കൊച്ചി: അരിയില് ഷുക്കൂര് വധക്കേസില് 18 പേരെ വെറുതെവിട്ട വിധിക്കെതിരെ സിബിഐ ഹൈക്കോടതിയെ സമീപിക്കും. വിധിയില് അതൃപ്തി രേഖപ്പെടുത്തിയ ഷുക്കൂറിന്റെ കുടുംബവും അപ്പീല് നല്കാന് തീരുമാനിച്ചിട്ടുണ്ട്. അതിനിടെ, കേസില് ജീവപര്യന്തം തടവിന് ശിക്ഷിക്കപ്പെട്ട ഏഴ് പ്രതികളെ എറണാകുളം സബ് ജയിലില് നിന്ന് കണ്ണൂര് സെന്ട്രല് ജയിലിലേക്ക് മാറ്റാനുള്ള നടപടികള് വേഗത്തിലാക്കി.
പ്രതികള്ക്ക് പരമാവധി ശിക്ഷയായ വധശിക്ഷ തന്നെ നല്കണമെന്ന സി.ബി.ഐയുടെ ശക്തമായ വാദം വിചാരണ കോടതി തള്ളിക്കളഞ്ഞിരുന്നു. അതേസമയം, മൂന്ന് വര്ഷത്തില് താഴെ തടവുശിക്ഷ ലഭിച്ച മറ്റ് ആറ് പ്രതികള്ക്ക് കോടതി ജാമ്യം അനുവദിച്ചു. സി.പി.എം സംസ്ഥാന സെക്രട്ടേറിയറ്റ് അംഗം പി. ജയരാജന്, സംസ്ഥാന കമ്മിറ്റി അംഗം ടി.വി. രാജേഷ്, സംസ്ഥാന സെക്രട്ടറി എം.വി. ഗോവിന്ദന്റെ മകന് ശ്യാംജിത്ത് എന്നിവര് ഉള്പ്പെടെയുള്ളവരെയാണ് തെളിവുകളുടെ അഭാവത്തിലും മറ്റുമായി കോടതി കുറ്റവിമുക്തരാക്കിയത്.
2012 ഫെബ്രുവരി 20-നാണ് കേരള രാഷ്ട്രീയത്തെ പിടിച്ചുലച്ച ഈ അരുംകൊല നടന്നത്. കണ്ണൂര് കണ്ണപുരം കീഴറയിലെ വള്ളുവന് കടവില് വെച്ചാണ് എം.എസ്.എഫ് നേതാവായിരുന്ന അരിയില് അബ്ദുല് ഷുക്കൂര് കൊല്ലപ്പെട്ടത്. അന്ന് സി.പി.എം ജില്ലാ സെക്രട്ടറിയായിരുന്ന പി. ജയരാജന് സഞ്ചരിച്ച വാഹനവ്യൂഹത്തിന് നേരെ ഷുക്കൂര് ഉള്പ്പെടുന്ന സംഘം കല്ലെറിഞ്ഞതിലുള്ള രാഷ്ട്രീയ പ്രതികാരമാണ് കൊലപാതകത്തിലേക്ക് നയിച്ചതെന്നായിരുന്നു സി.ബി.ഐയുടെ കണ്ടെത്തല്.
എം.വി. ഗോവിന്ദന്റെ മകന് ശ്യാംജിത്ത് ഉള്പ്പെടെ ആകെ 33 പേരെയാണ് സി.ബി.ഐ കുറ്റപത്രത്തില് പ്രതിചേര്ത്തിരുന്നത്. ഇതില് രണ്ട് പേര് വിചാരണയ്ക്ക് മുന്പ് മരണപ്പെട്ടതിനാല് 31 പേരാണ് നിയമനടപടികള് നേരിട്ടത്. 17 മാസം നീണ്ടുനിന്ന സുദീര്ഘമായ വിചാരണയില് 41 സാക്ഷികളെ കോടതി വിസ്തരിച്ചു. 81 സാക്ഷികളെ ഉള്പ്പെടുത്തിയ കുറ്റപത്രത്തിനൊപ്പം 238 രേഖകളും 21 തൊണ്ടിമുതലുകളും (മെറ്റീരിയല് ഒബ്ജക്ട്സ്) സി.ബി.ഐ ഹാജരാക്കിയിരുന്നു. പ്രോസിക്യൂഷന് ഒരു അധിക സാക്ഷിയെയും പ്രതിഭാഗം മൂന്ന് സാക്ഷികളെയും വിചാരണ വേളയില് ഹാജരാക്കി.
അരിയിൽ ഷുക്കൂർ വധക്കേസ് വിധി: 18 പേരെ വെറുതെ വിട്ടതിനെതിരെ അപ്പീൽ നൽകാൻ സിബിഐ; കുടുംബവും ഹൈക്കോടതിയെ സമീപിക്കും