ന്യൂസിലന്‍ഡിനെതിരായ നാലാം ഏകദിനത്തില്‍ ഇന്ത്യക്ക് ദയനീയ തോല്‍വി. കിവീസ് ഉയര്‍ത്തിയ 334 റണ്‍സ് വിജയലക്ഷ്യം പിന്തുടര്‍ന്ന് ബാറ്റിങ്ങിനിറങ്ങിയ ഇന്ത്യ 26 ഓവറില്‍ വെറും 89 റണ്‍സിന് പുറത്തായി. നൂറു റണ്‍സ് കടക്കാന്‍ പോലും സാധിക്കാതെ ഇന്ത്യന്‍ ബാറ്റിംഗ് നിര ഒന്നടങ്കം തകര്‍ന്നടിയുന്ന കാഴ്ചയാണ് മത്സരത്തില്‍ കണ്ടത്.
ആറ് വിക്കറ്റ് വീഴ്ത്തിയ മാറ്റ് ഹെൻ‌റിയാണ് ഇന്ത്യന്‍ ബാറ്റിംഗ് നിരയുടെ നട്ടെല്ലൊടിച്ചത്. രോഹിത് ശര്‍മ്മ, വിരാട് കോലി, ശ്രേയസ് അയ്യര്‍, ഇഷാന്‍ കിഷന്‍, കുല്‍ദീപ് യാദവ്, ഗുര്‍നൂര്‍ ബ്രാര്‍ എന്നിവരുടെ വിക്കറ്റുകളാണ് ഹെന്റി പിടികൂടിയത്. മത്സരത്തിലെ ആദ്യ ഓവര്‍ മെയ്ഡനാക്കിയ ഹെന്റി, ആ ഓവറില്‍ തന്നെ രോഹിത്, വിരാട്, ശ്രേയസ് എന്നിവരെ പൂജ്യത്തിന് പുറത്താക്കി ഇന്ത്യയെ പ്രതിരോധത്തിലാക്കി. ഹെന്റിക്ക് പുറമെ മാത്യു ഫിഷര്‍ മൂന്ന് വിക്കറ്റുകളും സ്വന്തമാക്കി. അക്ഷര്‍ പട്ടേല്‍, നമന്‍ ധിര്‍, അക്വിബ് നബി എന്നിവരെയാണ് ഫിഷര്‍ പുറത്താക്കിയത്. ഇന്ത്യന്‍ നിരയില്‍ ഇഷാന്‍ കിഷന്‍, അക്ഷര്‍ പട്ടേല്‍, നമന്‍ ധിര്‍ എന്നിവര്‍ക്ക് മാത്രമാണ് രണ്ടക്കം കടക്കാനായത്. ബാറ്റിംഗ് നിര പൂര്‍ണ്ണ പരാജയമായതോടെ ടീം വലിയ തകര്‍ച്ചയെ നേരിടുകയായിരുന്നു.
ആദ്യം ബാറ്റ് ചെയ്ത ന്യൂസിലന്‍ഡ്, സെഞ്ച്വറി നേടിയ വില്‍ യങ്ങിന്റെ കരുത്തിലാണ് മികച്ച സ്‌കോര്‍ പടുത്തുയര്‍ത്തിയത്. ഇന്ത്യന്‍ ബൗളിംഗില്‍ ഗുര്‍നൂര്‍ ബ്രാര്‍, അക്ഷര്‍ പട്ടേല്‍, അക്വിബ് നബി എന്നിവര്‍ രണ്ട് വിക്കറ്റ് വീതം വീഴ്ത്തിയപ്പോള്‍, അര്‍ഷ്ദീപ് സിംഗും നമന്‍ ധിറും ഓരോ വിക്കറ്റ് വീതം നേടി.
ഈ തോല്‍വിയോടെ പരമ്പര വിജയം അഞ്ചാം മത്സരത്തിലേക്ക് നീണ്ടിരിക്കുകയാണ്. ആദ്യ രണ്ട് മത്സരങ്ങള്‍ ഇന്ത്യ വിജയിച്ചിരുന്നുവെങ്കിലും മൂന്നാം മത്സരം മഴ മൂലം ഉപേക്ഷിച്ചിരുന്നു. നിലവില്‍ പരമ്പരയില്‍ മുന്നിലുള്ള ഇന്ത്യക്ക്, അടുത്ത മത്സരം ജയിച്ചാല്‍ മാത്രമേ പരമ്പര സ്വന്തമാക്കാന്‍ സാധിക്കൂ. അഞ്ചാം ഏകദിനം ന്യൂസിലന്‍ഡ് വിജയിച്ചാല്‍ പരമ്പര സമനിലയില്‍ അവസാനിക്കും.
മാറ്റ് ഹെൻ‌റിയുടെ തകര്‍പ്പന്‍ ബൗളിംഗ്; ന്യൂസിലന്‍ഡിനെതിരായ നാലാം ഏകദിനത്തില്‍ ഇന്ത്യക്ക് നാണംകെട്ട തോല്‍വി; 89 റണ്‍സിന് പുറത്ത്
Jaihind TV News Report
Jaihind TV Web Desk
2 min read
183 reads
