തിരുവനന്തപുരം: കേരളത്തില് നിയമസഭാ തിരഞ്ഞെടുപ്പ് പ്രഖ്യാപനത്തിന് തൊട്ടുമുമ്പ് മുന് മുഖ്യമന്ത്രി പിണറായി വിജയനും മരുമകനും അന്നത്തെ ടൂറിസം മന്ത്രിയുമായിരുന്ന പി.എ. മുഹമ്മദ് റിയാസും ചേര്ന്ന് നടത്തിയ സാമ്പത്തിക ഇടപാടുകള് ഓരോന്നായി പുറത്തുവരുന്നത് വലിയ രാഷ്ട്രീയ ചര്ച്ചകള്ക്കാണ് വഴിവെച്ചിരിക്കുന്നത്. 2026 ഫെബ്രുവരി 20-ന് ടൂറിസം വകുപ്പ് പുറത്തിറക്കിയ ഔദ്യോഗിക ഉത്തരവ് പ്രകാരം, ആന്റോ അഗസ്റ്റിന്റെ ഉടമസ്ഥതയിലുള്ള റിപ്പോര്ട്ടര് ടിവിക്ക് 50 ലക്ഷം രൂപയാണ് സര്ക്കാര് ഖജനാവില് നിന്ന് ധൃതിപ്പെട്ട് അനുവദിച്ചു നല്കിയത്. തിരഞ്ഞെടുപ്പ് പെരുമാറ്റച്ചട്ടം നിലവില് വരുന്നതിന് തൊട്ടുമുമ്പ് ഇത്തരമൊരു വന്തുക അനുവദിച്ചതിന് പിന്നില് വ്യക്തമായ ദുരൂഹതയും രാഷ്ട്രീയ ലക്ഷ്യങ്ങളുമുണ്ട്.
യു.ഡി.എഫ് സര്ക്കാര് അധികാരത്തില് വരുന്നത് തടയാനും പിണറായി സര്ക്കാരിന്റെ വീഴ്ചകള് മൂടിവെക്കാനും ലക്ഷ്യമിട്ട് ചാനല് വഴി നടത്തിയ കുപ്രചാരണങ്ങള്ക്കും തിരഞ്ഞെടുപ്പ് സര്വേകള്ക്കും പിന്നില് ഇത്തരം സര്ക്കാര് ഫണ്ടുകളുടെ ഒത്താശയുണ്ടെന്ന ആരോപണത്തിന് ഈ ഉത്തരവ് തികഞ്ഞ തെളിവാണ്. സര്ക്കാരിന്റെ കൊള്ളരുതായ്മകള് ജനങ്ങളില് നിന്ന് മറച്ചുപിടിക്കാന് മാധ്യമങ്ങളെ കയ്യിലെടുക്കുന്നതിന്റെ ഭാഗമായി ജനങ്ങളുടെ നികുതിപ്പണം ഇത്തരം സ്ഥാപനങ്ങള്ക്ക് വാരിയെറിഞ്ഞു കൊടുക്കുകയായിരുന്നു. കേരളത്തിലെ ജനങ്ങളെ കബളിപ്പിച്ച് സ്വന്തം രാഷ്ട്രീയ അതിജീവനം മാത്രം ലക്ഷ്യമിട്ടുള്ള ഇത്തരം ഭരണാധികാരികളുടെ ധൂര്ത്ത് ജനരോഷം ക്ഷണിച്ചുവരുത്തുന്ന ഒന്നാണ്.
പിണറായി ഭരണത്തിന്റെ തണലില് കഴിഞ്ഞകാലങ്ങളില് നടത്തിയ വഴിവിട്ട ഇടപാടുകളും അഴിമതികളും വരാനിരിക്കുന്ന യു.ഡി.എഫ് സര്ക്കാരിന്റെ കാലത്ത് പുറത്തുവരുമെന്ന കടുത്ത ഭയമാണ് ഈ അനധികൃത ഫണ്ട് അനുവദിക്കലിന് പിന്നില് പ്രവര്ത്തിച്ചത്. അധികാരത്തിന്റെ അവസാന നിമിഷം പോലും പൊതുഖജനാവ് കൊള്ളയടിച്ച് തങ്ങളുടെ വിശ്വസ്തരായ മാധ്യമപ്പടയ്ക്ക് കൈമാറുന്നതില് പിണറായി-റിയാസ് കൂട്ടുകെട്ട് പ്രത്യേകം ശ്രദ്ധപുലര്ത്തി. അന്വേഷണങ്ങളെ പ്രതിരോധിക്കാനും ഭരണതുടര്ച്ചയ്ക്കായി കള്ളക്കഥകള് മെനയാനുമുള്ള ഈ നീക്കം കേരള രാഷ്ട്രീയത്തിന്റെ അധഃപതനമാണ് വ്യക്തമാക്കുന്നത്.
ജാതി-മത-കക്ഷി ഭേദമന്യേ കേരളത്തിലെ ജനങ്ങള് അത്യന്തം ഗൗരവത്തോടെ കാണേണ്ട ഗുരുതരമായ വിഷയമാണിത്. സ്വന്തം ഖജനാവില് നിന്നുള്ള പണമുപയോഗിച്ച് ജനങ്ങളെ വഞ്ചിക്കുന്ന ഇത്തരം രാഷ്ട്രീയ അവിശുദ്ധ കൂട്ടുകെട്ടുകള്ക്കെതിരെ ശക്തമായ പ്രതികരണങ്ങള് ഉയരേണ്ടതുണ്ട്. പൊതുപണം ധൂര്ത്തടിച്ചതിനും മാധ്യമങ്ങളെ ഉപയോഗിച്ച് ജനവിധി അട്ടിമറിക്കാന് ശ്രമിച്ചതിനുമുള്ള മറുപടി കേരള സമൂഹം ഇത്തരം ഭരണാധികാരികള്ക്ക് നല്കുമെന്നതില് സംശയമില്ല.
'പൊതുഖജനാവ് കൊള്ളയടിച്ച പിണറായി സര്ക്കാര്'; തിരഞ്ഞെടുപ്പിന് തൊട്ടുമുൻപ് റിപ്പോർട്ടർ ടിവിക്ക് പിണറായി-റിയാസ് വക 50 ലക്ഷം; അന്നത്തെ ടൂറിസം വകുപ്പിന്റെ ഉത്തരവ് പുറത്ത്