തിരുവനന്തപുരം: സംസ്ഥാനത്ത് കനത്ത മഴയും അനുബന്ധ ദുരന്തങ്ങളും തുടരുന്നതിനിടെ മഴക്കെടുതിയിൽ മരിച്ചവരുടെ എണ്ണം 25 ആയി. വിവിധ അപകടങ്ങളിലായി പത്ത് പേർക്ക് പരിക്കേറ്റതായും നാല് പേരെ ഇതുവരെ കണ്ടെത്താനായിട്ടില്ലെന്നും സംസ്ഥാന ദുരന്തനിവാരണ സംവിധാനത്തിന്റെ കണക്കുകൾ വ്യക്തമാക്കുന്നു. കാണാതായവർക്കായി തിരച്ചിൽ തുടരുകയാണ്.
അതിശക്തമായ മഴയിലും കാറ്റിലും സംസ്ഥാനത്തിന്റെ വിവിധ ഭാഗങ്ങളിലായി 52 വീടുകൾ പൂർണമായും തകർന്നു. ദുരന്തസാധ്യത നിലനിൽക്കുന്ന പ്രദേശങ്ങളിൽ നിന്ന് ആളുകളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിക്കുന്ന നടപടികൾ തുടരുകയാണ്.
നിലവിൽ സംസ്ഥാനത്തെ വിവിധ ജില്ലകളിലായി പ്രവർത്തിക്കുന്ന 418 ദുരിതാശ്വാസ ക്യാമ്പുകളിലായി 18,434 പേരാണ്** കഴിയുന്നത്. ക്യാമ്പുകളിൽ ആവശ്യമായ അടിസ്ഥാന സൗകര്യങ്ങൾ ഒരുക്കിയിട്ടുണ്ടെന്നും ദുരിതബാധിതർക്കുള്ള സഹായങ്ങൾ തുടരുകയാണെന്നും അധികൃതർ അറിയിച്ചു.
എട്ട് ജില്ലകളിൽ റെഡ് അലർട്ട്
സംസ്ഥാനത്ത് ഇന്നും അതിശക്തമായ മഴയ്ക്ക് സാധ്യതയുള്ളതിനാൽ എട്ട് ജില്ലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് റെഡ് അലർട്ട് നിലവിലുള്ളത്.
മലപ്പുറം, പാലക്കാട്, തൃശൂർ, ആലപ്പുഴ** ജില്ലകളിൽ ഓറഞ്ച് അലർട്ടും തിരുവനന്തപുരം, കൊല്ലം ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്.
മഴ ശക്തമായി തുടരുന്ന സാഹചര്യത്തിൽ മലയോര മേഖലകളിലും നദീതീര പ്രദേശങ്ങളിലും താമസിക്കുന്നവർ അതീവ ജാഗ്രത പാലിക്കണമെന്നും ദുരന്തനിവാരണ അതോറിറ്റിയുടെയും ജില്ലാ ഭരണകൂടങ്ങളുടെയും നിർദേശങ്ങൾ കർശനമായി പാലിക്കണമെന്നും അധികൃതർ അഭ്യർഥിച്ചു.
സംസ്ഥാനത്ത് മഴക്കെടുതി രൂക്ഷം കണക്ക് പുറത്ത് വിട്ട് സർക്കാർ; മരണം 25 ആയി, 418 ദുരിതാശ്വാസ ക്യാമ്പുകളിൽ 18,434 പേർ
Jaihind TV News Report
Jaihind TV Web Desk
Updated Oct 12, 2026
2 min read
305 reads
