മുംബൈ: ബോളിവുഡ് മെഗാസ്റ്റാർ അമിതാഭ് ബച്ചനും മകൻ അഭിഷേക് ബച്ചനും നേരെ അധോലോക നായകൻ ഗോൾഡി ധില്ലന്റെ വധഭീഷണി. അമിതാഭ് ബച്ചന്റെ മുംബൈയിലെ വസതിയായ 'ജൽസ' ലക്ഷ്യമിട്ട് ആക്രമണം നടത്താനുള്ള പദ്ധതി ഡൽഹി പോലീസ് സ്പെഷ്യൽ സെൽ പരാജയപ്പെടുത്തുകയും ലോറൻസ് ബിഷ്ണോയ് സംഘത്തിലെ രണ്ട് ഷാർപ്പ് ഷൂട്ടർമാരെ പിടികൂടുകയും ചെയ്തതിന് പിന്നാലെയാണ് പുതിയ ഭീഷണി ഉയർന്നിരിക്കുന്നത്. പഞ്ചാബ് സ്വദേശികളായ വികാസ് ഠാക്കൂർ (വിക്കി), ദീപക് സിങ് (ദീപ്) എന്നിവരാണ് ശനിയാഴ്ച പോലീസ് പിടിയിലായത്.
രണ്ടുപേരെ അറസ്റ്റ് ചെയ്താലും അമിതാഭ് ബച്ചനെ ലക്ഷ്യമിട്ടുള്ള പദ്ധതിയിൽ നിന്ന് പിന്മാറില്ലെന്നും മുംബൈയിൽ തങ്ങളുടെ ഇരുനൂറോളം കൂട്ടാളികൾ സജീവമായി തയ്യാറാണെന്നുമാണ് സോഷ്യൽ മീഡിയ പോസ്റ്റിലൂടെ ഗോൾഡി ധില്ലൻ മുന്നറിയിപ്പ് നൽകിയിരിക്കുന്നത്. സിഖ് സമൂഹത്തിനെതിരെ സംസാരിക്കുന്നവരെ വെറുതെ വിടില്ലെന്നും, ബുള്ളറ്റ് പ്രൂഫ് ഗ്ലാസുകൾക്ക് പോലും ബച്ചനെയും അഭിഷേകിനെയും രക്ഷിക്കാൻ കഴിയില്ലെന്നും പോസ്റ്റിൽ ഭീഷണിയുണ്ട്. എന്നാൽ ഈ സോഷ്യൽ മീഡിയ പോസ്റ്റിന്റെ ആധികാരികത പോലീസ് ഇതുവരെ സ്ഥിരീകരിച്ചിട്ടില്ല.
കഴിഞ്ഞ മാസം 'ജൽസ'യ്ക്ക് നേരെ മൂന്ന് വ്യത്യസ്ത ബോംബ് ഭീഷണി ഇമെയിലുകൾ ലഭിച്ചതിനെത്തുടർന്ന് അമിതാഭ് ബച്ചന്റെ സുരക്ഷ നേരത്തെ തന്നെ ശക്തമാക്കിയിരുന്നു. നവംബർ ഒന്നിന് വസതിക്ക് പുറത്ത് ആരാധകരെ അഭിവാദ്യം ചെയ്യാനായി അദ്ദേഹം എത്തിയത് മൂന്ന് വശവും ബുള്ളറ്റ് പ്രൂഫ് ഗ്ലാസ് കൊണ്ട് അടച്ച പ്രത്യേക പീഠത്തിലായിരുന്നു. 1984-ലെ സിഖ്വിരുദ്ധ കലാപവുമായി ബന്ധപ്പെട്ട് ബച്ചൻ നടത്തിയെന്ന് ആരോപിക്കപ്പെടുന്ന പ്രസ്താവനയാണ് അധോലോക സംഘത്തിന്റെ പ്രകോപനത്തിന് കാരണമെന്നാണ് സൂചന.
അമിതാഭ് ബച്ചനെ ആക്രമിക്കാനുള്ള ചുമതല പിടിയിലായ ദീപക്കിനായിരുന്നു എന്നാണ് അന്വേഷണ സംഘത്തിന്റെ കണ്ടെത്തൽ. ഇതിനുപുറമെ ഡൽഹിയിലെ ഒരു പ്രമുഖ വ്യവസായിയെയും ഇവർ ലക്ഷ്യമിട്ടിരുന്നു. പോലീസ് നടപടിക്ക് പിന്നാലെ 'ബച്ച് ഗയേ' (രക്ഷപ്പെട്ടു) എന്ന് അമിതാഭ് ബച്ചൻ എക്സിൽ കുറിച്ചത് വലിയ ചർച്ചയായിട്ടുണ്ട്. ഗൂഢാലോചനയുടെ ഉറവിടത്തെക്കുറിച്ച് പോലീസ് വിശദമായ അന്വേഷണം നടത്തിവരികയാണ്.
അമിതാഭ് ബച്ചനും അഭിഷേക് ബച്ചനും നേരെ വീണ്ടും വധഭീഷണി; 'ജൽസ' ആക്രമണ പദ്ധതി തകർത്തതിന് പിന്നാലെ മുന്നറിയിപ്പുമായി അധോലോക സംഘം