തിരുവനന്തപുരം: ജപ്പാനിൽ നടക്കാനിരിക്കുന്ന ഇരുപതാമത് ഏഷ്യൻ ഗെയിംസിൽ മെഡൽ നേടുന്ന മലയാളി കായികതാരങ്ങൾക്കുള്ള സംസ്ഥാന സർക്കാരിന്റെ പാരിതോഷികം പ്രഖ്യാപിച്ചു. ഏഷ്യൻ ഗെയിംസിൽ സ്വർണം നേടുന്ന മലയാളി താരങ്ങൾക്ക് 50 ലക്ഷം രൂപയാണ് പാരിതോഷികമായി നൽകുക. വെള്ളി മെഡൽ നേടുന്നവർക്ക് 30 ലക്ഷം രൂപയും വെങ്കലം നേടുന്നവർക്ക് 20 ലക്ഷം രൂപയും ലഭിക്കും. കായികമന്ത്രി ഒ.ജെ. ജനീഷാണ് വാർത്താസമ്മേളനത്തിൽ ഇക്കാര്യം അറിയിച്ചത്.
ഗെയിംസിൽ പങ്കെടുക്കുന്ന മുഴുവൻ കായികതാരങ്ങൾക്കും ഒരു ലക്ഷം രൂപ വീതം മുൻകൂറായി നൽകുമെന്നും മന്ത്രി പറഞ്ഞു. താരങ്ങൾക്ക് പുറമെ മികച്ച പരിശീലനം നൽകിയ പരിശീലകർക്കും സാമ്പത്തിക സഹായം നൽകും. സ്വർണം നേടുന്ന താരങ്ങളുടെ പരിശീലകർക്ക് അഞ്ച് ലക്ഷം രൂപയും വെള്ളി നേടുന്നവരുടെ പരിശീലകർക്ക് മൂന്ന് ലക്ഷം രൂപയും വെങ്കല മെഡൽ വിജയികളുടെ പരിശീലകർക്ക് രണ്ട് ലക്ഷം രൂപ വീതവും നൽകാനാണ് തീരുമാനം.
ജപ്പാനിലെ അയ്ച്ചി-നഗോയയിൽ സെപ്റ്റംബർ 19 മുതൽ ഒക്‌ടോബർ നാല് വരെയാണ് ഇത്തവണത്തെ ഏഷ്യൻ ഗെയിംസ് അരങ്ങേറുന്നത്. 1958-ൽ ടോക്യോയിലും 1994-ൽ ഹിരോഷിമയിലും നടന്നതിന് ശേഷം ഇത് മൂന്നാം തവണയാണ് ജപ്പാൻ ഏഷ്യൻ ഗെയിംസിന് വേദിയാകുന്നത്. 45 രാജ്യങ്ങളിൽ നിന്നുള്ള കായികതാരങ്ങൾ 43 ഇനങ്ങളിലായി 469 വിഭാഗങ്ങളിൽ മാറ്റുരയ്ക്കും. 'തീജ്ജ്വാല' എന്നർഥം വരുന്ന 'ഹൊനോഹോനോ'യാണ് ഇത്തവണത്തെ ഭാഗ്യചിഹ്നം. പാഡെൽ, തെക്‌ബോൾ എന്നീ പുതിയ കായിക ഇനങ്ങളും ഇത്തവണ ഗെയിംസിൽ ഉൾപ്പെടുത്തിയിട്ടുണ്ട്.
