മിഷന് സമുദ്ര: 'കേരളത്തെ സമഗ്ര കപ്പല് നിര്മാണ ഇക്കോസിസ്റ്റമായി മാറ്റുക സര്ക്കാര് ലക്ഷ്യം'; വ്യക്തമാക്കി മുഖ്യമന്ത്രി
തിരുവനന്തപുരം: മിഷന് സമുദ്രയിലൂടെ സര്ക്കാര് ലക്ഷ്യമിടുന്നത് സമഗ്ര കപ്പല് നിര്മാണ ഇക്കോസിസ്റ്റമായി കേരളത്തെ മാറ്റുകയാണെന്ന് സംസ്ഥാന സര്ക്കാര് വാര്ത്താകുറിപ്പില് അറിയിച്ചു. വിവിധ പദ്ധതികളിലൂടെയും നിക്ഷേപകരിലൂടെയും വരും വര്ഷങ്ങളില് സംസ്ഥാനത്തേക്ക് 10,000 കോടിയോളം രൂപയുടെ ആകെ നിക്ഷേപ സാധ്യതയാണ് സര്ക്കാര് ലക്ഷ്യമിടുന്നത്.
മുഖ്യമന്ത്രി വിഡി സതീശന് അടുത്തിടെ ഒരു ടിവി ചാനലിന് നല്കിയ അഭിമുഖത്തെ തുടര്ന്ന് ചില മാധ്യമങ്ങളില് വന്ന തെറ്റായ വാര്ത്തകള്ക്ക് വ്യക്തത നല്കിക്കൊണ്ടാണ് സര്ക്കാര് ഇക്കാര്യം വ്യക്തമാക്കിയത്. വിവിധ പദ്ധതികളിലൂടെയും വിവിധ നിക്ഷേപകരിലൂടെയും വരും വര്ഷങ്ങളില് സംസ്ഥാനത്തേക്ക് ആകര്ഷിക്കാന് സര്ക്കാര് ലക്ഷ്യമിടുന്ന ആകെ നിക്ഷേപത്തിന്റെ വ്യാപ്തിയെയാണ് 10,000 കോടിയോളം രൂപയുടെ നിക്ഷേപ സാധ്യതയെന്ന പരാമര്ശത്തിലൂടെ മുഖ്യമന്ത്രി സൂചിപ്പിച്ചത്. അല്ലാതെ ഏതെങ്കിലും ഒരു സ്ഥാപനവുമായി ഇത്രയും തുകയുടെ ഏക നിക്ഷേപ കരാര് അന്തിമമായി ഉറപ്പിച്ചുവെന്നല്ലെന്നും സര്ക്കാര് വ്യക്തമാക്കി.
മിഷന് സമുദ്രയുടെ ഭാഗമായി പൊതുമേഖലാ സ്ഥാപനമായ മലബാര് സിമന്റ്സ് ലിമിറ്റഡും, ടാറ്റാ പ്രോജക്ട്സ് ഗ്രൂപ്പിന്റെ ഭാഗമായ ആര്ട്സണ് എഞ്ചിനീയറിംഗ് ലിമിറ്റഡും ചേര്ന്ന് കൊച്ചിന് പോര്ട്ടില് കപ്പല് നിര്മാണ യൂണിറ്റ് സ്ഥാപിക്കും. ഇതിനായുള്ള സംയുക്ത സംരംഭത്തിന് സര്ക്കാര് സൗകര്യമൊരുക്കിയിട്ടുണ്ട്. പദ്ധതിക്ക് ആവശ്യമായ പ്രധാന അനുമതികളെല്ലാം ഇതിനകം ലഭിച്ചുകഴിഞ്ഞു. കൊച്ചിന് പോര്ട്ട് അതോറിറ്റി ആവശ്യമായ ഭൂമി ലഭ്യമാക്കുകയും പ്രാഥമിക വികസന പ്രവര്ത്തനങ്ങള് ആരംഭിക്കുകയും ചെയ്തിട്ടുണ്ട്. കേരളത്തില് ആധുനികമായ ഷിപ്പ് ബില്ഡിംഗ് എക്കോസിസ്റ്റം രൂപീകരിക്കുന്നതിനുള്ള സുപ്രധാന ചുവടുവെപ്പായാണ് ഈ പദ്ധതിയെ സര്ക്കാര് കാണുന്നത്.
ലക്ഷ്യം സമഗ്ര സമുദ്ര വികസനം
മിഷന് സമുദ്ര കേവലം ഒരു കപ്പല് നിര്മാണ യൂണിറ്റില് ഒതുങ്ങുന്ന പദ്ധതിയല്ല. വിഴിഞ്ഞം അന്താരാഷ്ട്ര തുറമുഖം, കൊച്ചി തുറമുഖം, കൊച്ചിന് ഷിപ്പ്യാര്ഡ് എന്നിവയുള്പ്പെടെ സംസ്ഥാനത്തെ തീരദേശ മേഖലയെ പൂര്ണ്ണമായി പ്രയോജനപ്പെടുത്തുകയാണ് ലക്ഷ്യം. കപ്പല് നിര്മാണം, കപ്പല് അറ്റകുറ്റപ്പണി, ഓഫ്ഷോര് ഫാബ്രിക്കേഷന്, മറൈന് എഞ്ചിനീയറിംഗ്, തീരദേശ നിര്മ്മാണ യൂണിറ്റുകള്, ലോജിസ്റ്റിക്സ്, മാരിടൈം സേവനങ്ങള് തുടങ്ങി അനുബന്ധ വ്യവസായങ്ങള് ഏകോപിപ്പിച്ചുള്ള സമഗ്ര സമുദ്ര വികസനമാണ് സര്ക്കാര് നടപ്പിലാക്കാന് ഉദ്ദേശിക്കുന്നത്.
ഇതുമായി ബന്ധപ്പെട്ട് രാജ്യത്തിനകത്തും വിദേശത്തുമുള്ള പ്രമുഖ നിക്ഷേപകരുമായുള്ള ചര്ച്ചകള് പുരോഗമിക്കുകയാണ്. ഓരോ നിക്ഷേപ പദ്ധതിയും അന്തിമഘട്ടത്തിലാകുന്ന മുറയ്ക്ക് അത് സംബന്ധിച്ച പ്രഖ്യാപനങ്ങള് ഔദ്യോഗികമായി നടത്തും. കേരളത്തെ രാജ്യത്തെ പ്രമുഖ സമുദ്രാധിഷ്ഠിത സമ്പദ്വ്യവസ്ഥകളിലൊന്നായി ഉയര്ത്താനും അതുവഴി വന്തോതില് തൊഴിലവസരങ്ങളും വ്യവസായ വളര്ച്ചയും സൃഷ്ടിക്കാനുമാണ് സര്ക്കാര് പ്രതിജ്ഞാബദ്ധമെന്നും വാര്ത്താക്കുറിപ്പില് വ്യക്തമാക്കുന്നു
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.