കൊല്ലം നാന്തിരിക്കൽ സ്വദേശിനിയായ യുവതി ആശുപത്രിയിലേക്കുള്ള യാത്രാമധ്യേ ആംബുലൻസിനുള്ളിൽ ആൺകുഞ്ഞിന് ജന്മം നൽകി. ചൊവ്വാഴ്ച വെളുപ്പിന് മൂന്നു മണിയോടെയായിരുന്നു സംഭവം. പ്രസവവേദന അനുഭവപ്പെട്ടതിനെ തുടർന്ന് ബന്ധുക്കൾ യുവതിയെ കൊല്ലം വിക്ടോറിയ ആശുപത്രിയിലേക്ക് കൊണ്ടുപോകുന്നതിനായാണ് ആംബുലൻസ് വിളിച്ചത്. എന്നാൽ വാഹനം ഇളമ്പള്ളൂർ എത്തിയപ്പോഴേക്കും യുവതിക്ക് പ്രസവവേദന കഠിനമായി.
സ്ഥിതി ഗുരുതരമാണെന്ന് മനസ്സിലാക്കിയ തിരുഹൃദയം ആംബുലൻസ് ഡ്രൈവർ ആന്റണി സമയോചിതമായി ഇടപെട്ട് വാഹനം കുണ്ടറയിലെ സ്വകാര്യ ആശുപത്രിയിലേക്ക് തിരിച്ചുവിട്ടു. തുടർന്ന് ആശുപത്രിയിലെ ഡോക്ടർമാരും നഴ്‌സിങ് ജീവനക്കാരും ആംബുലൻസിലെത്തി അടിയന്തര ശുശ്രൂഷകൾ നൽകുകയും പൊക്കിൾക്കൊടി വേർപെടുത്തി അമ്മയെയും കുഞ്ഞിനെയും ആശുപത്രിയിലേക്ക് മാറ്റുകയും ചെയ്തു.
വാർത്തയറിഞ്ഞ ഉടൻ തന്നെ മന്ത്രി പി.സി. വിഷ്ണുനാഥ് വിഷയത്തിൽ ഇടപെടുകയും ആശുപത്രി അധികൃതരുമായി നേരിട്ട് സംസാരിക്കുകയും ചെയ്തു. കുടുംബത്തിന്റെ സാമ്പത്തിക ബുദ്ധിമുട്ടുകൾ കണക്കിലെടുത്ത് ചികിത്സാച്ചെലവുകൾ പൂർണമായും ഒഴിവാക്കി നൽകാൻ മന്ത്രി നിർദേശം നൽകുകയായിരുന്നു. മന്ത്രിയുടെ കനിവിൽ ആശ്വാസം കണ്ടെത്തിയ അമ്മയും കുഞ്ഞും പൂർണ ആരോഗ്യത്തോടെ ആശുപത്രി വിട്ടു.
