ഗിഗ് തൊഴിലാളികൾക്ക് 15 ലക്ഷത്തിന്റെ ഇൻഷുറൻസും വിശ്രമകേന്ദ്രങ്ങളും; തെലങ്കാനയിൽ വമ്പൻ ക്ഷേമപദ്ധതികളുമായി രാഹുൽ ഗാന്ധി

ഹൈദരാബാദ്: തെലങ്കാനയിലെ ഗിഗ് തൊഴിലാളികൾക്കായി സമഗ്രമായ ക്ഷേമപദ്ധതികൾ നടപ്പാക്കുമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി പ്രഖ്യാപിച്ചു. 'തെലങ്കാന ഗിഗ് വർക്കേഴ്സ് ആൻഡ് സോഷ്യൽ സെക്യൂരിറ്റി വെൽഫെയർ' പദ്ധതിയുടെ ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം. അപകട-ആരോഗ്യ ഇൻഷുറൻസ്, സാമ്പത്തിക ആനുകൂല്യങ്ങൾ, ആധുനിക സൗകര്യങ്ങളുള്ള വിശ്രമകേന്ദ്രങ്ങൾ തുടങ്ങി തൊഴിലാളികൾക്ക് സുരക്ഷയൊരുക്കുന്ന വിവിധ പദ്ധതികളാണ് ചടങ്ങിൽ പ്രഖ്യാപിച്ചത്.

പദ്ധതിയുടെ ഭാഗമായി ഗിഗ് തൊഴിലാളികൾക്ക് അഞ്ചുലക്ഷം രൂപയുടെ അപകട ഇൻഷുറൻസും പത്തുലക്ഷം രൂപയുടെ ആരോഗ്യ ഇൻഷുറൻസും തെലങ്കാന സർക്കാർ ഉറപ്പാക്കും. ഇതിനുപുറമെ, ഓരോ ഡെലിവറി ഇടപാടിൽ നിന്നും ഒരു ശതമാനം തുക തൊഴിലാളികളുടെ ബാങ്ക് അക്കൗണ്ടുകളിലേക്ക് നേരിട്ട് ലഭ്യമാക്കുന്ന സംവിധാനവും നടപ്പാക്കും. തൊഴിലാളികളുടെ സൗകര്യാർത്ഥം സംസ്ഥാനത്തെ വിവിധ നഗരങ്ങളിൽ വൈഫൈ സൗകര്യത്തോടുകൂടിയ വിശ്രമകേന്ദ്രങ്ങൾ നിർമ്മിക്കുമെന്നും രാഹുൽ ഗാന്ധി വ്യക്തമാക്കി.

ദീർഘനേരം യാത്ര ചെയ്യേണ്ടിവരുന്ന ഡെലിവറി തൊഴിലാളികൾക്ക് നിലവിൽ വിശ്രമിക്കാൻ പ്രത്യേക ഇടങ്ങളില്ലാത്ത സാഹചര്യം കണക്കിലെടുത്താണ് പുതിയ വിശ്രമകേന്ദ്രങ്ങൾ ഒരുക്കുന്നത്. വാഹനങ്ങൾ സുരക്ഷിതമായി പാർക്ക് ചെയ്യാനും തൊഴിലാളികൾക്ക് വിശ്രമിക്കാനുമുള്ള എല്ലാ സൗകര്യങ്ങളും ഇവിടെയുണ്ടാകും. കൂടാതെ, തൊഴിലാളികൾ പൂർത്തിയാക്കിയ യാത്രകൾ, ഡെലിവറികൾ, അർഹമായ പ്രതിഫലം തുടങ്ങിയ വിവരങ്ങൾ സുതാര്യമായി മൊബൈൽ ഫോണിലൂടെ പരിശോധിക്കാൻ സാധിക്കുന്ന പ്രത്യേക ഡിജിറ്റൽ സംവിധാനവും ഏർപ്പെടുത്തും.

നേരത്തെ തെലങ്കാനയിലെ ഗിഗ് തൊഴിലാളികളുമായി നടത്തിയ കൂടിക്കാഴ്ചയിലൂടെ അവർ നേരിടുന്ന യഥാർത്ഥ പ്രതിസന്ധികൾ താൻ നേരിട്ട് മനസ്സിലാക്കിയിരുന്നുവെന്ന് രാഹുൽ ഗാന്ധി പറഞ്ഞു. തൊഴിൽ സാഹചര്യങ്ങൾ മെച്ചപ്പെടുത്തുമെന്നും സാമൂഹിക സുരക്ഷ ഉറപ്പാക്കുമെന്നും അന്ന് കോൺഗ്രസ് പാർട്ടിയും മുഖ്യമന്ത്രിയും നൽകിയ വാഗ്ദാനമാണ് ഇപ്പോൾ യാഥാർത്ഥ്യമാകുന്നതെന്നും അദ്ദേഹം കൂട്ടിച്ചേർത്തു.