ഡല്‍ഹി: ഇന്ത്യന്‍ ഒളിംപിക് അസോസിയേഷന്‍ തിരഞ്ഞെടുപ്പിന് മുന്നോടിയായുള്ള പി.ടി. ഉഷയുടെ അവസാന നിമിഷത്തെ നാടകീയ നീക്കത്തില്‍ അമ്പരന്ന് എതിര്‍ചേരി. ഐസ് ഹോക്കി അസോസിയേഷന്‍ ഓഫ് ഇന്ത്യയുടെ വനിതാ പ്രതിനിധിയായി ജനറല്‍ അസംബ്ലിയില്‍ ഉഷ ഇടംപിടിച്ചതോടെ തുടര്‍നീക്കങ്ങള്‍ ചര്‍ച്ച ചെയ്യാന്‍ നാഷണല്‍ സ്‌പോര്‍ട്‌സ് ഫെഡറേഷന്‍ പ്രതിനിധികള്‍ ഇന്ന് ഡല്‍ഹിയില്‍ അനൗദ്യോഗിക യോഗം ചേരുമെന്നാണ് സൂചന.
കഴിഞ്ഞ ദിവസം നടന്ന സ്‌പോര്‍ട്‌സ്‌പേഴ്‌സണ്‍സ് ഓഫ് ഔട്ട്സ്റ്റാന്‍ഡിംഗ് മെറിറ്റ് തിരഞ്ഞെടുപ്പില്‍ പരാജയപ്പെടുകയും, അത്ലറ്റിക്‌സ് ഫെഡറേഷന്‍ ഓഫ് ഇന്ത്യയുടെ പ്രതിനിധി പട്ടികയില്‍ നിന്ന് ഒഴിവാക്കപ്പെടുകയും ചെയ്തതോടെ ഉഷയുടെ മുന്നിലെ വഴികള്‍ അടഞ്ഞെന്നായിരുന്നു വിലയിരുത്തല്‍. എന്നാല്‍ ഏതെങ്കിലും ദേശീയ കായിക ഫെഡറേഷന്റെ പ്രതിനിധിയാവുക എന്ന ഏക വഴിയിലൂടെ ഐസ് ഹോക്കി ഫെഡറേഷന്റെ നാമനിര്‍ദേശം നേടി ഉഷ ഈ കടമ്പ മറികടക്കുകയായിരുന്നു.
അതേസമയം, ഉഷ ഇന്നലെ തിരുവനന്തപുരത്തെത്തി ബിജെപി നേതാക്കളുമായി കൂടിക്കാഴ്ച നടത്തിയതായി സൂചനയുണ്ട്. ഇന്ന് അവര്‍ ബംഗളൂരുവിലേക്ക് തിരിക്കും. ഈ മാസം 26-ന് നടക്കുന്ന അന്താരാഷ്ട്ര ഒളിംപിക് കമ്മിറ്റി (IOC) യോഗത്തില്‍, 2036-ലെ ഒളിംപിക് വേദിക്കായുള്ള ഇന്ത്യയുടെ അവതരണത്തില്‍ നിന്ന് ഉഷ പിന്മാറുമോ എന്ന കാര്യത്തിലും കായിക ലോകത്ത് ആകാംക്ഷ നിലനില്‍ക്കുന്നുണ്ട്.
ഐഒഎ തിരഞ്ഞെടുപ്പ്: പി.ടി. ഉഷയുടെ അപ്രതീക്ഷിത നീക്കത്തിൽ അമ്പരന്ന് എതിർചേരി; NSF പ്രതിനിധികൾ ഇന്ന് ഡൽഹിയിൽ യോഗം ചേരും
Jaihind TV News Report
Jaihind TV Web Desk
2 min read
252 reads
