സാമൂഹിക പ്രസക്തിയുള്ള ശക്തമായ സ്ത്രീപക്ഷ പ്രമേയവുമായി എത്തിയ 'വേറെ ഒരു കേസ്' എന്ന ചിത്രം അന്താരാഷ്ട്ര സിനിമാ വേദികളിൽ ചർച്ചയാകാൻ ഒരുങ്ങുന്നു. സംവിധായകൻ ഷെബി ചൗഘട്ടും നിർമ്മാതാവ് ഫുവാദ് പനങ്ങായിയും കൈകോർത്ത ഈ ചിത്രം ഇതിനോടകം തന്നെ വിവിധ ചലച്ചിത്ര മേളകളിൽ മികച്ച അഭിപ്രായവും പുരസ്കാരങ്ങളും സ്വന്തമാക്കിയിട്ടുണ്ട്.
ഒരു പോലീസ് സ്റ്റേഷനിലെ സി.ഐയുടെ മുറി മാത്രം പശ്ചാത്തലമാക്കിയാണ് ചിത്രം കഥ പറയുന്നത്. സ്ത്രീകൾ നേരിടുന്ന നീതിനിഷേധങ്ങളും സമൂഹത്തിലെ പച്ചയായ യാഥാർഥ്യങ്ങളും തികച്ചും വ്യത്യസ്തമായ ആഖ്യാനശൈലിയിലാണ് സിനിമയിൽ അവതരിപ്പിച്ചിരിക്കുന്നത്. ഹരീഷ് വി. എസ് തിരക്കഥയൊരുക്കിയ ചിത്രത്തിന് രജീഷ് രാമൻ ഛായാഗ്രഹണവും മുരുകൻ എസ് പ്രൊഡക്ഷൻ ഡിസൈനും നിർവഹിച്ചിരിക്കുന്നു.
ലോസ് ഏഞ്ചൽസ് ഉൾപ്പെടെയുള്ള പ്രമുഖ വിദേശ ചലച്ചിത്ര വേദികളിൽ 'വേറെ ഒരു കേസ്' പ്രദർശിപ്പിക്കാനുള്ള ശ്രമങ്ങളിലാണ് അണിയറപ്രവർത്തകർ. ഇതിനൊപ്പം തന്നെ, ഷെബി ചൗഘട്ടും ഫുവാദ് പനങ്ങായിയും ഒന്നിക്കുന്ന പുതിയ പ്രോജക്റ്റിന്റെ പ്രാരംഭ പ്രവർത്തനങ്ങളും പുരോഗമിക്കുകയാണ്. പുതിയ സിനിമയുടെ ഔദ്യോഗിക പ്രഖ്യാപനം ഒരു വിദേശ വേദിയിൽ വെച്ച് നടത്താനാണ് അണിയറപ്രവർത്തകർ ലക്ഷ്യമിടുന്നത്.