Mobile app available on
Trending
Browse

All sections

Watch
Browse all videos

No business videos available

No Middle East videos available

Popular News

സഹകരണ വേദിയിലെ കയ്യേറ്റവും പി.എം. ശ്രീയിലെ കുറ്റസമ്മതവും; സി.പി.എം ജനങ്ങളോട് മറുപടി പറയണമെന്ന് സണ്ണി ജോസഫ്

സഹകരണ വേദിയിലെ കയ്യേറ്റവും പി.എം. ശ്രീയിലെ കുറ്റസമ്മതവും; സി.പി.എം ജനങ്ങളോട് മറുപടി പറയണമെന്ന് സണ്ണി ജോസഫ്

പയ്യന്നൂർ കണ്ടോത്ത് നടന്ന സഹകരണ വാരാഘോഷ പരിപാടിയിൽ വി. കുഞ്ഞികൃഷ്ണൻ എം.എൽ.എയുടെ പ്രസംഗം തടസ്സപ്പെടുത്തുകയും അദ്ദേഹത്തിന്റെ പേഴ്‌സണൽ അസിസ്റ്റന്റിനെ കയ്യേറ്റം ചെയ്യുകയും ചെയ്ത സംഭവം അങ്ങേയറ്റം അപലപനീയമാണെന്ന് വൈദ്യുതി മന്ത്രി സണ്ണി ജോസഫ് പറഞ്ഞു. ഒരു ജനപ്രതിനിധിക്ക് സ്വന്തം അഭിപ്രായം തുറന്നുപറയാനുള്ള സ്വാതന്ത്ര്യം പോലും നിഷേധിക്കുന്ന ഇത്തരം നടപടികൾ സി.പി.എമ്മിന്റെ ഭയത്തെയും രാഷ്ട്രീയ അസഹിഷ്ണുതയെയുമാണ് തുറന്നുകാട്ടുന്നതെന്ന് അദ്ദേഹം കണ്ണൂരിൽ വ്യക്തമാക്കി.

ശക്തമായ ജനവിധിയിലൂടെ ജനങ്ങൾ തിരിച്ചടി നൽകിയിട്ടും രാഷ്ട്രീയ ഗുണ്ടായിസം ഉപേക്ഷിക്കാൻ സി.പി.എം തയ്യാറാകാത്തത് ഏറെ പരിതാപകരമാണെന്ന് സണ്ണി ജോസഫ് ചൂണ്ടിക്കാട്ടി. ജനാധിപത്യപരമായ വിയോജിപ്പുകളെ കായികമായി നേരിടുന്നത് ജനാധിപത്യ വ്യവസ്ഥിതിയോടുള്ള വെല്ലുവിളിയാണ്. സഹകരണ വേദിയിൽ അക്രമം അഴിച്ചുവിട്ട കുറ്റക്കാർക്കെതിരെ കർശനമായ നിയമനടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.

പി.എം. ശ്രീ പദ്ധതിയിൽ ഇടതുപക്ഷ സർക്കാർ ഒപ്പിട്ടത് ശരിയായില്ലെന്നും അത് അബദ്ധത്തിൽ സംഭവിച്ചുപോയതാണെന്നുമുള്ള എൽ.ഡി.എഫ് കൺവീനർ ടി.പി. രാമകൃഷ്ണന്റെ പ്രസ്താവന ജനങ്ങളോടുള്ള ഉത്തരവാദിത്തത്തിൽ നിന്നുള്ള ഒളിച്ചോട്ടമാണെന്ന് സണ്ണി ജോസഫ് കുറ്റപ്പെടുത്തി. ഒരു സംസ്ഥാനത്തിന്റെ വിദ്യാഭ്യാസ നയത്തെയും വരുംതലമുറയുടെ ഭാവിയെയും നേരിട്ട് ബാധിക്കുന്ന ഇത്രയും സുപ്രധാനമായൊരു വിഷയത്തിൽ അബദ്ധത്തിൽ ഒപ്പിട്ടുപോയെന്ന് പറയുന്നത് ഗുരുതരമായ ഭരണവീഴ്ചയുടെ കുറ്റസമ്മതമാണ്.

