അതിർത്തി സുരക്ഷയും ഭീകരവിരുദ്ധ പ്രവർത്തനങ്ങളും ശക്തമാക്കാൻ അസം റൈഫിൾസ് യോഗം

ഷില്ലോങ്: ഇന്ത്യ–മ്യാൻമർ അതിർത്തിയിലെ സുരക്ഷ ശക്തമാക്കുന്നതിനും ഭീകരവിരുദ്ധ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും ഊന്നൽ നൽകി അസം റൈഫിൾസ് കമാൻഡേഴ്സ് കോൺഫറൻസ് സമാപിച്ചു. ഈ മാസം 12, 13 തീയതികളിൽ ഷില്ലോങ്ങിലെ ലെയ്റ്റ്കോറിലുള്ള അസം റൈഫിൾസ് ഡയറക്ടറേറ്റ് ജനറൽ ആസ്ഥാനത്താണ് രണ്ടുദിവസത്തെ ഉന്നതതല സമ്മേളനം നടന്നത്. അസം റൈഫിൾസ് ഡയറക്ടർ ജനറൽ ലെഫ്റ്റനന്റ് ജനറൽ വികാസ് ലഖേരയുടെ അധ്യക്ഷതയിൽ നടന്ന യോഗത്തിൽ വിവിധ ഫോർമേഷൻ കമാൻഡർമാർ, ബറ്റാലിയൻ കമാൻഡർമാർ, മുതിർന്ന ഉദ്യോഗസ്ഥർ എന്നിവർ പങ്കെടുത്തിരുന്നു.

രാജ്യത്തിന്റെ വടക്കുകിഴക്കൻ മേഖലയിലെ നിലവിലെ സുരക്ഷാ സാഹചര്യം വിലയിരുത്തുക, സേനയുടെ പ്രവർത്തന സജ്ജത പരിശോധിക്കുക, ഉയർന്നുവരുന്ന സുരക്ഷാ വെല്ലുവിളികളെ നേരിടാനുള്ള തന്ത്രങ്ങൾ ആവിഷ്കരിക്കുക എന്നിവയായിരുന്നു സമ്മേളനത്തിന്റെ പ്രധാന ലക്ഷ്യങ്ങൾ. ഇന്ത്യ–മ്യാൻമർ അതിർത്തിയിലെ നിയന്ത്രണം കൂടുതൽ ശക്തമാക്കൽ, ഭീകരവിരുദ്ധ നീക്കങ്ങൾ മെച്ചപ്പെടുത്തൽ എന്നിവ യോഗം ഗൗരവമായി ചർച്ച ചെയ്തു.

സേനയുടെ ആധുനികവത്കരണം, അത്യാധുനിക ആയുധങ്ങളുടെയും നിരീക്ഷണ ഉപകരണങ്ങളുടെയും ഉൾപ്പെടുത്തൽ, പുതിയ സാങ്കേതികവിദ്യകളുടെ ഉപയോഗം എന്നിവ യോഗത്തിൽ ചർച്ചാവിഷയമായി. കൂടാതെ, രഹസ്യാന്വേഷണ ഏജൻസികൾ തമ്മിലുള്ള ഏകോപനം ശക്തമാക്കാനും വിവിധ സുരക്ഷാ ഏജൻസികളുടെ സംയുക്ത പ്രവർത്തനം ഉറപ്പാക്കാനും തീരുമാനിച്ചു.

സൈനികരുടെ പരിശീലനം, അടിസ്ഥാന സൗകര്യ വികസനം, സേനാംഗങ്ങളുടെയും കുടുംബങ്ങളുടെയും ക്ഷേമം തുടങ്ങിയ കാര്യങ്ങളും സമ്മേളനം വിലയിരുത്തി. വിവിധ മേഖലകളിൽ അസം റൈഫിൾസ് കൈവരിച്ച പ്രവർത്തന നേട്ടങ്ങളെ ഡയറക്ടർ ജനറൽ അഭിനന്ദിച്ചു. വെല്ലുവിളികൾ നിറഞ്ഞ സാഹചര്യങ്ങളിലും രാജ്യത്ത് സമാധാനവും സുരക്ഷയും നിലനിർത്തുന്നതിൽ സേനാംഗങ്ങൾ കാട്ടുന്ന അർപ്പണബോധവും പ്രൊഫഷണലിസവും മാതൃകാപരമാണെന്ന് അദ്ദേഹം വ്യക്തമാക്കി. രാജ്യസുരക്ഷ പൂർണ്ണമായും ഉറപ്പാക്കുന്നതിനുള്ള സുപ്രധാന തീരുമാനങ്ങളോടെയാണ് രണ്ടുദിവസത്തെ കോൺഫറൻസ് സമാപിച്ചത്.