തിരുവനന്തപുരം: സംസ്ഥാനത്ത് ചൂട് ക്രമാതീതമായി ഉയര്‍ന്ന നിലയില്‍ തുടരുന്നു. പാലക്കാട്, കോട്ടയം, പുനലൂര്‍ തുടങ്ങിയ മേഖലകളിലാണ് സാധാരണയേക്കാള്‍ ഉയര്‍ന്ന താപനില രേഖപ്പെടുത്തിയത്. പാലക്കാട് സാധാരണയേക്കാള്‍ 4.7 ഡിഗ്രി സെല്‍ഷ്യസും, കോട്ടയത്ത് 4.2 ഡിഗ്രി സെല്‍ഷ്യസും അധിക താപനില വര്‍ദ്ധിച്ചു. ഇരുസ്ഥലങ്ങളിലും 35 ഡിഗ്രി സെല്‍ഷ്യസാണ് ഇന്നത്തെ ഉയര്‍ന്ന താപനില. പുനലൂരില്‍ സാധാരണയേക്കാള്‍ 3.3 ഡിഗ്രി സെല്‍ഷ്യസ് ഉയര്‍ന്ന് 35.2 ഡിഗ്രി സെല്‍ഷ്യസ് താപനില രേഖപ്പെടുത്തി.
അതേസമയം, ഉയര്‍ന്ന താപനിലയ്ക്ക് ആശ്വാസമായി സംസ്ഥാനത്ത് നാളെ ഒറ്റപ്പെട്ടയിടങ്ങളില്‍ ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. മഴ മുന്നറിയിപ്പിന്റെ പശ്ചാത്തലത്തില്‍ നാല് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. പത്തനംതിട്ട, കോട്ടയം, എറണാകുളം, ഇടുക്കി എന്നീ ജില്ലകളിലാണ് യെല്ലോ അലര്‍ട്ട് നിലവിലുള്ളത്.
സംസ്ഥാനത്ത് താപനില കുതിച്ചുയരുന്നു: 4 ജില്ലകളില്‍ നാളെ ശക്തമായ മഴ മുന്നറിയിപ്പ്
Jaihind TV News Report
Jaihind TV Web Desk
Updated Oct 13, 2026
1 min read
795 reads
