മസ്‌കറ്റ്: അണ്ടര്‍ 19 ഏഷ്യാ കപ്പ് ഫൈനലില്‍ പാകിസ്ഥാനെ ഒരു വിക്കറ്റിന് തകര്‍ത്ത് ഇന്ത്യ കിരീടം ചൂടി. ആവേശം അവസാന പന്തുവരെ നീണ്ട കലാശപ്പോരാട്ടത്തില്‍ പാകിസ്ഥാന്‍ ഉയര്‍ത്തിയ 338 റണ്‍സ് വിജയലക്ഷ്യം ഇന്ത്യ മറികടക്കുകയായിരുന്നു. അവസാന പന്ത് ബൗണ്ടറി കടത്തിയാണ് ഇന്ത്യ അവിശ്വസനീയ ജയം സ്വന്തമാക്കിയത്. കഴിഞ്ഞ ഏഷ്യാ കപ്പില്‍ ഇന്ത്യയെ തോല്‍പ്പിച്ച് കിരീടം നേടിയ പാകിസ്ഥാനോടുള്ള മധുരപ്രതികാരം കൂടിയായി ഈ വിജയം. ഇന്ത്യയുടെ ഒന്‍പതാം അണ്ടര്‍ 19 ഏഷ്യാ കപ്പ് കിരീടമാണിത്. പാകിസ്ഥാന്‍ 50 ഓവറില്‍ 337-8 ഉം ഇന്ത്യ 50 ഓവറില്‍ 339-9 സ്‌കോറും നേടി.
ഒരു വിക്കറ്റ് മാത്രം കൈയിലിരിക്കെ അവസാന ഓവറില്‍ 8 റണ്‍സായിരുന്നു ഇന്ത്യക്ക് ജയിക്കാന്‍ വേണ്ടിയിരുന്നത്. ലെഗ് സ്പിന്നര്‍ അഹമ്മദ് ഹുസൈന്‍ എറിഞ്ഞ ആദ്യ അഞ്ച് പന്തുകളില്‍ 5 റണ്‍സ് മാത്രം നേടിയതോടെ അവസാന പന്തില്‍ ലക്ഷ്യം മൂന്ന് റണ്‍സായി. പത്താമനായി ക്രീസിലെത്തി വീരോചിത പോരാട്ടം കാഴ്ചവെച്ച മോഹിത് ഉല്‍വ അവസാന പന്ത് ബൗണ്ടറി കടത്തി ഇന്ത്യക്ക് ചരിത്ര വിജയം സമ്മാനിച്ചു.
26 പന്തില്‍ 5 ഫോറും 3 സിക്സും സഹിതം 41 റണ്‍സെടുത്ത മോഹിത് ഉല്‍വയും, അവസാന ബാറ്ററായി ക്രീസിലെത്തി 8 പന്തില്‍ 11 റണ്‍സുമായി പുറത്താകാതെ നിന്ന വെങ്കടയും ഇന്ത്യന്‍ ജയത്തില്‍ നിര്‍ണായക പങ്കുവഹിച്ചു. ഒമ്പതാം വിക്കറ്റില്‍ മണാല്‍ ചൗഹാനൊപ്പം (32 പന്തില്‍ 47) 57 റണ്‍സ് കൂട്ടിച്ചേര്‍ത്ത മോഹിത്, അവസാന വിക്കറ്റില്‍ വെങ്കടിനൊപ്പം 16 പന്തില്‍ 30 റണ്‍സ് അടിച്ചെടുത്താണ് ഇന്ത്യയെ വിജയത്തിലേക്ക് നയിച്ചത്.
നേരത്തെ, ക്യാപ്റ്റന്‍ ലക്ഷ്യ രാജേഷ് (80), ആര്യവീര്‍ സെവാഗ് (58) എന്നിവരുടെ അര്‍ധസെഞ്ചുറികളുടെ കരുത്തില്‍ മികച്ച തുടക്കമാണ് ഇന്ത്യക്ക് ലഭിച്ചതെങ്കിലും മധ്യഓവറുകളില്‍ തകര്‍ച്ച നേരിട്ടു. 42-ാം ഓവറില്‍ 252-8 എന്ന നിലയിലായിരുന്ന ഇന്ത്യ തോല്‍വി ഉറപ്പിച്ചതായിരുന്നു. എന്നാല്‍ താഴത്തെ നിരയുടെ ചെറുത്തുനില്‍പ്പ് ടീമിനെ തുണച്ചു.
ടോസ് നേടി ബാറ്റിംഗ് തിരഞ്ഞെടുത്ത പാകിസ്ഥാന്‍, ഉസ്മാന്‍ ഖാന്റെ സെഞ്ചുറിയുടെയും (107) അബ്ദുള്‍ ഖാദിര്‍ (80), ഫര്‍ഹാന്‍ യൂസഫ് (63) എന്നിവരുടെ അര്‍ധസെഞ്ചുറികളുടെയും കരുത്തിലാണ് 50 ഓവറില്‍ 8 വിക്കറ്റ് നഷ്ടത്തില്‍ 337 റണ്‍സെടുത്തത്. ഇന്ത്യക്കായി കാവ് പട്ടേല്‍ നാലു വിക്കറ്റും ചിഗുരപതി വെങ്കട മൂന്ന് വിക്കറ്റും വീഴ്ത്തി.
ത്രില്ലർ പോരാട്ടം, ആവേശവിജയം; പാകിസ്താനെ അവസാന പന്തിൽ വീഴ്ത്തി അണ്ടർ 19 ഏഷ്യാ കപ്പ് കിരീടം ചൂടി ഇന്ത്യ
Jaihind TV News Report
Jaihind TV Web Desk
3 min read
441 reads
