ഒരോവറിൽ മൂന്ന് വിക്കറ്റുകൾ, ഗാലെയിൽ മാനവ് സുതാർ മിന്നിച്ചു; ശ്രീലങ്കയ്ക്കെതിരായ ഒന്നാം ടെസ്റ്റിൽ ഇന്ത്യക്ക് തകർപ്പൻ ജയം
ശ്രീലങ്കയ്ക്കെതിരായ ഒന്നാം ക്രിക്കറ്റ് ടെസ്റ്റിൽ ഇന്ത്യക്ക് 165 റൺസിന്റെ മികച്ച വിജയം. 372 റൺസ് വിജയലക്ഷ്യവുമായി ഇറങ്ങിയ ശ്രീലങ്ക, അഞ്ചാം ദിനം ലഞ്ചിനുശേഷം 206 റൺസിന് ഓൾ ഔട്ടായി. രണ്ടാം ഇന്നിംഗ്സിൽ 6 വിക്കറ്റുകൾ വീഴ്ത്തിയ ഇടംകയ്യൻ സ്പിന്നർ മാനവ് സുതാറാണ് ഇന്ത്യൻ വിജയം വേഗത്തിലാക്കിയത്. ആദ്യ ഇന്നിംഗ്സിലെ നാല് വിക്കറ്റുകൾ ഉൾപ്പെടെ മത്സരത്തിലാകെ 10 വിക്കറ്റ് നേട്ടവും സുതാർ സ്വന്തമാക്കി. ഈ ജയത്തോടെ രണ്ട് മത്സരങ്ങളുടെ പരമ്പരയിൽ ഇന്ത്യ മുന്നിലെത്തി.
സ്കോർ ചുരുക്കത്തിൽ: ഇന്ത്യ 462, 193; ശ്രീലങ്ക 284, 206
അഞ്ചാം ദിനം 4 വിക്കറ്റിന് 84 റൺസ് എന്ന നിലയിൽ കളി പുനരാരംഭിച്ച ശ്രീലങ്കയ്ക്കായി സൊണാൽ ദിനുഷയും (84) ധനഞ്ജയ ഡിസിൽവയും (59) ചേർന്ന് മികച്ച പ്രതിരോധം തീർത്തു. അഞ്ചാം വിക്കറ്റിൽ ഇരുവരും ചേർത്ത 95 റൺസ് കൂട്ടുകെട്ട് ഇന്ത്യക്ക് തലവേദന സൃഷ്ടിച്ചെങ്കിലും, അർധസെഞ്ചുറിക്ക് പിന്നാലെ ജഡേജയെ സ്വീപ്പ് ചെയ്യാനുള്ള ശ്രമത്തിൽ ഡിസിൽവ പുറത്തായി. തുടർന്നെത്തിയ നിരോഷൻ ഡിക്വെല്ലയെ (10) പ്രസിദ്ധ് കൃഷ്ണ പുറത്താക്കിയതോടെ ഇന്ത്യ ജയത്തിനടുത്തെത്തി.
ലഞ്ചിന് പിരിയുമ്പോൾ 6 വിക്കറ്റിന് 175 റൺസ് എന്ന നിലയിലായിരുന്ന ലങ്കയെ, ലഞ്ചിനുശേഷമുള്ള തന്റെ ഒറ്റ ഓവറിൽ മൂന്ന് വിക്കറ്റുകൾ വീഴ്ത്തിയാണ് മാനവ് സുതാർ തകർത്തത്. 76-ാം ഓവറിലെ ആദ്യ പന്തിൽ പൊരുതി നിന്ന ദിനുഷയെ (84) പുറത്താക്കിയ സുതാർ, തൊട്ടടുത്ത പന്തിൽ പ്രഭാത് ജയസൂര്യയെ ബൗൾഡാക്കി. ഹാട്രിക് നഷ്ടമായെങ്കിലും അതേ ഓവറിലെ അവസാന പന്തിൽ ലാഹിരു കുമാരയെയും (0) മടക്കി അയച്ചു. തൊട്ടടുത്ത ഓവറിൽ കെഷാര നുവാന്തയെയും (20) വീഴ്ത്തി സുതാർ ഇന്ത്യൻ വിജയം പൂർത്തിയാക്കി. മത്സരം അവസാനിച്ചതിന് തൊട്ടുപിന്നാലെ ഗാലെയിൽ കനത്ത മഴ പെയ്യുകയും ചെയ്തു.
പരമ്പരയിലെ രണ്ടാമത്തെയും അവസാനത്തെയും ടെസ്റ്റ് മത്സരം വരുന്ന ഞായറാഴ്ച കൊളംബോയിൽ ആരംഭിക്കും.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.