റിയാദ്: പശ്ചിമേഷ്യൻ രാഷ്ട്രീയത്തെ വർഷങ്ങളായി കലുഷിതമാക്കുന്ന യെമൻ ആഭ്യന്തരയുദ്ധവും സൗദി-ഹൂതി സംഘർഷവും വീണ്ടും അതീവ ഗുരുതരമായ ഘട്ടത്തിലേക്ക്. വർഷങ്ങളായി നിലനിന്നിരുന്ന താത്കാലിക വെടിനിർത്തൽ തകർന്നതോടെ ഇരുപക്ഷവും പരസ്പരം ശക്തമായ ആക്രമണങ്ങളാണ് അഴിച്ചുവിടുന്നത്. യെമൻ ഔദ്യോഗിക ഭരണകൂടത്തെ പൂർണ്ണമായി ഉന്മൂലനം ചെയ്യാൻ ലക്ഷ്യമിട്ട് ഹൂതി വിമതർ ആക്രമണം കടുപ്പിച്ചിരിക്കുകയാണ്. ഇതിനൊപ്പം സൗദി അറേബ്യയുടെ പ്രധാന നഗരങ്ങളെയും തന്ത്രപ്രധാന കേന്ദ്രങ്ങളെയും ലക്ഷ്യമിട്ടും ഹൂതികൾ ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് വ്യാപക ആക്രമണം നടത്തുന്നുണ്ട്. ആക്രമണങ്ങളിൽ ഇതുവരെ സൗദിയിൽ ഇരുപതിലേറെ പേർ കൊല്ലപ്പെട്ടു.
സൗദി തലസ്ഥാനമായ റിയാദിലെ കിങ് ഖാലിദ് അന്താരാഷ്ട്ര വിമാനത്താവളം, ധഹ്‌റാനിലെ സൗദി അരാംകോയുടെ ആസ്ഥാനം, ജിസാന്‍, യാന്‍ബു തുടങ്ങിയ പ്രദേശങ്ങളിലെ എണ്ണ ശുദ്ധീകരണ ശാലകൾ എന്നിവയ്ക്ക് നേരെയും ഹൂതികൾ കനത്ത ആക്രമണങ്ങൾ അഴിച്ചുവിട്ടു. വിശുദ്ധ നഗരമായ മെക്കയ്ക്ക് നേരെയും ആക്രമണ ശ്രമങ്ങളുണ്ടായത് അറബ് ലോകത്തെ ഞെട്ടിച്ചിരുന്നു. എന്നാൽ ഈ സംഘർഷങ്ങളിൽ നിന്ന് പൂർണ്ണമായി പിന്മാറി തലയൂരാനുള്ള ശ്രമത്തിലാണ് സൗദി അറേബ്യയെന്നാണ് റിപ്പോർട്ടുകൾ സൂചിപ്പിക്കുന്നത്.
യെമനിൽ രൂക്ഷമാകുന്ന മാനുഷിക ദുരന്തം:
യെമൻ സർക്കാരും ഹൂതി വിമതരും തമ്മിലുള്ള ആഭ്യന്തര യുദ്ധം അതിന്റെ ചരിത്രത്തിലെ ഏറ്റവും തീവ്രമായ പൂർണ്ണ തോതിലുള്ള ഘട്ടത്തിലെത്തിയിരിക്കുകയാണെന്ന് ഐക്യരാഷ്ട്രസഭ വ്യക്തമാക്കുന്നു. യെമൻ ഗവൺമെന്റിന്റെ താത്കാലിക തലസ്ഥാനമായ ഏഡനിലെ അൽ-മാഷിഖ് പ്രസിഡൻഷ്യൽ കൊട്ടാരത്തിന് നേരെ അടുത്തിടെ അഞ്ച് ബാലിസ്റ്റിക് മിസൈലുകൾ ഉപയോഗിച്ച് കനത്ത ആക്രമണമുണ്ടായി. സംഭവത്തിൽ ഡ്യൂട്ടിയിലുണ്ടായിരുന്ന സുരക്ഷാ ജീവനക്കാർ ഉൾപ്പെടെ 5 പേർ കൊല്ലപ്പെടുകയും 16-ലധികം പേർക്ക് പരിക്കേൽക്കുകയും ചെയ്തു. എങ്കിലും യെമൻ പ്രധാനമന്ത്രി ഷായ അൽ-സിന്ദാനിയും ക്യാബിനറ്റ് മന്ത്രിമാരും അത്ഭുതകരമായാണ് ഈ ആക്രമണത്തിൽ നിന്ന് പരിക്കേൽക്കാതെ രക്ഷപ്പെട്ടത്.
സെപ്റ്റംബർ മാസം മുതൽ യെമന്റെ ചെങ്കടൽ തീരപ്രദേശങ്ങളിലൂടെയും തെക്കൻ മേഖലകളിലൂടെയും മിന്നൽ ആക്രമണങ്ങൾ നടത്തി ഹൂതികൾ പുതിയ പ്രദേശങ്ങൾ പിടിച്ചെടുക്കുകയാണ്. ഇതിനകം തന്നെ തലസ്ഥാനമായ സനാ ഹൂതികളുടെ നിയന്ത്രണത്തിലാണ്. ഇപ്പോഴത്തെ പുതിയ യുദ്ധത്തെ തുടർന്ന് യെമനിൽ രണ്ട് ലക്ഷത്തോളം ആളുകൾ വീണ്ടും അഭയാർത്ഥികളാക്കപ്പെട്ടതായാണ് കണക്കുകൾ വ്യക്തമാക്കുന്നത്. രാജ്യത്ത് 18 ദശലക്ഷത്തിലധികം ജനങ്ങൾ കടുത്ത ഭക്ഷ്യക്ഷാമം നേരിടുന്നുണ്ടെന്നും അന്താരാഷ്ട്ര ഏജൻസികൾ മുന്നറിയിപ്പ് നൽകുന്നു.
