ന്യൂയോർക്ക്: ആഗോളതലത്തിൽ ആപ്പിളിന്റെ പ്രധാന ഡിജിറ്റൽ സേവനങ്ങൾ നിലച്ചു. ഐക്ലൗഡ്, ആപ്പ് സ്റ്റോർ, ആപ്പിൾ പേ തുടങ്ങിയവയുടെ പ്രവർത്തനം തടസ്സപ്പെട്ടതോടെ ആയിരക്കണക്കിന് ഉപയോക്താക്കൾ ദുരിതത്തിലായതായി ഡൗൺഡിറ്റക്ടർ റിപ്പോർട്ട് ചെയ്യുന്നു. ഉപകരണങ്ങളിൽ നിന്ന് അപ്രതീക്ഷിതമായി ഐക്ലൗഡ് അക്കൗണ്ടുകൾ ലോഗ് ഔട്ട് ആയതായും, പിന്നീട് ലോഗിൻ ചെയ്യാൻ സാധിച്ചില്ലെന്നും ഉപയോക്താക്കൾ വ്യാപകമായി പരാതിപ്പെട്ടു.
സംഭവത്തിന് പിന്നിൽ സൈബർ ആക്രമണമല്ലെന്ന് ആപ്പിൾ വക്താവ് ബ്ലൂംബെർഗിനോട് വ്യക്തമാക്കി. ആഭ്യന്തര സംവിധാനങ്ങളിൽ വരുത്തിയ ഒരു അപ്ഡേറ്റാണ് ഈ വ്യാപക തകരാറിലേക്ക് നയിച്ചതെന്ന് കമ്പനി ഔദ്യോഗിക പ്രസ്താവനയിൽ അറിയിച്ചു. തകരാർ പരിഹരിക്കാനുള്ള തീവ്രശ്രമങ്ങൾക്കൊടുവിൽ ഭൂരിഭാഗം സേവനങ്ങളും ഇതിനോടകം പുനഃസ്ഥാപിച്ചിട്ടുണ്ട്. ബാക്കിയുള്ളവയും ഉടൻ തന്നെ സാധാരണ നിലയിലാകുമെന്ന് ആപ്പിൾ ഉറപ്പുനൽകി.
സേവനങ്ങൾ തടസ്സപ്പെട്ട് ഉപയോക്താക്കൾ വലയുമ്പോഴും, ആപ്പിളിന്റെ ഔദ്യോഗിക സിസ്റ്റം സ്റ്റാറ്റസ് പേജിൽ എല്ലാം സാധാരണ നിലയിലാണെന്നാണ് കാണിച്ചിരുന്നത്. തുടക്കത്തിൽ പ്രതികരിക്കാൻ മടിച്ച കമ്പനി ഏറെ വൈകിയാണ് ഔദ്യോഗിക വിശദീകരണം നൽകിയത്. ഇത് ഉപയോക്താക്കൾക്കിടയിൽ വലിയ ആശയക്കുഴപ്പത്തിനും അതൃപ്തിക്കും ഇടയാക്കി.
ദിവസങ്ങൾക്ക് മുമ്പ് മൈക്രോസോഫ്റ്റ് സേവനങ്ങൾ ആഗോളതലത്തിൽ തടസ്സപ്പെട്ടതിന് തൊട്ടുപിന്നാലെയാണ് ആപ്പിളിലും സമാനമായ പ്രതിസന്ധി ഉണ്ടായിരിക്കുന്നത്. ഡാറ്റാ സെന്ററുകളിലെ സാങ്കേതിക തകരാർ മൂലം ഔട്ട്ലുക്ക്, ടീംസ്, കോപൈലറ്റ് തുടങ്ങിയ മൈക്രോസോഫ്റ്റ് സേവനങ്ങൾ മണിക്കൂറുകളോളം സ്തംഭിച്ചിരുന്നു. അമേരിക്കയിലെ പ്രമുഖ ടെക് കമ്പനികളിലും സർക്കാർ സംവിധാനങ്ങളിലും തുടർച്ചയായി ഉണ്ടാകുന്ന ഇത്തരം സാങ്കേതിക തകരാറുകൾ വലിയ ആശങ്കയാണ് ഉയർത്തുന്നത്.
കഴിഞ്ഞ വെള്ളിയാഴ്ച അമേരിക്കയിൽ വിമാന സർവീസുകൾ നാല് മണിക്കൂറിലേറെ തടസ്സപ്പെട്ട സംഭവത്തെയും പലരും ഈ സാങ്കേതിക പ്രശ്നങ്ങളുമായി ചേർത്തുവായിക്കുന്നുണ്ട്. ഫെഡറൽ ഏവിയേഷൻ അഡ്മിനിസ്ട്രേഷന്റെ (എഫ്എഎ) എയർ ട്രാഫിക് കൺട്രോൾ സംവിധാനത്തിലെ ഉപകരണങ്ങൾ തകരാറിലായതിനെത്തുടർന്നാണ് അന്ന് വിമാനങ്ങൾ നിലത്തിറക്കേണ്ടി വന്നത്. രാജ്യത്തെ നിർണ്ണായക ഡിജിറ്റൽ സംവിധാനങ്ങളുടെ സുരക്ഷയും വിശ്വാസ്യതയും സംബന്ധിച്ച ആശങ്കകൾ ഇത്തരം സംഭവങ്ങൾ വർധിപ്പിക്കുകയാണ്.
ആപ്പിൾ സേവനങ്ങളിൽ വ്യാപക തടസ്സം: കാരണം ആഭ്യന്തര അപ്ഡേറ്റെന്ന് വിശദീകരണം