പത്തനംതിട്ട: ആറന്മുള ഉതൃട്ടാതി ജലമേളയില്‍ എ ബാച്ചില്‍ മേലുകരയും ബി ബാച്ചില്‍ കോറ്റാത്തൂര്‍ കൈതക്കോടിയും കിരീടം ചൂടി. എ ബാച്ചില്‍ തുടര്‍ച്ചയായ രണ്ടാം വിജയത്തോടെ മേലുകര മന്നം ട്രോഫി സ്വന്തമാക്കിയപ്പോള്‍, ബി ബാച്ചില്‍ കോറ്റാത്തൂര്‍ കൈതക്കോടി ഹാട്രിക് നേട്ടമാണ് കൈവരിച്ചത്. ഉപരാഷ്ട്രപതി സി പി രാധാകൃഷ്ണൻ ആണ് ജലമേള ഉദ്ഘാടനം ചെയ്തത്.
എ ബാച്ച് പള്ളിയോടങ്ങളുടെ വാശിയേറിയ ഫൈനല്‍ പോരാട്ടത്തില്‍ മൈക്രോ സെക്കന്‍ഡുകളുടെ വ്യത്യാസത്തിലാണ് കോയിപ്പുറം പള്ളിയോടത്തെ മറികടന്ന് മേലുകര ജേതാക്കളായത്. ബി ബാച്ച് ഫൈനലിലും ഫോട്ടോ ഫിനിഷിലൂടെയായിരുന്നു വിജയികളെ നിര്‍ണ്ണയിച്ചത്. തോട്ടപ്പുഴശ്ശേരി, മംഗലം, വന്മഴി എന്നീ പള്ളിയോടങ്ങളെ പിന്നിലാക്കിയാണ് കോറ്റാത്തൂര്‍ കൈതക്കോടി ഹാട്രിക്ക് നേട്ടം സ്വന്തമാക്കിയത്.
