Mobile app available on
Trending
Browse

All sections

Watch
Browse all videos

No business videos available

No Middle East videos available

Popular News

'നോട്ട് നിരോധനത്തില്‍ നിന്ന് വോട്ട് നിരോധനത്തിലേക്ക്'; മോദി സര്‍ക്കാരിനെതിരെ ആഞ്ഞടിച്ച് ജയ്റാം രമേശ്

'നോട്ട് നിരോധനത്തില്‍ നിന്ന് വോട്ട് നിരോധനത്തിലേക്ക്'; മോദി സര്‍ക്കാരിനെതിരെ ആഞ്ഞടിച്ച് ജയ്റാം രമേശ്

ന്യൂഡല്‍ഹി: 2016-ലെ നോട്ട് നിരോധനത്തെ 'വോട്ട് നിരോധനവുമായി' (വോട്ട്ബന്ദി) ഉപമിച്ച് നരേന്ദ്ര മോദി സര്‍ക്കാരിനെതിരെ രൂക്ഷവിമര്‍ശനവുമായി കോണ്‍ഗ്രസ്. ജനങ്ങളുടെ ജനാധിപത്യ അവകാശങ്ങളെ സര്‍ക്കാര്‍ ദുര്‍ബലപ്പെടുത്തുകയാണെന്ന് കോണ്‍ഗ്രസ് വ്യാഴാഴ്ച ആരോപിച്ചു. നോട്ട് നിരോധനത്തിലൂടെ ജനങ്ങളുടെ വരുമാനത്തിനും ഉപജീവനമാര്‍ഗ്ഗത്തിനുമാണ് സര്‍ക്കാര്‍ പ്രഹരമേല്‍പ്പിച്ചതെങ്കില്‍, ഇന്ന് അവരുടെ വോട്ടവകാശത്തെയും അധികാരത്തിലിരിക്കുന്നവരെ ചോദ്യം ചെയ്യാനുള്ള ശേഷിയെയുമാണ് ആക്രമിക്കുന്നതെന്ന് കോണ്‍ഗ്രസ് ജനറല്‍ സെക്രട്ടറി ജയ്റാം രമേശ് പറഞ്ഞു.

സാമൂഹിക മാധ്യമമായ 'എക്‌സില്‍' (X) പങ്കുവെച്ച കുറിപ്പിലൂടെയാണ് ജയറാം രമേശ് സര്‍ക്കാരിനെതിരെ ആഞ്ഞടിച്ചത്. "‘നോട്ട്ബന്ദിയും’ ‘വോട്ട്ബന്ദിയും’ ഒരേ നാണയത്തിന്റെ രണ്ട് വശങ്ങളാണ്. 2016-ല്‍ അധികാരത്തിന്റെ അഹങ്കാരത്താല്‍ സര്‍ക്കാര്‍ ജനങ്ങളുടെ വരുമാനത്തെയും ഉപജീവനത്തെയും ആക്രമിച്ചു. ഇന്ന് അവരുടെ വോട്ടുകളെയും ശബ്ദത്തെയുമാണ് ആക്രമിക്കുന്നത്," അദ്ദേഹം കുറിച്ചു. പ്രധാനമന്ത്രി നരേന്ദ്ര മോദിയെയും കേന്ദ്ര ആഭ്യന്തര മന്ത്രി അമിത് ഷായെയും ലക്ഷ്യമിട്ട രമേശ്, 'വോട്ട് മോഷണം' പൗരന്മാരുടെ അവകാശങ്ങള്‍ക്കും സര്‍ക്കാരിനെ ചോദ്യം ചെയ്യാനുള്ള ശേഷിക്കും നേരെയുള്ള ഗുരുതരമായ കടന്നുകയറ്റമാണെന്ന് ആരോപിച്ചു. പാവപ്പെട്ടവര്‍, തൊഴിലാളികള്‍, കര്‍ഷകര്‍, പാര്‍ശ്വവല്‍ക്കരിക്കപ്പെട്ടവര്‍, യുവാക്കള്‍, ഇടത്തരക്കാര്‍ എന്നിവര്‍ക്ക് തങ്ങളുടെ പ്രശ്‌നങ്ങള്‍ പരിഹരിക്കാന്‍ ലഭ്യമായ ഏറ്റവും ശക്തമായ ആയുധമാണ് വോട്ടെന്നും അദ്ദേഹം ചൂണ്ടിക്കാട്ടി.