ആർ.എസ്.എസിന്റെ അജണ്ടയ്ക്ക് വഴങ്ങി, എൽ.ഡി.എഫിലെ ഘടകകക്ഷികളെപ്പോലും ഇരുട്ടിൽ നിർത്തിയാണ് അന്നത്തെ സി.പി.എം സർക്കാർ സംസ്ഥാനത്തെ പി.എം. ശ്രീ പദ്ധതിയുടെ ഭാഗമാക്കിയതെന്ന് മന്ത്രി ആരോപിച്ചു. രാഷ്ട്രീയ വിലപേശലിനുവേണ്ടി സ്വീകരിച്ച ഈ നിലപാട് സി.പി.എമ്മിന്റെ ഇരട്ടത്താപ്പാണ് വെളിവാക്കിയത്. ഇതിന് കേരള ജനത നൽകിയ ശക്തമായ താക്കീതിന്റെ ജാള്യത മറയ്ക്കാനാണ് ഇപ്പോൾ 'അബദ്ധം' എന്ന വിശദീകരണവുമായി നേതൃത്വം രംഗത്തെത്തുന്നതെന്നും അദ്ദേഹം പരിഹസിച്ചു.

വിദ്യാഭ്യാസ നയത്തിൽ ഗുരുതരമായ അബദ്ധം പറ്റിയെന്ന് സമ്മതിക്കുന്നവർക്ക് ജനാധിപത്യപരമായ വിമർശനങ്ങൾ കേൾക്കാനുള്ള സഹിഷ്ണുത പോലുമില്ലെന്നാണ് പയ്യന്നൂരിലെ സംഭവങ്ങൾ വ്യക്തമാക്കുന്നത്. തെറ്റുകൾ ചൂണ്ടിക്കാണിക്കുന്നവരെ നിശ്ശബ്ദരാക്കിയും എതിർസ്വരങ്ങളെ കായികമായി നേരിട്ടും മുന്നോട്ടുപോകാമെന്ന സി.പി.എമ്മിന്റെ കണക്കുകൂട്ടൽ കേരളത്തിൽ ഇനി വിലപ്പോവില്ലെന്ന് അദ്ദേഹം ഓർമ്മിപ്പിച്ചു.

വിദ്യാഭ്യാസ നയത്തിലുണ്ടായ ഗുരുതരമായ വീഴ്ചയ്ക്കും സഹകരണ വേദിയിലെ കയ്യേറ്റത്തിനും സി.പി.എം നേതൃത്വം പൊതുസമൂഹത്തോട് മറുപടി പറഞ്ഞേ തീരൂ എന്ന് സണ്ണി ജോസഫ് ആവശ്യപ്പെട്ടു. രാഷ്ട്രീയ അസഹിഷ്ണുത കൊണ്ട് ജനാധിപത്യ ശബ്ദങ്ങളെ എന്നെന്നേക്കുമായി നിശ്ശബ്ദമാക്കാൻ അനുവദിക്കില്ലെന്നും അദ്ദേഹം വ്യക്തമാക്കി.

Related articles

See all
Popular News

മാളിക്കടവ് ഗവ. ഐ.ടി.ഐയിൽ സംഘർഷം; കെ.എസ്.യു സംസ്ഥാന കമ്മിറ്റി അംഗം എ.കെ. ജാനിബിന് നേരെ എസ്....

Popular News

എസ്എഫ്ഐ പ്രതിഷേധങ്ങള്‍ ജനാധിപത്യ മര്യാദകള്‍ക്ക് നിരക്കുന്നതല്ല; എസ്എഫ്ഐക്കെതിരെ പ്രമേയം പാ...

Popular News

CPM പ്രവര്‍ത്തകന്‍ സി.വി. ധനരാജ് വധക്കേസ്: വിധി ഈ മാസം 23 ന്; 20 ആര്‍എസ്എസ്–ബിജെപി പ്രവർത്...

Popular News

യാത്രക്കാര്‍ക്ക് ആശ്വാസം: സീറ്റ് തർക്കങ്ങൾക്കും അമിത നിരക്കിനും പരിഹാരം; RAC സംവിധാനം നിർത...

Save your stories

Sign in