പത്മശ്രീ ചെറുവയൽ രാമന്റെ സംസ്കാര ചടങ്ങുകൾ ഇന്ന്; ഔദ്യോഗിക ബഹുമതികളോടെ വിടനല്‍കും

മാനന്തവാടി: വയനാടിന്റെ പരമ്പരാഗത നെൽവിത്തുകളുടെ സംരക്ഷകനും പത്മശ്രീ പുരസ്കാര ജേതാവുമായ 'നെല്ലച്ഛൻ' ചെറുവയൽ രാമന്റെ (74) സംസ്കാര ചടങ്ങുകൾ ഇന്ന് നടക്കും. വാർദ്ധക്യ സഹജമായ അസുഖങ്ങളെ തുടർന്ന് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ ഇന്നലെ വൈകിട്ടോടെയായിരുന്നു അദ്ദേഹത്തിന്റെ അന്ത്യം. രാത്രിയോടെ മൃതദേഹം മാനന്തവാടി കമ്മനയിലെ വസതിയിൽ എത്തിച്ചപ്പോൾ നൂറുകണക്കിന് ആളുകളാണ് അന്തിമോപചാരമർപ്പിക്കാനായി എത്തിയത്.

ഇന്ന് രാവിലെ ഒൻപത് മുതൽ ഉച്ചയ്ക്ക് പന്ത്രണ്ട് മണി വരെ അദ്ദേഹം പ്രാഥമിക വിദ്യാഭ്യാസം നേടിയ കമ്മന നവോദയ എൽ.പി. സ്കൂളിൽ മൃതദേഹം പൊതുദർശനത്തിന് വെക്കും. തുടർന്ന് ഉച്ചയ്ക്ക് ശേഷം കൊടുമയിലെ കുറിച്യ സമുദായ ശ്മശാനത്തിൽ പൂർണ്ണ ഔദ്യോഗിക ബഹുമതികളോടെ സംസ്കാര ചടങ്ങുകൾ നടക്കും.

സംസ്ഥാന മന്ത്രിസഭയെ പ്രതിനിധീകരിച്ച് മന്ത്രി ടി. സിദ്ദിഖ് ഉൾപ്പെടെയുള്ളവരും, മുൻ മന്ത്രിമാരായ പി. പ്രസാദ്, വി. എസ്. സുനിൽകുമാർ തുടങ്ങിയ രാഷ്ട്രീയ നേതാക്കളും അന്ത്യാഞ്ജലി അർപ്പിക്കാൻ വയനാട്ടിലെത്തും. ചെറുവയൽ രാമന്റെ വേർപാടിൽ മുഖ്യമന്ത്രി വി. ഡി. സതീശൻ, വയനാട് എം.പി പ്രിയങ്ക ഗാന്ധി തുടങ്ങിയ പ്രമുഖർ നേരത്തെ അനുശോചനം രേഖപ്പെടുത്തിയിരുന്നു.