ലോകകപ്പിലേക്കുള്ള നീണ്ട കാത്തിരിപ്പുകള്‍ക്ക് വിരാമമിട്ടുകൊണ്ട് ഗ്രൂപ്പ് സിയിലെ തങ്ങളുടെ ആദ്യ മത്സരത്തില്‍ സ്‌കോട്ട്‌ലന്‍ഡും ഹെയ്തിയും നേര്‍ക്കുനേര്‍ ഏറ്റുമുട്ടി. ഹെയ്തിക്കെതിരെ ഒരു ഗോളിന്റെ തകര്‍പ്പന്‍ ജയമാണ് സ്‌കോട്ട്‌ലന്‍ഡ് സ്വന്തമാക്കിയത്. ബസീലും മൊറോക്കോയും ഉള്‍പ്പെടുന്ന ഗ്രൂപ്പില്‍, ആദ്യ മത്സരത്തിലെ ഈ ജയം സ്‌കോട്ട്‌ലന്‍ഡിന് ഗ്രൂപ്പ് പട്ടികയില്‍ ഒന്നാം സ്ഥാനത്ത് എത്തുവാന്‍ സഹായകരമായി.
ഗ്രൂപ്പ് സിയിലെ മറ്റൊരു മത്സരത്തില്‍ ബ്രസീലും മൊറോക്കോയും 1-1 ന് സമനിലയില്‍ പിരിഞ്ഞ പശ്ചാത്തലത്തിലാണ് ഇരുടീമുകളും കളത്തിലിറങ്ങിയത്. അതിനാല്‍ തന്നെ ഈ മത്സരത്തില്‍ വിജയിക്കുന്നവര്‍ക്ക് ഗ്രൂപ്പില്‍ വ്യക്തമായ മേധാവിത്വം നേടാനും നോക്കൗട്ട് ഘട്ടത്തിലേക്കുള്ള സാധ്യതകള്‍ വര്‍ദ്ധിപ്പിക്കാനും കഴിയുമായിരുന്നു. പുതിയ ലോകകപ്പ് ഫോര്‍മാറ്റ് അനുസരിച്ച് മികച്ച മൂന്നാം സ്ഥാനക്കാരായ എട്ട് ടീമുകള്‍ക്ക് അടുത്ത റൗണ്ടിലേക്ക് യോഗ്യത നേടാം എന്നതിനാല്‍, ഈ വിജയം സ്‌കോട്ട്‌ലന്‍ഡിന്റെ നോക്കൗട്ട് പ്രതീക്ഷകള്‍ക്ക് വലിയൊരു ഊര്‍ജ്ജമാണ് നല്‍കുന്നത്.
ബോസ്റ്റണ്‍ സ്‌റ്റേഡിയത്തില്‍ നടന്ന മത്സരത്തിന്റെ ആദ്യ പകുതിയില്‍, 28-ാം മിനിറ്റില്‍ ജോണ്‍ മക്ഗിന്‍ നേടിയ ഗോളിലൂടെ സ്‌കോട്ട്‌ലന്‍ഡ് 1-0 ന് മുന്നിലെത്തി. ഒരു ഡിഫ്‌ലെക്ഷനിലൂടെ പിറന്ന ഈ ഗോള്‍, 1998-ന് ശേഷമുള്ള സ്‌കോട്ട്‌ലന്‍ഡിന്റെ ആദ്യ ലോകകപ്പ് ഗോള്‍ കൂടിയായിരുന്നു. കളിയുടെ ആദ്യ 10 മിനിറ്റുകള്‍ക്ക് ശേഷം ഹെയ്തി ശക്തമായി തിരിച്ചടിച്ചെങ്കിലും ആദ്യ പകുതി അവസാനിക്കുമ്പോള്‍ സ്‌കോട്ട്‌ലന്‍ഡ് ലീഡ് നിലനിര്‍ത്തി. രണ്ട് ടീമുകളും മികച്ച രീതിയില്‍ ആക്രമിച്ചു കളിച്ചതോടെ ആദ്യ പകുതി ഏറെ ആവേശകരമായിരുന്നു.
രണ്ടാം പകുതിയില്‍ സമനിലയ്ക്കായി ഹെയ്തി സര്‍വ്വശക്തിയുമെടുത്ത് പോരാടി. കളിയുടെ ഭൂരിഭാഗം സമയത്തും മികച്ച പ്രകടനം പുറത്തെടുത്തത് ഹെയ്തിയായിരുന്നു. ആക്രമണ ഫുട്‌ബോള്‍ കളിച്ച് അവര്‍ സ്‌കോട്ടിഷ് പ്രതിരോധത്തെ നിരന്തരം പരീക്ഷിച്ചുകൊണ്ടിരുന്നു. മത്സരത്തിന്റെ 85-ാം മിനിറ്റില്‍ ഹെയ്തിയുടെ പിയറോട്ടിന് ഹെഡ്ഡറിലൂടെ സമനില പിടിക്കാനുള്ള സുവര്‍ണ്ണാവസരം ലഭിച്ചെങ്കിലും പന്ത് പോസ്റ്റിന് വെളിയിലേക്ക് പോവുകയായിരുന്നു. കളിയിലെ മികച്ച ഫിനിഷിംഗിന്റെയും പരിചയസമ്പന്നതയുടെയും കുറവാണ് ഒടുവില്‍ ഹെയ്തിക്ക് തിരിച്ചടിയായത്.
മത്സരത്തിന്റെ അവസാന മിനിറ്റുകളില്‍ ഹെയ്തി കടുത്ത സമ്മര്‍ദ്ദം ചെലുത്തിയെങ്കിലും സ്‌കോട്ടിഷ് പ്രതിരോധം കാത്തുസൂക്ഷിക്കാന്‍ സ്‌കോട്ട്‌ലന്‍ഡിനായി. ഏറ്റവും മികച്ച പ്രകടനമല്ലായിരുന്നെങ്കില്‍ പോലും, വിലപ്പെട്ട മൂന്ന് പോയിന്റുകള്‍ സ്വന്തമാക്കാന്‍ കഴിഞ്ഞതാണ് സ്‌കോട്ട്‌ലന്‍ഡിന് നിര്‍ണായകമായത്. ചരിത്രത്തിലാദ്യമായി ഒരു പ്രധാന ടൂര്‍ണമെന്റിന്റെ നോക്കൗട്ട് ഘട്ടത്തിലേക്ക് കടക്കാനുള്ള സ്‌കോട്ട്‌ലന്‍ഡിന്റെ ശ്രമങ്ങള്‍ക്ക് ഈ വിജയം വലിയൊരു തുടക്കമായി മാറി. വരും മത്സരങ്ങളില്‍ ബ്രസീലിനെയും മൊറോക്കോയെയും നേരിടാനിരിക്കുന്ന സ്‌കോട്ട്‌ലന്‍ഡിന് ഈ മൂന്ന് പോയിന്റുകള്‍ സമ്മാനിക്കുന്ന ആത്മവിശ്വാസം ചെറുതല്ല.
മക്ഗിന്നിന്റെ ഗോളിൽ സ്കോട്ട്‌ലൻഡിന് വിജയത്തുടക്കം; പൊരുതിവീണ് ഹെയ്തി, ഗ്രൂപ്പ് സിയിൽ സ്കോട്ടീഷ് പട ഒന്നാമത്
Jaihind TV News Report
Jaihind TV Web Desk
Updated Oct 11, 2026
3 min read
470 reads
