മെറ്റയുടെ റേ-ബാൻ സ്മാർട് ഗ്ലാസുകൾക്ക് കടുത്ത വെല്ലുവിളി ഉയർത്തിക്കൊണ്ട് ആപ്പിളും സ്മാർട് ഗ്ലാസ് വിപണിയിലേക്ക് ചുവടുവെക്കുന്നു. സ്വന്തമായി സ്മാർട് ഗ്ലാസുകൾ വികസിപ്പിക്കുന്നതിനുള്ള പ്രവർത്തനങ്ങൾ കമ്പനി അന്തിമഘട്ടത്തിലാണ്. സിരി എഐയുടെ കരുത്തായിരിക്കും ഈ പുതിയ ഗ്ലാസിന്റെ ഏറ്റവും പ്രധാനപ്പെട്ട പ്രത്യേകത. ബ്ലൂംബെർഗിന്റെ റിപ്പോർട്ട് പ്രകാരം, എൻ50 എന്ന് കോഡ് നാമമുള്ള ഈ സ്മാർട് ഗ്ലാസിൽ ക്യാമറകൾ, മൈക്രോഫോണുകൾ, സ്പീക്കറുകൾ എന്നിവ ഉൾപ്പെടുത്തുമെന്നാണ് പ്രതീക്ഷിക്കുന്നത്. വിപണിയിലുള്ള മറ്റ് സ്മാർട് ഗ്ലാസുകൾക്ക് സമാനമായ രൂപകല്പനയായിരിക്കും ഇതിനുണ്ടാവുക. ആദ്യ മോഡലിൽ ഓഗ്മെന്റഡ് റിയാലിറ്റി ഡിസ്പ്ലേ ഉണ്ടാകില്ല. അതുകൊണ്ടുതന്നെ ഇതിനെ ജീവനക്കാർ വിശേഷിപ്പിക്കുന്നത് 'മുഖത്ത് ധരിക്കുന്ന എയർപോഡുകൾ' എന്നാണ്.
ഉപയോക്താക്കൾക്ക് ഗ്ലാസുമായി സംവദിക്കാനുള്ള പ്രധാന മാർഗം സിരി എഐ ആയിരിക്കും. ഐഫോൺ ആപ്പുകളിലെ പ്രത്യേക ഫീച്ചറുകൾ സിരിയിലൂടെ ലഭ്യമാക്കാൻ ആപ്പിൾ ഡെവലപ്പർമാരോട് ആവശ്യപ്പെടും. ഇതുവഴി ഫോണെടുക്കാതെയും ആപ്പുകൾ തുറക്കാതെയും ശബ്ദനിർദേശങ്ങളിലൂടെ വിവിധ ജോലികൾ പൂർത്തിയാക്കാം. വൈഫൈ പിന്തുണയുള്ളതിനാൽ ഐഫോൺ സമീപത്തില്ലെങ്കിലും ചില തേർഡ് പാർട്ടി ആപ്പ് ഫീച്ചറുകൾ ഉപയോഗിക്കാൻ സാധിക്കും. എന്നാൽ ആൻഡ്രോയിഡ് ഫോണുകളെ ഇത് പിന്തുണച്ചേക്കില്ല.
മെറ്റയുടെ രണ്ടാം തലമുറ റേ-ബാൻ ഗ്ലാസുകളേക്കാൾ അല്പം കനം കുറഞ്ഞതായിരിക്കും ആപ്പിൾ ഗ്ലാസ്. ഒവൽ ആകൃതിയിലുള്ള ക്യാമറ ഓപ്പണിങ്ങുകൾ, ഇൻഡിക്കേറ്റർ ലൈറ്റ് എന്നിവയും വിവിധ നിറങ്ങളും ലഭ്യമാകും. ക്യാമറകളുടെ സഹായത്തോടെ പ്രവർത്തിക്കുന്ന വിഷ്വൽ ഇന്റലിജൻസ് ആണ് മറ്റൊരു പ്രധാന ആകർഷണം. കെട്ടിടങ്ങൾ തിരിച്ചറിയുക, ഫ്രിഡ്ജിലെ ചേരുവകൾ കണ്ട് പാചകക്കുറിപ്പുകൾ നിർദേശിക്കുക, തർജമ ചെയ്യുക തുടങ്ങിയവ ഇതിലൂടെ സാധ്യമാകും. കൂടാതെ നാവിഗേഷൻ, കോളുകൾ, സംഗീതം, സ്മാർട് ഹോം നിയന്ത്രണം തുടങ്ങിയ സൗകര്യങ്ങളുമുണ്ടാകും.
ഹാർഡ്വേർ വികസനം ഏറെക്കുറെ പൂർത്തിയായെങ്കിലും സോഫ്റ്റ്വേർ ജോലികൾ പുരോഗമിച്ചുകൊണ്ടിരിക്കുകയാണ്. അതിനാൽ അടുത്ത വർഷം ജൂണിൽ നടക്കുന്ന ഡബ്ല്യുഡബ്ല്യുഡിസി 2027 സമ്മേളനത്തിൽ ഗ്ലാസുകൾ ആദ്യമായി ഔദ്യോഗികമായി അവതരിപ്പിക്കുമെന്നാണ് പ്രതീക്ഷിക്കുന്നത്.
മെറ്റയ്ക്ക് വെല്ലുവിളിയുമായി ആപ്പിൾ സ്മാർട് ഗ്ലാസ് വിപണിയിലേക്ക്; പ്രധാന സവിശേഷത സിരി എഐ