ന്യൂഡല്‍ഹി: ജീവനക്കാരുടെ സാമ്പത്തിക സുരക്ഷ ഉറപ്പാക്കുന്ന പ്രൊവിഡന്റ് ഫണ്ട് (PF) അക്കൗണ്ട് വിവരങ്ങള്‍ ഇനി കൂടുതല്‍ എളുപ്പത്തില്‍ അറിയാം. ജീവനക്കാരുടെ പ്രൊവിഡന്റ് ഫണ്ട് സംഘടനയായ ഇ.പി.എഫ്.ഒ (EPFO), തങ്ങളുടെ 74-ാം സ്ഥാപകദിനാഘോഷത്തോടനുബന്ധിച്ചാണ് പുതിയ വാട്‌സ്ആപ്പ് സേവനങ്ങള്‍ ഔദ്യോഗികമായി പ്രഖ്യാപിച്ചത്. വെബ്‌സൈറ്റുകളില്‍ കയറി സമയം കളയാതെ തന്നെ പലവിധ വിവരങ്ങളും ഇനി വാട്‌സ്ആപ്പിലൂടെ ലഭ്യമാകും.
വാട്‌സ്ആപ്പിലൂടെ എന്തൊക്കെ അറിയാം?
പി.എഫ് ബാലന്‍സ്: അക്കൗണ്ടില്‍ നിലവിലുള്ള തുക തത്സമയം പരിശോധിക്കാം.
അവസാന അഞ്ച് ഇടപാടുകള്‍: അക്കൗണ്ടില്‍ നടന്ന ഏറ്റവും പുതിയ അഞ്ച് നിക്ഷേപങ്ങളുടെ വിവരങ്ങള്‍ അറിയാം.
പാസ്ബുക്ക് വിവരങ്ങള്‍: പി.എഫ് അക്കൗണ്ടിലെ നിക്ഷേപവുമായി ബന്ധപ്പെട്ട വിശദാംശങ്ങള്‍ പരിശോധിക്കാം.
തൊഴില്‍ പദ്ധതി സഹായം: പ്രധാനമന്ത്രി വികസിത് ഭാരത് റോസ്ഗര്‍ യോജന സംബന്ധിച്ച വിവരങ്ങളും നടപടിക്രമങ്ങളും മനസ്സിലാക്കാം.
ഇ.പി.എഫ്.ഒ ഓഫീസുകളില്‍ നേരിട്ടെത്തേണ്ട സാഹചര്യം പരമാവധി കുറയ്ക്കാന്‍ ഈ ഡിജിറ്റല്‍ സംവിധാനം സഹായിക്കുമെന്നാണ് വിലയിരുത്തപ്പെടുന്നത്.
ശ്രദ്ധിക്കേണ്ട പ്രധാന വിവരങ്ങള്‍:
സുരക്ഷ പ്രധാനം: പുതിയ സേവനത്തിന്റെ ഔദ്യോഗിക നമ്പറും കൃത്യമായ നടപടിക്രമങ്ങളും ഇ.പി.എഫ്.ഒ അറിയിപ്പിലൂടെ ഉറപ്പാക്കിയ ശേഷം മാത്രം ഉപയോഗിക്കുക. സ്ഥിരീകരിക്കാത്ത നമ്പറുകളിലേക്ക് വിവരങ്ങള്‍ അയക്കരുത്. ഒരു കാരണവശാലും നിങ്ങളുടെ UAN, പാസ്വേഡ്, ഒ.ടി.പി, ബാങ്ക് വിവരങ്ങള്‍ എന്നിവ അപരിചിതരുമായി പങ്കുവെക്കരുത്. ഈ സേവനം ലഭിക്കുന്നതിന് അക്കൗണ്ട് ഉടമയുടെ ആധാര്‍ വിവരങ്ങളും ബാങ്ക് അക്കൗണ്ടും ഇ.പി.എഫ്.ഒയുമായി കൃത്യമായി ബന്ധിപ്പിച്ചിരിക്കണം.
വാട്സ്ആപ്പിൽ ഒരു 'Hi' അയച്ചാൽ മതി ഇനി PF ബാലൻസ് അറിയാം; പുതിയ സേവനവുമായി ഇ.പി.എഫ്.ഒ
Jaihind TV News Report
Jaihind TV Web Desk
2 min read
120 reads
