ബംഗാള്‍ ഉള്‍ക്കടലില്‍ ഒഡീഷ തീരത്തുനിന്ന് 240 നോട്ടിക്കല്‍ മൈല്‍ അകലെ ചരക്കുകപ്പല്‍ മുങ്ങി. ഒഡീഷയിലെ പാരദ്വീപ് തുറമുഖത്തുനിന്ന് 1,700 ടണ്‍ ഇരുമ്പ് അയിരുമായി ചൈനയിലേക്ക് പോയ 'എംവി ഓഷ്യന്‍ വിന്നര്‍' എന്ന പനാമ പതാക വഹിച്ച കപ്പലാണ് അപകടത്തില്‍പെട്ടത്. ഓഗസ്റ്റ് 20-ന് രാത്രി 10:30-നാണ് കപ്പല്‍ യാത്ര തിരിച്ചത്.
24 ജീവനക്കാരാണ് അപകട സമയത്ത് കപ്പലിലുണ്ടായിരുന്നത്. ഇതില്‍ 20 പേര്‍ ചൈനീസ് പൗരന്മാരും മൂന്നുപേര്‍ മ്യാന്‍മര്‍ സ്വദേശികളും ഒരാള്‍ ബംഗ്ലാദേശ് സ്വദേശിയുമാണ്. ജീവനക്കാരില്‍ മൂന്നുപേരെ രക്ഷപ്പെടുത്തിയതായി റിപ്പോര്‍ട്ടുകളുണ്ടെങ്കിലും എത്ര പേര്‍ സുരക്ഷിതരാണെന്നതില്‍ ഔദ്യോഗിക സ്ഥിരീകരണം വന്നിട്ടില്ല.
അപകടവിവരമറിഞ്ഞ് ഇന്ത്യന്‍ കോസ്റ്റ് ഗാര്‍ഡും നേവിയും സംയുക്തമായി രക്ഷാപ്രവര്‍ത്തനം തുടരുകയാണ്. കോസ്റ്റ് ഗാര്‍ഡിന്റെ 'വരദ്', 'അന്‍മോള്‍' എന്നീ കപ്പലുകള്‍ നിലവില്‍ തിരച്ചില്‍ നടത്തുന്നുണ്ട്. കൂടുതല്‍ സഹായത്തിനായി 'വിജിത്' എന്ന കപ്പലും സംഭവസ്ഥലത്തേക്ക് തിരിച്ചു.
ഒഡീഷ തീരത്ത് ചരക്ക് കപ്പല്‍ മുങ്ങി; കപ്പലില്‍ 24 ജീവനക്കാര്‍, രക്ഷാപ്രവര്‍ത്തനത്തിന് കോസ്റ്റ്ഗാര്‍ഡും നേവിയും
Jaihind TV News Report
Jaihind TV Web Desk
Updated Oct 12, 2026
1 min read
362 reads
