഗോള വിപണിയിലെ അനിശ്ചിതത്വം വർധിപ്പിക്കുന്നുണ്ട്.സ്വർണത്തിന് പുറമെ മറ്റ് വിലയേറിയ ലോഹങ്ങളും നേട്ടത്തിലാണ്. വെള്ളിയുടെ വില 1.3 ശതമാനവും, പ്ലാറ്റിനം 2.4 ശതമാനവും, പല്ലാഡിയം 1.3 ശതമാനവും ഉയർന്നു.

ഡോളറിന്റെ നീക്കം, യുഎസ് പലിശനിരക്ക്, ട്രഷറി ബോണ്ട് വിപണി, ആഗോള രാഷ്ട്രീയ സംഘർഷങ്ങൾ എന്നിവയായിരിക്കും വരും ദിവസങ്ങളിൽ സ്വർണവിലയെ സ്വാധീനിക്കുന്ന പ്രധാന ഘടകങ്ങൾ.