ഇറാൻ യുദ്ധം ഉടൻ അവസാനിക്കും; ലോകം കൂടുതൽ സുരക്ഷിതമാകുമെന്ന് ഡൊണാൾഡ് ട്രംപ്

വാഷിങ്ടൺ: ഇറാനെതിരെ നടക്കുന്ന യുദ്ധം ഉടൻ അവസാനിക്കുമെന്നും, അതോടെ ലോകം കൂടുതൽ സമാധാനപരവും സുരക്ഷിതവുമായ ഇടമായി മാറുമെന്നും അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. യു.എസ്. വെറ്ററൻസ് ഡേ അനുസ്മരണ ചടങ്ങിന്റെ ഭാഗമായി വാഷിംഗ്ടണിന് പുറത്തുള്ള ആർലിംഗ്ടൺ ദേശീയ സെമിത്തേരിയിൽ സംസാരിക്കവെയാണ് ട്രംപ് ഇക്കാര്യം വ്യക്തമാക്കിയത്.

യുദ്ധം അവസാനിക്കുന്നതോടെ നിലവിലെ സുരക്ഷാ ഭീഷണികൾ ഇല്ലാതാകുമെന്നും ജനങ്ങൾക്ക് ശാന്തമായ ജീവിതം തിരികെ ലഭിക്കുമെന്നും ട്രംപ് പ്രത്യാശ പ്രകടിപ്പിച്ചു. പ്രസംഗത്തിനിടെ അമേരിക്കൻ സൈനികരുടെ അസാമാന്യമായ ധൈര്യത്തെയും വൈദഗ്ധ്യത്തെയും പ്രശംസിച്ച അദ്ദേഹം, വീരമൃത്യു വരിച്ച സൈനികരുടെ ശവകുടീരങ്ങളിൽ പുഷ്പചക്രം അർപ്പിക്കുകയും ചെയ്തു.

അതേസമയം, പെന്റഗണിന്റെ ഔദ്യോഗിക കണക്കുകൾ പ്രകാരം ഫെബ്രുവരി 28-ന് അമേരിക്കയും ഇസ്രായേലും സംയുക്തമായി ഇറാനെതിരെ ആരംഭിച്ച ആക്രമണത്തിൽ ഇതുവരെ 23 യു.എസ് സൈനികർ കൊല്ലപ്പെടുകയും നൂറുകണക്കിന് പേർക്ക് പരിക്കേൽക്കുകയും ചെയ്തിട്ടുണ്ട്. യുദ്ധം അവസാനിക്കുമെന്ന് ട്രംപ് പറയുമ്പോഴും, അമേരിക്കൻ സൈനിക താവളങ്ങൾക്ക് നേരെ മിസൈൽ ആക്രമണം നടത്തുമെന്ന കടുത്ത ഭീഷണിയുമായി ഇറാൻ സുരക്ഷാ മേധാവി മോഹ്സെൻ റെസായി രംഗത്തെത്തിയിട്ടുണ്ട്. മേഖലയിലെ വിവിധയിടങ്ങളിൽ ഇപ്പോഴും സംഘർഷാവസ്ഥ തുടരുകയാണെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.