സി.എം.ആർ.എൽ-എക്സാലോജിക് പണമിടപാട് കേസ്: പിണറായിയെ ചോദ്യംചെയ്യാൻ ഇ.ഡി നീക്കം; റിപ്പോർട്ട് നൽകി
സി.എം.ആർ.എൽ.-എക്സാലോജിക് പണമിടപാട് കേസിൽ പ്രതിപക്ഷ നേതാവ് പിണറായി വിജയനെ ചോദ്യം ചെയ്യാൻ എൻഫോഴ്സ്മെന്റ് ഡയറക്ടറേറ്റ് നീക്കം നടത്തുന്നതായി റിപ്പോർട്ട്. കേസിൽ പ്രതിയായ അദ്ദേഹത്തിന്റെ മകൾ ടി. വീണയുടേതുൾപ്പെടെയുള്ള സ്വത്തുക്കൾ കണ്ടുകെട്ടുന്നതിന് മുന്നോടിയായി ഡൽഹിയിലെ ഇ.ഡി. അഡ്ജുഡിക്കേറ്റിങ് അതോറിറ്റിക്ക് സമർപ്പിച്ച റിപ്പോർട്ടിലാണ് ഇതുസംബന്ധിച്ച സൂചനകളുള്ളത്. കൊച്ചി ഇ.ഡി. ഓഫീസാണ് ഈ റിപ്പോർട്ട് തയ്യാറാക്കി നൽകിയത്.
എക്സാലോജിക്കിനും ഡയറക്ടറായ വീണയ്ക്കും പണം നൽകിയത് പിണറായിയുമായുള്ള വ്യക്തിബന്ധത്തിന്റെ പേരിലായിരുന്നുവെന്ന് സി.എം.ആർ.എൽ. എം.ഡി. എസ്.എൻ. ശശിധരൻ കർത്ത 2024 ഏപ്രിൽ 17-ന് മൊഴി നൽകിയെന്ന വിവരവും പുറത്തുവന്നു. എന്റർപ്രൈസ് റിസോഴ്സ് പ്ലാനിങ് സേവനങ്ങളൊന്നും നൽകാതെയാണ് പണം കൈമാറിയതെന്നും, ഐ.ടി. കൺസൾട്ടൻസിയുടെ പേരിൽ ലഭിച്ച 2.78 കോടി രൂപ സേവനങ്ങളൊന്നും നൽകാതെയാണെന്ന് വീണ സമ്മതിച്ചതായും ഇ.ഡി. റിപ്പോർട്ടിൽ വ്യക്തമാക്കുന്നു. കർത്തയുടെ ഈ മൊഴിയുടെ അടിസ്ഥാനത്തിലായിരിക്കും പിണറായിയെ ഇ.ഡി. ചോദ്യം ചെയ്യുക.
കേസുകളുടെ അവലോകനത്തിനായി ഇ.ഡി. സ്പെഷ്യൽ ഡയറക്ടർ പ്രശാന്ത് കുമാർ കഴിഞ്ഞയാഴ്ച കൊച്ചിയിലെത്തിയപ്പോൾ ചോദ്യം ചെയ്യൽ സംബന്ധിച്ച ചർച്ചകൾ നടന്നിരുന്നു. ഇ.ഡി. ഡയറക്ടർ രാഹുൽ നവീന്റെ അനുമതി ലഭിച്ച ശേഷമേ തുടർനടപടികളിലേക്ക് കടക്കാവൂ എന്ന് ഉദ്യോഗസ്ഥർക്ക് നിർദ്ദേശം നൽകിയിരുന്നതായും, നിലവിൽ ഇതിനുള്ള അനുമതി ലഭിച്ചതായാണ് സൂചനകൾ. ഇല്ലാത്ത ഐ.ടി. കൺസൾട്ടൻസിയുടെ പേരിൽ എക്സാലോജിക്കിന് സി.എം.ആർ.എൽ. 1.72 കോടി രൂപ നൽകിയതായി 2019 ജനുവരിയിൽ ആദായനികുതി വകുപ്പ് നടത്തിയ റെയ്ഡിൽ കണ്ടെത്തിയിരുന്നു. ഇതുൾപ്പെടെ വീണയ്ക്കും കമ്പനിക്കും ആകെ 2.78 കോടി രൂപ കരാറുകളിലൂടെ കൈമാറിയെന്നാണ് കണ്ടെത്തൽ.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.