ന്യൂഡല്‍ഹി: ഇന്ത്യന്‍ ഒളിമ്പിക് അസോസിയേഷന്‍ തിരഞ്ഞെടുപ്പില്‍ പി.ടി ഉഷയ്ക്ക് വലിയ ആശ്വാസം. ഐസ് ഹോക്കി ഫെഡറേഷന്റെ പ്രതിനിധിയായുള്ള ഉഷയുടെ നാമനിര്‍ദ്ദേശത്തിന് വരണാധികാരി അംഗീകാരം നല്‍കി. ഉഷയുടെ പ്രാതിനിധ്യത്തിനെതിരെ ഉയര്‍ന്ന പരാതികളെല്ലാം വരണാധികാരി തള്ളിക്കളഞ്ഞു.
നേരത്തെ 'സ്‌പോര്‍ട്‌സ് പേഴ്‌സണ്‍സ് ഓഫ് ഔട്ട്സ്റ്റാന്‍ഡിങ് മെറിറ്റ്' വിഭാഗത്തില്‍ നടന്ന തിരഞ്ഞെടുപ്പില്‍ പരാജയപ്പെട്ടതോടെയാണ്, കായിക സംഘടനാ പ്രതിനിധി എന്ന നിലയില്‍ ഐ.ഒ.എ ജനറല്‍ അസംബ്ലിയില്‍ എത്താന്‍ പി.ടി ഉഷ അപ്രതീക്ഷിത നീക്കം നടത്തിയത്. പ്രാതിനിധ്യത്തിന് അംഗീകാരം ലഭിച്ച സാഹചര്യത്തില്‍ പി.ടി ഉഷ വീണ്ടും അധ്യക്ഷ സ്ഥാനത്തേക്ക് മത്സരിക്കുമോ എന്നാണ് കായികലോകം ഉറ്റുനോക്കുന്നത്. ഡിസംബര്‍ അഞ്ചിനാണ് ഐ.ഒ.എ തിരഞ്ഞെടുപ്പ് നടക്കുന്നത്; നവംബര്‍ 22-നാണ് നാമനിര്‍ദ്ദേശ പത്രിക സമര്‍പ്പിക്കേണ്ട അവസാന തീയതി.
മുന്‍ അത്ലറ്റ് എന്ന നിലയില്‍ ഇന്ത്യന്‍ അത്ലറ്റിക് ഫെഡറേഷന് (എ.എഫ്.ഐ) ഉഷയെ നാമനിര്‍ദ്ദേശം ചെയ്യാമായിരുന്നു. എന്നാല്‍, വനിതാ പ്രതിനിധിയായി ബംഗാളി താരം ജ്യോതിര്‍മയി സിക്തറിനെയാണ് എ.എഫ്.ഐ ഉള്‍പ്പെടുത്തിയത്. ഇതോടെ ഉഷയുടെ വഴിയടഞ്ഞെന്ന് കരുതിയിരിക്കവെയാണ് ഐസ് ഹോക്കി ഫെഡറേഷന്റെ വനിതാ പ്രതിനിധിയായി ഉഷ അപ്രതീക്ഷിതമായി സ്ഥാനം പിടിച്ചത്. 2030-ലെ കോമണ്‍വെല്‍ത്ത് ഗെയിംസ് ഇന്ത്യയിലേക്ക് എത്തിക്കുന്നതില്‍ ഐ.ഒ.എ പ്രസിഡന്റ് എന്ന നിലയില്‍ പി.ടി ഉഷ നിര്‍ണ്ണായക പങ്കുവഹിച്ചിരുന്നു.
ഐ.ഒ.എ തിരഞ്ഞെടുപ്പിൽ പി.ടി ഉഷയ്ക്ക് ആശ്വാസം; ഐസ് ഹോക്കി ഫെഡറേഷൻ പ്രാതിനിധ്യത്തിന് അംഗീകാരം, പരാതികൾ തള്ളി വരണാധികാരി
Jaihind TV News Report
Jaihind TV Web Desk
2 min read
328 reads
