ടൂറിസം മേഖലയുടെ സമഗ്രമായ വളർച്ചയ്ക്ക് സർക്കാരും സ്വകാര്യ സംരംഭകരും കൈകോർത്ത് പ്രവർത്തിക്കേണ്ടത് അനിവാര്യമാണെന്ന് മന്ത്രി പി.സി.വിഷ്ണുനാഥ് വ്യക്തമാക്കി. ടൂറിസം വകുപ്പിന്റെ സഹകരണത്തോടെ ടൂറിസം പ്രഫഷനൽസ് ക്ലബ് സംഘടിപ്പിച്ച ‘ഷൂട്ട് ദ് റെയ്ൻ 2026’ മൺസൂൺ സോക്കർ ഫെസ്റ്റിന്റെ ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം.
കൊച്ചിക്കായി വൻകിട പദ്ധതികൾ
വരും വർഷങ്ങളിൽ കൊച്ചി നഗരത്തിന്റെ ടൂറിസം ഭൂപടം മാറ്റിവരയ്ക്കുന്ന വൻകിട പദ്ധതികൾ യാഥാർഥ്യമാകുമെന്ന് മന്ത്രി കൂട്ടിച്ചേർത്തു. രാജ്യാന്തര നിലവാരത്തിലുള്ള ഫിലിം സിറ്റി, മാരിടൈം മ്യൂസിയം, ഓഷ്യനേറിയം എന്നിവ കൊച്ചിയിലേക്ക് എത്തുന്ന പദ്ധതികളിൽ ഉൾപ്പെടുന്നു.
സുപ്രധാന സീസണായി മൺസൂൺ ടൂറിസം
ഒരുകാലത്ത് കേരള ടൂറിസത്തിലെ ‘ഓഫ് സീസൺ’ ആയി കണക്കാക്കിയിരുന്ന മഴക്കാലം ഇന്ന് സംസ്ഥാനത്തെ ഏറ്റവും മികച്ച ടൂറിസം സീസണുകളിലൊന്നായി മാറി. പ്രത്യേകിച്ച് അറബ് രാജ്യങ്ങളിൽ നിന്നുള്ള സഞ്ചാരികൾ ഈ സമയത്ത് ധാരാളമായി എത്താറുണ്ട്. മാറുന്ന ഈ ടൂറിസം സാധ്യതകൾ പരമാവധി പ്രയോജനപ്പെടുത്താൻ എല്ലാവരും മുന്നോട്ടുവരണമെന്നും അദ്ദേഹം ആഹ്വാനം ചെയ്തു. ചടങ്ങിൽ ടി.ജെ. വിനോദ് എംഎൽഎ, ജില്ലാ കലക്ടർ ജി. പ്രിയങ്ക എന്നിവരും പങ്കെടുത്തു സംസാരിച്ചു.
