Latest News | World | Trending News | dontmiss

റാവല്‍പിണ്ടിയിലും ഇസ്ലാമാബാദിലും കടുത്ത ജലക്ഷാമം; ഖാന്‍പൂര്‍ ഡാമില്‍ ഇനിയുള്ളത് 35 ദിവസത്തെ വെള്ളം മാത്രം

Jaihind TV Web Desk

May 07, 2025

1 min read • Updated: June 04, 2026

റാവല്‍പിണ്ടിയിലും ഇസ്ലാമാബാദിലും കടുത്ത ജലക്ഷാമം; ഖാന്‍പൂര്‍ ഡാമില്‍ ഇനിയുള്ളത് 35 ദിവസത്തെ വെള്ളം മാത്രം

റാവല്‍പിണ്ടി, ഇസ്ലാമാബാദ് ഇരട്ട നഗരങ്ങളില്‍ കടുത്ത ജലക്ഷാമം നേരിടുന്നു. ഖാന്‍പൂര്‍ ഡാമിലെ ജലനിരപ്പ് ഗണ്യമായി കുറഞ്ഞതാണ് പ്രതിസന്ധിക്ക് കാരണം. നിലവിലുള്ള വെള്ളം അടുത്ത 35 ദിവസത്തേക്ക് മാത്രമേ തികയൂ എന്നാണ് കണക്കുകള്‍ സൂചിപ്പിക്കുന്നത്. ജലനിരപ്പ് കുറയുന്നതിന്റെ ഭീകരമായ പ്രത്യാഘാതങ്ങള്‍ വ്യക്തമാക്കിക്കൊണ്ട്, ഡാമിന്റെ വിവിധ ഭാഗങ്ങളില്‍, പ്രത്യേകിച്ച് പ്രധാന സംഭരണിയിലും സ്പില്‍വേകളിലും പാറകളും മണ്‍കൂനകളും ദൃശ്യമായിത്തുടങ്ങി. അടുത്ത 10-15 ദിവസത്തിനുള്ളില്‍ കനത്ത മഴ ലഭിച്ചില്ലെങ്കില്‍ ഡാമിലെ ജലനിരപ്പ് അപകടകരമായ നിലയിലേക്ക് താഴുമെന്നാണ് ആശങ്ക. ഖാന്‍പൂര്‍ ഡാം സ്ഥിതി ചെയ്യുന്നത് ഹാരോ നദിയിലാണ്, ഇത് സിന്ധു നദിയുടെ ഒരു പോഷകനദിയാണ്. സിന്ധു നദി, സിന്ധു നദീജല ഉടമ്പടി പ്രകാരം പാകിസ്ഥാന് അനുവദിക്കപ്പെട്ട പടിഞ്ഞാറന്‍ നദികളില്‍ പ്രധാനപ്പെട്ട ഒന്നാണ്. അതിനാല്‍, ഖാന്‍പൂര്‍ ഡാമിലെ ജലലഭ്യത പാകിസ്ഥാനിലെ സിന്ധു നദീതടത്തിലെ മൊത്തത്തിലുള്ള ജലവിഭവ വിതരണവുമായി ബന്ധപ്പെട്ടിരിക്കുന്നു.സിന്ധു നദീജലകരാര്‍ ഇന്ത്യ തള്ളിയതിന്റെ രൂക്ഷത പാക്കിസ്ഥാന്‍ അനുഭവിക്കാന്‍ പോകുന്നതിങ്ങനെയാണ്. മാര്‍ഗല്ല കുന്നുകളും ഗലിയാത്തും ഉള്‍പ്പെടുന്ന ഡാമിന്റെ വൃഷ്ടിപ്രദേശങ്ങളില്‍ ആവശ്യത്തിന് മഴ ലഭിക്കാത്തത് സ്ഥിതി കൂടുതല്‍ വഷളാക്കിയതായി അധികൃതര്‍ പറയുന്നു. ജലസേചനത്തിനായി പഞ്ചാബ്, ഖൈബര്‍ പഖ്തൂണ്‍ഖ്വ പ്രവിശ്യകളിലേക്കുള്ള ജലവിതരണം നിര്‍ത്തിവയ്‌ക്കേണ്ടി വരുമെന്നും റാവല്‍പിണ്ടി, ഇസ്ലാമാബാദ് എന്നിവിടങ്ങളിലേക്കുള്ള കുടിവെള്ള വിതരണം വെട്ടിച്ചുരുക്കേണ്ടി വരുമെന്നും ഡാം അധികൃതര്‍ ഭയപ്പെടുന്നു. വൃഷ്ടിപ്രദേശങ്ങളില്‍ മഴ ലഭിച്ചില്ലെങ്കില്‍ നിലവില്‍ സംഭരണിയിലെ വെള്ളം ഏകദേശം 35 ദിവസത്തേക്ക് മാത്രമേ ലഭ്യമാകൂ എന്നും അവര്‍ പറഞ്ഞു.