ശബരിമലയിലെ മണ്ഡലകാലത്ത് മിൽമയിൽ നിന്ന് നെയ്യ് വാങ്ങിയതിൽ കോടികളുടെ ക്രമക്കേട് നടന്നെന്ന കേസിൽ തിരുവിതാംകൂർ ദേവസ്വം ബോർഡ് മുൻ പ്രസിഡന്റ് പി.എസ്. പ്രശാന്തിനെ പ്രതിചേർക്കാൻ തീരുമാനം. കൂടാതെ ഉന്നത ദേവസ്വം ഉദ്യോഗസ്ഥരും കേസിൽ പ്രതികളാകും. ക്രമവിരുദ്ധമായി മിൽമയിൽ നിന്ന് നെയ്യ് വാങ്ങിയ നടപടിയിലൂടെ ദേവസ്വം ബോർഡിന് 2.27 കോടി രൂപയുടെ ഭീമമായ സാമ്പത്തിക നഷ്ടം സംഭവിച്ചെന്നാണ് പ്രാഥമിക റിപ്പോർട്ട്.
അന്വേഷണം വിജിലൻസ് പ്രത്യേക സംഘത്തിന് (SIT)
എറണാകുളം വിജിലൻസ് സ്പെഷൽ സെൽ എസ്‌പി എം.ജെ. സോജന്റെ നേതൃത്വത്തിലുള്ള പ്രത്യേക സംഘമാണ് (എസ്ഐടി) ഈ ക്രമക്കേട് അന്വേഷിക്കുക. കേസിൽ അതീവ ജാഗ്രതയോടെയും ഊർജിതമായും അന്വേഷണം നടത്തണമെന്ന് ഹൈക്കോടതി ഉത്തരവിട്ടു. മാധ്യമവാർത്തകളുടെ അടിസ്ഥാനത്തിൽ ഹൈക്കോടതി സ്വമേധയാ എടുത്ത കേസിൽ പ്രത്യേക ടീമിനെ നിയോഗിക്കാൻ വിജിലൻസ് ഡയറക്ടറോട് കോടതി നേരത്തെ ആവശ്യപ്പെട്ടിരുന്നു.
കോടതി നിർദേശവും അന്വേഷണ ചുമതലയും
സന്നിധാനത്തെ 'ആടിയശിഷ്ടം നെയ്യ്' ക്രമക്കേട് കേസ് നിലവിൽ അന്വേഷിക്കുന്നത് എസ്‌പി എം.ജെ. സോജനായതിനാലാണ് മിൽമ നെയ്യ് കേസിന്റെ ചുമതലയും അദ്ദേഹത്തിന് കൈമാറാൻ ജസ്റ്റിസ് വി. വിജയരാഘവൻ, ജസ്റ്റിസ് കെ.വി. ജയകുമാർ എന്നിവരടങ്ങിയ ദേവസ്വം ബെഞ്ച് നിർദേശിച്ചത്. സർക്കാർ സമർപ്പിച്ച മൂന്ന് എസ്‌പിമാരുടെ പാനലിൽ നിന്നാണ് സോജനെ ഇതിനായി തിരഞ്ഞെടുത്തത്. ഈ കേസ് ഈ മാസം 17-ന് ഹൈക്കോടതി വീണ്ടും പരിഗണിക്കും.
കുറഞ്ഞ വിലയ്ക്ക് നെയ്യ് നൽകാമെന്ന് തമിഴ്‌നാട്ടിലെ സ്വകാര്യ സ്ഥാപനം വാഗ്ദാനം നൽകിയിരുന്നെങ്കിലും അത് തള്ളിയാണ് ഉയർന്ന തുകയ്ക്ക് മിൽമയിൽ നിന്ന് നെയ്യ് വാങ്ങിയത്. മുൻ എക്സിക്യൂട്ടീവ് ഓഫിസർ മുരാരി ബാബുവിന്റെ ശുപാർശ പ്രകാരമായിരുന്നു ഈ നടപടി. ദേവസ്വം കമ്മിഷണർ ഇതിനെ ശക്തമായി എതിർത്തുവെങ്കിലും, അന്നത്തെ ബോർഡ് പ്രസിഡന്റ് പി.എസ്. പ്രശാന്തും അംഗം അജികുമാറും മിൽമയ്ക്ക് അനുകൂലമായി നിലപാടെടുക്കുകയും മറ്റ് ടെൻഡറുകൾ റദ്ദാക്കുകയുമായിരുന്നു എന്ന് ദേവസ്വം വിജിലൻസ് കണ്ടെത്തി.
