ബംഗ്ലാദേശിന്റെ പുതിയ പ്രസിഡന്റായി മിര്സ ഫഖ്റുല് ഇസ്ലാം ആലംഗീര് തെരഞ്ഞെടുക്കപ്പെട്ടു
ധാക്ക: ബംഗ്ലാദേശ് നാഷണലിസ്റ്റ് പാര്ട്ടി മുതിര്ന്ന നേതാവായ മിര്സ ഫഖ്റുല് ഇസ്ലാം ആലംഗീറിനെ (78) ബംഗ്ലാദേശിന്റെ 23-ാമത് പ്രസിഡന്റായി പാര്ലമെന്റ് തെരഞ്ഞെടുത്തു. 35 വര്ഷങ്ങള്ക്ക് ശേഷം രാജ്യത്ത് നടന്ന മത്സരസ്വഭാവമുള്ള ആദ്യത്തെ പ്രസിഡന്റ് തെരഞ്ഞെടുപ്പാണിത്. 11 കക്ഷികളുള്ള പ്രതിപക്ഷ മുന്നണിയുടെ സ്ഥാനാര്ത്ഥിയും റിട്ടയേര്ഡ് ആര്മി കേണലുമായ ഒലി അഹമ്മദിനെ തോല്പ്പിച്ചാണ് അദ്ദേഹം വിജയിച്ചത്.
ചീഫ് ഇലക്ഷന് കമ്മീഷണര് എ.എം.എം നസീര് ഉദ്ദീന് പ്രഖ്യാപിച്ച ഫലമനുസരിച്ച്, വിജയിച്ച ആലംഗീറിന് 255 വോട്ടുകളും എതിര്സ്ഥാനാര്ത്ഥിയായ ഒലി അഹമ്മദിന് 88 വോട്ടുകളും ലഭിച്ചു. മുന് പ്രസിഡന്റ് മുഹമ്മദ് സഹാബുദ്ദീന് ആരോഗ്യകാരണങ്ങളാല് രാജിവെച്ചതിനെ തുടര്ന്നാണ് പുതിയ തെരഞ്ഞെടുപ്പ് വേണ്ടിവന്നത്. 1990-കളുടെ തുടക്കത്തില് ബി.എന്.പിയില് ചേര്ന്ന ആലംഗീര്, 2016 മുതല് പാര്ട്ടിയുടെ സെക്രട്ടറി ജനറലായി പ്രവര്ത്തിച്ചുവരികയായിരുന്നു.
ധാക്ക സര്വകലാശാലയില് നിന്ന് സാമ്പത്തിക ശാസ്ത്രത്തില് ബിരുദം നേടിയ ശേഷം അധ്യാപകനായി കരിയര് ആരംഭിച്ച അദ്ദേഹം, പിന്നീട് സജീവ രാഷ്ട്രീയത്തിലേക്ക് എത്തുകയായിരുന്നു. ഷെയ്ഖ് ഹസീനയുടെ ഭരണകാലത്ത് പ്രതിപക്ഷ നിരയിലെ പ്രമുഖ ശബ്ദമായിരുന്ന ഇദ്ദേഹം നിരവധി കേസുകളും അറസ്റ്റുകളും നേരിട്ടിട്ടുണ്ട്. ഇന്ത്യ ബംഗ്ലാദേശിന്റെ വലിയ അയല്ക്കാരനും സുഹൃത്തുമാണെന്നും, ബംഗ്ലാദേശിന്റെ പരമാധികാരത്തെയും ജനാധിപത്യപരമായ ആഗ്രഹങ്ങളെയും ഇന്ത്യ മാനിക്കണമെന്നും ആലംഗീര് മുന്പ് വ്യക്തമാക്കിയിട്ടുണ്ട്.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.