ട്രംപിന്റെ 'നരകകുഴി' പരാമർശം: മോദിയുടെ മൗനത്തെ കടന്നാക്രമിച്ച് കോൺഗ്രസ്

Jaihind TV Web Desk

April 23, 2026

1 min read • Updated: June 02, 2026

ട്രംപിന്റെ 'നരകകുഴി' പരാമർശം: മോദിയുടെ മൗനത്തെ കടന്നാക്രമിച്ച് കോൺഗ്രസ്

അമേരിക്കൻ മുൻ പ്രസിഡന്റ് ഡൊണാൾഡ് ട്രംപ് ഇന്ത്യയെയും ചൈനയെയും 'നരകകുഴികൾ' (Hellholes) എന്ന് വിശേഷിപ്പിച്ചതിനെതിരെ രൂക്ഷമായ പ്രതിഷേധവുമായി കോൺഗ്രസ് രംഗത്തെത്തി. ട്രംപിന്റെ പരാമർശം അങ്ങേയറ്റം അപമാനകരവും ഇന്ത്യാവിരുദ്ധവുമാണെന്ന് വിശേഷിപ്പിച്ച കോൺഗ്രസ്, പ്രധാനമന്ത്രി നരേന്ദ്ര മോദി ഇതിനെതിരെ ശക്തമായ നയതന്ത്ര പ്രതിഷേധം രേഖപ്പെടുത്തണമെന്ന് ആവശ്യപ്പെട്ടു. ഓരോ ഭാരതീയന്റെയും വികാരത്തെ മുറിപ്പെടുത്തുന്നതാണ് ട്രംപിന്റെ വാക്കുകളെന്നും പാർട്ടി വ്യക്തമാക്കി.

വിഷയത്തിൽ പ്രധാനമന്ത്രി പുലർത്തുന്ന മൗനത്തെ കോൺഗ്രസ് ചോദ്യം ചെയ്തു. ട്രംപിന് മുന്നിൽ പ്രധാനമന്ത്രി ഒന്നും മിണ്ടില്ലെന്ന് തങ്ങൾക്കറിയാമെന്നും, പലതവണ ഇന്ത്യയെ അധിക്ഷേപിച്ചിട്ടും മോദി പ്രതികരിക്കാത്തത് ദൗർഭാഗ്യകരമാണെന്നും പാർട്ടി പരിഹസിച്ചു. നരേന്ദ്ര മോദി ഒരു 'ദുർബലനായ പ്രധാനമന്ത്രി' ആണെന്നും, അദ്ദേഹത്തിന്റെ ഈ നിലപാട് കാരണം രാജ്യം വലിയ പ്രത്യാഘാതങ്ങൾ നേരിടുകയാണെന്നും കോൺഗ്രസ് ആരോപിച്ചു.

അമേരിക്കയിലെ കുടിയേറ്റ നയങ്ങളെക്കുറിച്ചുള്ള ചർച്ചയ്ക്കിടെ സ്വന്തം സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യൽ' വഴിയാണ് ട്രംപ് വിവാദ പരാമർശം നടത്തിയത്. കാലിഫോർണിയയിലെ ടെക്നോളജി മേഖലയിൽ ഇന്ത്യക്കാരും ചൈനക്കാരുമാണ് തൊഴിലുകൾ കൈക്കലാക്കുന്നതെന്നും അദ്ദേഹം ആരോപിച്ചു. ഇതിന് പുറമെ, കുടിയേറ്റക്കാർക്ക് പൗരത്വം നൽകുന്ന അമേരിക്കൻ നിയമങ്ങളെയും അദ്ദേഹം രൂക്ഷമായി വിമർശിച്ചു.

അമേരിക്കൻ സിവിൽ ലിബർട്ടീസ് യൂണിയനെ (ACLU) 'ക്രിമിനൽ' സംഘടനയെന്ന് വിളിച്ച ട്രംപ്, അവർക്കെതിരെ കടുത്ത നിയമനടപടികൾ സ്വീകരിക്കണമെന്നും ആവശ്യപ്പെട്ടു. സംഘടിത കുറ്റകൃത്യങ്ങൾ തടയാൻ ഉപയോഗിക്കുന്ന റിക്കോ (RICO) നിയമപ്രകാരം ഇവർക്കെതിരെ നടപടി വേണമെന്ന ട്രംപിന്റെ വാദം വലിയ വിവാദങ്ങൾക്കാണ് വഴിതുറന്നിരിക്കുന്നത്.