തിരുവനന്തപുരം: കൊച്ചി മെട്രോയുടെ പേരുമാറ്റവുമായി ബന്ധപ്പെട്ട ചര്‍ച്ചകള്‍ സര്‍ക്കാരിന്റെ പരിഗണനയിലില്ലെന്ന് മുഖ്യമന്ത്രി വിഡി സതീശന്‍. വിഷയത്തില്‍ കെഎംആര്‍എല്‍ ഏകപക്ഷീയമായി തീരുമാനമെടുക്കുകയായിരുന്നുവെന്നും സര്‍ക്കാരുമായി യാതൊരു കൂടിയാലോചനയും നടന്നിട്ടില്ലെന്നും മുഖ്യമന്ത്രി മാധ്യമങ്ങളോട് പറഞ്ഞു.
ഇന്ന് രാവിലെ പത്രവാര്‍ത്ത കണ്ടാണ് പേരുമാറ്റത്തെക്കുറിച്ച് അറിയുന്നത്. കെഎംആര്‍എല്‍ മാത്രം തീരുമാനിച്ചാല്‍ പോരല്ലോ, സര്‍ക്കാരുമായി ആലോചിക്കേണ്ടേ? സര്‍ക്കാര്‍ അറിയാതെ അവര്‍ സ്വയം ആലോചിച്ച കാര്യങ്ങളില്‍ പ്രതികരിക്കേണ്ടതില്ല. ഭാവിയില്‍ പേരുമാറ്റുമോ എന്ന ചോദ്യത്തിന് തന്നെ പ്രസക്തിയില്ലെന്നും മുഖ്യമന്ത്രി വ്യക്തമാക്കി.
അതേസമയം വലിയ സാമ്പത്തിക പ്രതിസന്ധിക്കിടയിലും ഓണം പ്രമാണിച്ച് അടുത്ത മാസം ഒന്നാം തീയതി നല്‍കേണ്ട ക്ഷേമപെന്‍ഷന്‍ മുന്‍കൂറായി കൊടുത്തു തുടങ്ങി. ധനപ്രതിസന്ധിയുടെ ക്ഷീണമേല്‍പ്പിക്കാതെ സര്‍ക്കാര്‍ ജനങ്ങള്‍ക്കൊപ്പമുണ്ടെന്നും അദ്ദേഹം കൂട്ടിച്ചേര്‍ത്തു.
മെസി വിവാദത്തില്‍ അന്വേഷണ റിപ്പോര്‍ട്ട് ലഭിച്ചിട്ടുണ്ടെന്നും അത് പരിശോധിച്ച് സര്‍ക്കാര്‍ തീരുമാനം ഉടന്‍ അറിയിക്കുമെന്നും അദ്ദേഹം പറഞ്ഞു. വീണ വിജയനെതിരായ ഇഡി അന്വേഷണ വാര്‍ത്തകളെക്കുറിച്ചുള്ള ചോദ്യത്തിന്, ഒരു അന്വേഷണം നടക്കുമ്പോള്‍ മുഖ്യമന്ത്രി എന്ന നിലയില്‍ കമന്റ് പറയുന്നത് അനൗചിത്യമാണെന്ന് അദ്ദേഹം പ്രതികരിച്ചു. കാര്യങ്ങള്‍ ജനങ്ങള്‍ കാണുന്നുണ്ടെന്നും അന്വേഷണ ഏജന്‍സികളുടെ വാക്കും പ്രവൃത്തിയും തമ്മിലുള്ള വ്യത്യാസം ജനങ്ങള്‍ വിലയിരുത്തട്ടെയെന്നും മുഖ്യമന്ത്രി പറഞ്ഞു.
'കൊച്ചി മെട്രോ' പേരുമാറ്റം ആലോചനയിലില്ല: മുഖ്യമന്ത്രി വി ഡി സതീശൻ
Jaihind TV News Report
Jaihind TV Web Desk
Updated Oct 13, 2026
2 min read
387 reads
