അരങ്ങേറ്റത്തില്‍ ആറാടി മാനവ് സുതര്‍; അഫ്ഗാനിസ്ഥാനെതിരെ ഇന്ത്യക്ക് കൂറ്റന്‍ ലീഡ്, ഫോളോ ഓണ്

കരിയറിലെ ആദ്യ അന്താരാഷ്ട്ര ടെസ്റ്റ് മത്സരം അവിസ്മരണീയമാക്കി യുവ സ്പിന്നര്‍ മാനവ് സുതര്‍. അഫ്ഗാനിസ്ഥാനെതിരായ ഏക ടെസ്റ്റില്‍ മാനവിന്റെ കറങ്ങിത്തിരിഞ്ഞ പന്തുകള്‍ക്ക് മുന്നില്‍ ഉത്തരംമുട്ടിയ അഫ്ഗാന്‍ ഒന്നാം ഇന്നിങ്‌സില്‍ വെറും 152 റണ്‍സിന് തകര്‍ന്നു വീണു. ഇതോടെ 412 റണ്‍സിന്റെ കൂറ്റന്‍ ഒന്നാം ഇന്നിങ്‌സ് ലീഡ് സ്വന്തമാക്കിയ ഇന്ത്യ, സന്ദര്‍ശകരെ ഫോളോ ഓണിന് വിട്ടു.

രണ്ടാം ദിനം കളി നിര്‍ത്തുമ്പോള്‍ 5 വിക്കറ്റിന് 113 റണ്‍സെന്ന നിലയിലായിരുന്ന അഫ്ഗാനിസ്ഥാന് മൂന്നാം ദിനം ഒട്ടും ശുഭകരമായിരുന്നില്ല. ശേഷിച്ച 5 വിക്കറ്റുകള്‍ വെറും 39 റണ്‍സിനിടെയാണ് ഇന്ത്യന്‍ ബൗളര്‍മാര്‍ പിഴുതത്. 22 ഓവറില്‍ 10 മെയ്ഡനടക്കം വെറും 33 റണ്‍സ് മാത്രം വഴങ്ങിയാണ് മാനവ് സുതര്‍ 6 വിക്കറ്റ് നേട്ടം കൊയ്തത്. രണ്ടാം ദിനം മൂന്ന് വിക്കറ്റ് വീഴ്ത്തിയ താരം മൂന്നാം ദിനത്തിലും ശേഷിച്ച മൂന്ന് വിക്കറ്റുകള്‍ കൂടി സ്വന്തമാക്കി അഫ്ഗാന്റെ നടുവൊടിച്ചു. സ്വന്തം പന്തില്‍ അഫ്‌സര്‍ സസായിയെ (3) റിട്ടേണ്‍ ക്യാച്ചിലൂടെ പുറത്താക്കിയ മാനവിന്റെ പ്രകടനം എടുത്തുപറയേണ്ടതാണ്. പ്രസിദ്ധ് കൃഷ്ണ മൂന്നും വാഷിങ്ടന്‍ സുന്ദര്‍ ഒരു വിക്കറ്റും വീഴ്ത്തി മാനവിന് മികച്ച പിന്തുണ നല്‍കി. 60 റണ്‍സെടുത്ത റഹ്‌മത് ഷാ മാത്രമാണ് അഫ്ഗാന്‍ നിരയില്‍ അല്പമെങ്കിലും പൊരുതിയത്. മറ്റാര്‍ക്കും ഇന്ത്യന്‍ ബൗളിങ് നിരയ്ക്ക് മുന്നില്‍ പിടിച്ചുനില്‍ക്കാനായില്ല.

നേരത്തെ ടോസ് നേടി ബാറ്റിങ് തിരഞ്ഞെടുത്ത ഇന്ത്യ 8 വിക്കറ്റ് നഷ്ടത്തില്‍ 564 റണ്‍സെന്ന കൂറ്റന്‍ സ്‌കോറാണ് ഒന്നാം ഇന്നിങ്‌സില്‍ പടുത്തുയര്‍ത്തിയത്. മുന്‍നിര ബാറ്റിങ് കരുത്തും വാലറ്റത്തിന്റെ പോരാട്ടവീര്യവുമാണ് ഇന്ത്യയെ മികച്ച സ്‌കോറിലേക്ക് നയിച്ചത്. വാഷിങ്ടന്‍ സുന്ദര്‍ (52*), മാനവ് സുതര്‍ (28), മുഹമ്മദ് സിറാജ് (22) എന്നിവരുടെ തകര്‍പ്പന്‍ ബാറ്റിങ്ങാണ് രണ്ടാം ദിനത്തിന്റെ അവസാന സെഷനില്‍ ഇന്ത്യന്‍ സ്‌കോര്‍ 550 കടത്തിയത്. സിറാജ് വെറും 14 പന്തില്‍ 4 ഫോറും ഒരു സിക്‌സും പറത്തിയപ്പോള്‍, മാനവ് 2 സിക്‌സും 2 ഫോറും നേടി തിളങ്ങി. കുല്‍ദീപ് യാദവ് 9 റണ്‍സുമായി പുറത്താകാതെ നിന്നു. അഫ്ഗാനായി മുഹമ്മദ് സലീം ആറ് വിക്കറ്റ് വീഴ്ത്തി.

3 വിക്കറ്റിന് 368 റണ്‍സെന്ന നിലയിലാണ് ഇന്ത്യ രണ്ടാം ദിനം ബാറ്റിങ് പുനരാരംഭിച്ചത്. ഐപിഎല്ലിലെ മിന്നും ഫോം ടെസ്റ്റിലും തുടര്‍ന്ന ക്യാപ്റ്റന്‍ ശുഭ്മാന്‍ ഗില്‍ കരിയറിലെ 11-ാം ടെസ്റ്റ് സെഞ്ച്വറി തികച്ചു. 177 പന്തില്‍ 15 ഫോറും ഒരു സിക്‌സുമടക്കം 126 റണ്‍സെടുത്താണ് ഗില്‍ മടങ്ങിയത്. ഒന്നാം ദിനം തകര്‍പ്പന്‍ സെഞ്ച്വറിയോടെ (165 പന്തില്‍ 100 റണ്‍സ്) കരിയറിലെ 12-ാം ശതകം കുറിച്ച കെ.എല്‍ രാഹുലും ഇന്ത്യക്ക് ശക്തമായ അടിത്തറയേകിയിരുന്നു.

സായ് സുദര്‍ശന്‍ 81 റണ്‍സ് നേടി പുറത്തായപ്പോള്‍, വിക്കറ്റ് കീപ്പര്‍ ബാറ്റര്‍ ഋഷഭ് പന്തും അര്‍ധസെഞ്ച്വറിയുമായി (121 പന്തില്‍ 81 റണ്‍സ്) ബാറ്റിങ് വെടിക്കെട്ടിന് ആക്കം കൂട്ടി. ധ്രുവ് ജുറേല്‍ 19 റണ്‍സും ഓപ്പണര്‍ യശസ്വി ജയ്സ്വാള്‍ 24 റണ്‍സുമെടുത്ത് പുറത്തായി.