ഡയമണ്ട് ലീഗില് നീരജ് ചോപ്രയ്ക്ക് വെള്ളി; സ്വര്ണം നഷ്ടമായത് 9 സെന്റീമീറ്റര് വ്യത്യാസത്തിൽ
സ്വിറ്റ്സര്ലന്ഡിലെ ലോസാനില് നടന്ന ഡയമണ്ട് ലീഗ് മീറ്റില് ഇന്ത്യയുടെ ഒളിമ്പിക് ചാമ്പ്യന് നീരജ് ചോപ്രയ്ക്ക് വെള്ളി മെഡല്. അവസാന നിമിഷം വരെ ആവേശം നിറഞ്ഞ പോരാട്ടത്തില് കേവലം 9 സെന്റീമീറ്ററിന്റെ വ്യത്യാസത്തിലാണ് നീരജിന് ഒന്നാം സ്ഥാനം നഷ്ടമായത്.
സീസണിലെ തന്റെ ഏറ്റവും മികച്ച ദൂരമായ 88.05 മീറ്റര് കണ്ടെത്താന് നീരജിനായെങ്കിലും, 88.14 മീറ്റര് ദൂരം എറിഞ്ഞ ശ്രീലങ്കന് താരം റുമേഷ് പതിരഗെ സ്വര്ണ്ണം സ്വന്തമാക്കി. ആദ്യ ശ്രമത്തില് 83.54 മീറ്റര് കണ്ടെത്തിയ നീരജ്, രണ്ടാം ശ്രമത്തില് 88.05 മീറ്റര് എറിഞ്ഞ് ഒന്നാം സ്ഥാനത്തേക്ക് ലീഡ് ഉയര്ത്തിയിരുന്നു. എന്നാല് തൊട്ടടുത്ത മൂന്നാം ശ്രമത്തില് 88.14 മീറ്റര് എറിഞ്ഞ് പതിരഗെ ഒന്നാം സ്ഥാനം തിരിച്ചുപിടിക്കുകയായിരുന്നു. 86.69 മീറ്റര് ദൂരം കണ്ടെത്തിയ ഗ്രെനഡയുടെ ആന്ഡേഴ്സണ് പീറ്റേഴ്സിനാണ് വെങ്കലം.
പരിക്കില് നിന്നും മുക്തനായി തിരിച്ചെത്തിയ ശേഷമുള്ള നീരജിന്റെ ഈ വര്ഷത്തെ മൂന്നാമത്തെ മത്സരമായിരുന്നു ഇത്. 88 മീറ്ററിന് മുകളില് എറിയാന് കഴിഞ്ഞതില് സന്തോഷമുണ്ടെന്നും, കേവലം 9 സെന്റീമീറ്ററിന്റെ വ്യത്യാസത്തിലാണ് ഒന്നാം സ്ഥാനം നഷ്ടമായതെന്ന് താന് അറിഞ്ഞില്ലെന്നും നീരജ് മത്സരശേഷം പ്രതികരിച്ചു. ലോസാനില് വിജയം കുറിച്ച റുമേഷ് പതിരഗെയും നീരജ് ചോപ്രയും അടുത്തതായി മാറ്റുരയ്ക്കുന്നത് ഏഷ്യന് ഗെയിംസിലാണ്. പാകിസ്ഥാന്റെ അര്ഷാദ് നദീം കൂടി എത്തുന്നതോടെ ഏഷ്യന് ഗെയിംസിലെ ജാവലിന് പോരാട്ടം കടുക്കുമെന്നുറപ്പാണ്.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.