ദളിത് വിഷയങ്ങൾ സംസാരിച്ചതിന് കുരീപ്പുഴ ശ്രീകുമാറിന്റെ പ്രസംഗം തടസ്സപ്പെടുത്തി ബിജെപി നേതാക്കൾ; അവാർഡ് ദാന ചടങ്ങിൽ നാടകീയ രംഗങ്ങൾ

Jaihind TV Web Desk

April 26, 2026

1 min read • Updated: June 04, 2026

ദളിത് വിഷയങ്ങൾ സംസാരിച്ചതിന് കുരീപ്പുഴ ശ്രീകുമാറിന്റെ പ്രസംഗം തടസ്സപ്പെടുത്തി ബിജെപി നേതാക്കൾ; അവാർഡ് ദാന ചടങ്ങിൽ നാടകീയ രംഗങ്ങൾ

നെല്ലിക്കൽ മുരളീധരൻ ഫൗണ്ടേഷന്റെ അവാർഡ് ദാന ചടങ്ങിൽ പ്രസംഗിക്കുന്നതിനിടെ പ്രശസ്ത കവി കുരീപ്പുഴ ശ്രീകുമാറിനെ ബിജെപി നേതാക്കൾ തടഞ്ഞു. ചടങ്ങിൽ അവാർഡ് സ്വീകരിച്ച ശേഷം സംസാരിക്കവേ, സമകാലിക ദളിത് വിഷയങ്ങളെയും സാമൂഹിക സാഹചര്യങ്ങളെയും കുറിച്ച് അദ്ദേഹം നടത്തിയ പരാമർശങ്ങളാണ് പ്രതിഷേധത്തിന് കാരണമായത്. ബിജെപി മുൻ ജില്ലാ പ്രസിഡന്റും മുൻ സംസ്ഥാന ട്രഷററുമായിരുന്ന പ്രതാപചന്ദ്ര വർമ്മയുടെ നേതൃത്വത്തിലുള്ള സംഘമാണ് വേദിക്ക് മുന്നിലെത്തി പ്രതിഷേധിച്ചത്.

കവിയുടെ പ്രസംഗം അലങ്കോലപ്പെടുത്താനുള്ള ശ്രമം ബിജെപി നേതാക്കളുടെ ഭാഗത്തുനിന്നുണ്ടായതോടെ സദസ്സിൽ ബഹളമയമായി. കുരീപ്പുഴ അവതരിപ്പിച്ച ആശയങ്ങളോടുള്ള രാഷ്ട്രീയ വിയോജിപ്പാണ് പരസ്യമായ പ്രതിഷേധത്തിലേക്ക് നീങ്ങിയത്. എന്നാൽ പ്രതിഷേധം ശക്തമായതോടെ സംഘാടകർ അടിയന്തരമായി ഇടപെടുകയും ബഹളം വെച്ച ബിജെപി നേതാക്കളെ ഹാളിൽ നിന്ന് പുറത്താക്കുകയും ചെയ്തു.

നേതാക്കളെ നീക്കം ചെയ്തതിന് ശേഷം കുരീപ്പുഴ ശ്രീകുമാർ തന്റെ പ്രസംഗം തുടരുകയും പൂർത്തിയാക്കുകയും ചെയ്തു. സാംസ്കാരിക വേദിയിൽ കവിക്ക് നേരെയുണ്ടായ ഈ നീക്കത്തിനെതിരെ വലിയ രീതിയിലുള്ള പ്രതിഷേധങ്ങൾ ഉയരുന്നുണ്ട്. അഭിപ്രായ സ്വാതന്ത്ര്യത്തിന് മേലുള്ള കടന്നുകയറ്റമാണ് ഇതെന്നാണ് സാംസ്കാരിക പ്രവർത്തകരുടെ വിലയിരുത്തൽ.