ന്യൂയോർക്ക്: ലോകത്തെ നടുക്കിയ സെപ്റ്റംബർ 11 ഭീകരാക്രമണത്തിന്റെ 25-ാം വാർഷികത്തിൽ കൊല്ലപ്പെട്ടവർക്ക് ആദരമർപ്പിച്ച് അമേരിക്ക. രാജ്യത്തുടനീളം വിപുലമായ അനുസ്മരണ പരിപാടികളാണ് സംഘടിപ്പിച്ചിരിക്കുന്നത്. ന്യൂയോർക്കിലെ ഗ്രൗണ്ട് സീറോയിൽ പ്രാദേശിക സമയം രാവിലെ 8:30-ന് (ഇന്ത്യൻ സമയം വൈകിട്ട് 6 മണിക്ക്) ഔദ്യോഗിക ചടങ്ങുകൾ ആരംഭിക്കും.
മുൻ പ്രസിഡന്റുമാരായ ബിൽ ക്ലിന്റൺ, ജോർജ് ഡബ്ല്യു. ബുഷ്, ബറാക് ഒബാമ, വൈസ് പ്രസിഡന്റ് ജെ.ഡി. വാൻസ് തുടങ്ങിയ പ്രമുഖ നേതാക്കൾ ഗ്രൗണ്ട് സീറോയിലെ ചടങ്ങുകളിൽ സന്നിഹിതരാകും. പെന്റഗണിൽ നടക്കുന്ന അനുസ്മരണ ചടങ്ങിൽ അമേരിക്കൻ പ്രസിഡന്റ് ഡോണൾഡ് ട്രംപ് സംസാരിക്കും.
ഗ്രൗണ്ട് സീറോ, പെന്റഗൺ, ഷാങ്ക്‌സ്‌വിൽ എന്നിവിടങ്ങളിൽ നടക്കുന്ന ചടങ്ങുകളിൽ ഭീകരാക്രമണത്തിൽ ജീവൻ പൊലിഞ്ഞവരുടെ പേരുകൾ കുടുംബാംഗങ്ങൾ ഓരോന്നായി വായിച്ചു സ്മരിക്കും. ആക്രമണം നടന്ന നിർണായക സമയങ്ങളിൽ നിശബ്ദത പാലിച്ച് മൗനാചരണവും ഉണ്ടാകും. നിലവിലെ ആഗോള രാഷ്ട്രീയ സാഹചര്യങ്ങൾ കണക്കിലെടുത്ത് അനുസ്മരണ വേദികളിലെല്ലാം അതീവ ജാഗ്രതയും ശക്തമായ സുരക്ഷാ സംവിധാനങ്ങളുമാണ് ഒരുക്കിയിരിക്കുന്നത്.
