ന്യൂയോര്‍ക്ക്: ആഗോള ചിപ്പ് നിര്‍മ്മാണ രംഗത്തെ മുന്‍നിര കമ്പനിയായ എന്‍വിഡിയയുടെ (Nvidia) സഹസ്ഥാപകനും ചീഫ് എക്‌സിക്യൂട്ടീവ് ഓഫീസറുമായ ജെന്‍സന്‍ ഹുവാങ് പദവിയൊഴിഞ്ഞു. ചൈനീസ് ചാരവനിതയെന്ന് സംശയിക്കുന്ന സ്ത്രീയുമായും കമ്പനിയിലെ ഒരു ജീവനക്കാരിയുമായും പുലര്‍ത്തിയ വിവാഹേതര ബന്ധങ്ങള്‍ സംബന്ധിച്ച ആരോപണങ്ങള്‍ പുറത്തുവന്നതിന് പിന്നാലെയാണ് അപ്രതീക്ഷിത രാജി. പുതിയ സ്ഥിരം സിഇഒയെ നിശ്ചയിക്കുന്നത് വരെ കമ്പനിയുടെ ചീഫ് ഫിനാന്‍ഷ്യല്‍ ഓഫീസര്‍ കോളെറ്റ് ക്രെസ് ഇടക്കാല മേധാവിയായി ചുമതലയേല്‍ക്കുമെന്ന് എന്‍വിഡിയ ഔദ്യോഗികമായി അറിയിച്ചു.
ഹുവാങ്ങിനെതിരായ ഗുരുതര ആരോപണങ്ങള്‍ പുറത്തുവന്നതോടെ കമ്പനിയുടെ ഡയറക്ടര്‍ ബോര്‍ഡ് അടിയന്തരമായി യോഗം ചേര്‍ന്നിരുന്നു. കമ്പനിയുടെ നിയമാവലി പ്രകാരം ബോര്‍ഡംഗങ്ങളുടെ ഭൂരിപക്ഷ വോട്ടോടെ സിഇഒയെ നീക്കം ചെയ്യാനുള്ള നടപടികളിലേക്ക് ബോര്‍ഡ് കടന്നതോടെയാണ് ഹുവാങ്ങിന്റെ പടിയിറക്കം. പുതിയ സിഇഒയെ കണ്ടെത്താനുള്ള നടപടികള്‍ ബോര്‍ഡ് ആരംഭിച്ചിട്ടുണ്ടെന്നും, ഇതിനായി കമ്പനിക്കകത്തുനിന്നും പുറത്തുനിന്നുമുള്ള യോഗ്യരായവരെ പരിഗണിക്കുമെന്നും വാര്‍ത്താക്കുറിപ്പില്‍ വ്യക്തമാക്കുന്നു.
രാജി വാര്‍ത്ത പുറത്തുവന്നതോടെ ആഗോള ഓഹരി വിപണിയില്‍ എന്‍വിഡിയയ്ക്ക് കനത്ത തിരിച്ചടിയാണ് നേരിട്ടത്. ട്രേഡിംഗില്‍ കമ്പനിയുടെ ഓഹരി വിലയില്‍ 8 ശതമാനത്തിലധികം ഇടിവുണ്ടായി. ഇത് എന്‍വിഡിയയുടെ വിപണി മൂല്യത്തില്‍ നൂറുകണക്കിന് ബില്യണ്‍ ഡോളറിന്റെ നഷ്ടമാണ് ഒറ്റയടിക്ക് ഉണ്ടാക്കിയത്.
കഴിഞ്ഞ മൂന്ന് പതിറ്റാണ്ടിലേറെയായി ജെന്‍സന്‍ ഹുവാങ്ങിന്റെ നേതൃത്വത്തിലാണ് എന്‍വിഡിയ വളര്‍ന്ന് ലോകത്തെ ഏറ്റവും മൂല്യമേറിയ ടെക് ഭീമന്മാരിലൊന്നായി മാറിയത്. ആഗോളതലത്തില്‍ ആര്‍ട്ടിഫിഷ്യല്‍ ഇന്റലിജന്‍സ് (AI) വിപ്ലവത്തിന് മുന്നില്‍ നിന്നതും യുഎസ്-ചൈന സാങ്കേതിക മത്സരത്തില്‍ നിര്‍ണ്ണായക ശക്തിയായി മാറിയതും ഹുവാങ്ങിന്റെ ദീര്‍ഘവീക്ഷണത്തിലൂടെയായിരുന്നു. വ്യക്തമായൊരു പിന്‍ഗാമിയെ ഉയര്‍ത്തിക്കാട്ടാതെ, വിവാദങ്ങളുടെ പശ്ചാത്തലത്തില്‍ ഹുവാങ് അപ്രതീക്ഷിതമായി പടിയിറങ്ങിയത് എന്‍വിഡിയയെയും ആഗോള എഐ ചിപ്പ് വിപണിയെയും വലിയൊരു അനിശ്ചിതത്വത്തിലേക്കാണ് തള്ളിവിട്ടിരിക്കുന്നത്.
ചൈനീസ് ചാരവനിതയുമായുള്ള ബന്ധം; NVIDIA മേധാവി ജെൻസെൻ ഹുവാങ് രാജിവെച്ചു, ഓഹരി വിപണിയിൽ കനത്ത ഇടിവ്
Jaihind TV News Report
Jaihind TV Web Desk
2 min read
54 reads
