തിരുവനന്തപുരം: വിഴിഞ്ഞം അന്താരാഷ്ട്ര തുറമുഖം വഴിയുള്ള കയറ്റുമതി-ഇറക്കുമതി (EXIM) വ്യാപാരം കൂടുതൽ കാര്യക്ഷമമാക്കുന്നതിനും വ്യാപാര-ലോജിസ്റ്റിക്സ് മേഖലകളിലെ പുതിയ സാധ്യതകൾ പ്രയോജനപ്പെടുത്തുന്നതിനുമായി പ്രത്യേക ട്രേഡ് ഫെസിലിറ്റേഷൻ യോഗം സംഘടിപ്പിക്കുന്നു. വിഴിഞ്ഞം അന്താരാഷ്ട്ര തുറമുഖ ലിമിറ്റഡും (VISL) ട്രിവാൻഡ്രം ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയും സംയുക്തമായാണ് ഈ സംഗമത്തിന് വേദിയൊരുക്കുന്നത്.
ഇന്ന് വൈകിട്ട് 3 മുതൽ 5 വരെ തിരുവനന്തപുരം മാസ്കറ്റ് ഹോട്ടലിലെ സിംഫണി ഹാളിലാണ് യോഗം നടക്കുക. തുറമുഖം വഴിയുള്ള ചരക്കുനീക്കം സുഗമമാക്കുന്നതിനും വ്യാപാരികളുടെ സംശയങ്ങൾ ദൂരീകരിക്കുന്നതിനും ഈ കൂട്ടായ്മ ലക്ഷ്യമിടുന്നു.
ബ്യൂറോ ഓഫ് ഇമിഗ്രേഷൻ, ഇന്ത്യൻ കസ്റ്റംസ്, അദാനി വിഴിഞ്ഞം പോർട്ട് പ്രൈവറ്റ് ലിമിറ്റഡ് എന്നിവയ്ക്കൊപ്പം വിവിധ സർക്കാർ ഏജൻസികളും യോഗത്തിന്റെ ഭാഗമാകും. കൂടാതെ എം.എസ്.സി (MSC), മെർസ്ക് (Maersk) തുടങ്ങിയ ആഗോള ഷിപ്പിംഗ് കമ്പനികൾ, കയറ്റുമതി-ഇറക്കുമതി വ്യാപാരികൾ, ലോജിസ്റ്റിക്സ് സേവനദാതാക്കൾ, വിവിധ വ്യാപാര സംഘടനകൾ എന്നിവരുടെ പ്രതിനിധികളും യോഗത്തിൽ പങ്കെടുക്കും.
വിഴിഞ്ഞം തുറമുഖം വഴിയുള്ള വ്യാപാരം കാര്യക്ഷമമാക്കാൻ ട്രേഡ് ഫെസിലിറ്റേഷൻ യോഗം ഇന്ന് തിരുവനന്തപുരത്ത്