തിരഞ്ഞെടുപ്പില്‍ ജനങ്ങളോട് മറുപടി പറയേണ്ടി വരുമെന്ന ഭയമാണ് സര്‍ക്കാരുകളെ ജനങ്ങളുടെ പരാതികള്‍ കേള്‍ക്കാനും നയങ്ങളുടെ പ്രത്യാഘാതങ്ങളെക്കുറിച്ച് ചിന്തിക്കാനും പ്രേരിപ്പിക്കുന്നതെന്ന് ജയറാം രമേശ് അഭിപ്രായപ്പെട്ടു. എന്നാല്‍, നിലവിലെ സര്‍ക്കാര്‍ പൊതുജനങ്ങളുടെ പരാതികളെ അവഗണിക്കുകയും ഏതാനും കോര്‍പ്പറേറ്റ് ഗ്രൂപ്പുകളുടെ താല്‍പ്പര്യങ്ങള്‍ക്ക് മുന്‍ഗണന നല്‍കുകയുമാണ് ചെയ്യുന്നതെന്ന് അദ്ദേഹം കുറ്റപ്പെടുത്തി.

രൂക്ഷമായ വിലക്കയറ്റം, തൊഴിലില്ലായ്മ, കര്‍ഷകരുടെ പ്രശ്‌നങ്ങള്‍, ഗ്രാമീണ തൊഴിലുറപ്പ് പദ്ധതി ദുര്‍ബലപ്പെടുത്തല്‍ എന്നിവ സാധാരണക്കാരോടുള്ള സര്‍ക്കാരിന്റെ ഉത്തരവാദിത്തമില്ലായ്മയാണ് പ്രതിഫലിപ്പിക്കുന്നതെന്ന് രമേശ് ആരോപിച്ചു. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് (MGNREGA) പകരം പുതിയ സംവിധാനം കൊണ്ടുവന്നതിനെയും അദ്ദേഹം വിമര്‍ശിച്ചു; ഇത് ഗ്രാമീണ തൊഴിലാളികളുടെ തൊഴില്‍ അവകാശങ്ങളെ ദുര്‍ബലപ്പെടുത്തിയെന്നും അദ്ദേഹം പറഞ്ഞു.

വിലക്കയറ്റം കുടുംബങ്ങളുടെ സമ്പാദ്യത്തെ ബാധിച്ചുവെന്നും, തൊഴിലില്ലായ്മ യുവാക്കളുടെ ഭാവി അപകടത്തിലാക്കിയെന്നും, കോര്‍പ്പറേറ്റ് താല്‍പ്പര്യങ്ങള്‍ക്ക് മുന്‍ഗണന നല്‍കുന്ന നയങ്ങള്‍ സാധാരണക്കാരുടെ ശബ്ദം ദുര്‍ബലപ്പെടുത്തിയെന്നും കോണ്‍ഗ്രസ് നേതാവ് പറഞ്ഞു. വോട്ടര്‍ പട്ടികയില്‍ നിന്ന് പേരുകള്‍ നീക്കം ചെയ്യുന്നത്, സര്‍ക്കാരിനെ തിരഞ്ഞെടുക്കാനും ചോദ്യം ചെയ്യാനുമുള്ള പൗരന്മാരുടെ മൗലികാവകാശത്തിന് നേരെയുള്ള കടന്നുകയറ്റമാണെന്നും അദ്ദേഹം വാദിച്ചു.

വോട്ടവകാശത്തിന്റെ പ്രാധാന്യം എടുത്തുപറഞ്ഞ രമേശ്, ഒരു സര്‍ക്കാരിനെ തിരഞ്ഞെടുക്കാനുള്ള ഉപാധി മാത്രമല്ല വോട്ടെന്നും മറിച്ച് ഭക്ഷ്യസുരക്ഷ, തൊഴില്‍, കര്‍ഷകരുടെ വരുമാനം, ഇടത്തരക്കാരുടെ സാമ്പത്തിക സുരക്ഷ തുടങ്ങിയ വിഷയങ്ങളില്‍ ഉത്തരം തേടാനുള്ള ആയുധം കൂടിയാണെന്നും വ്യക്തമാക്കി. വോട്ടിന്റെ ശക്തി കുറയ്ക്കുന്നത് സര്‍ക്കാരിന്റെ ഉത്തരവാദിത്തബോധം ഇല്ലാതാക്കുകയും അധികാരത്തിന്റെ അഹങ്കാരത്തെ പ്രോത്സാഹിപ്പിക്കുകയും ചെയ്യുമെന്നും അദ്ദേഹം ആരോപിച്ചു.

കോണ്‍ഗ്രസിന്റെ പോരാട്ടം വോട്ടവകാശം സംരക്ഷിക്കുന്നതില്‍ മാത്രം ഒതുങ്ങുന്നതല്ലെന്നും, ഓരോ പൗരന്റെയും അവകാശങ്ങള്‍ സംരക്ഷിക്കുന്നതിന് വേണ്ടിയുള്ളതാണെന്നും അദ്ദേഹം പറഞ്ഞു. "‘നോട്ട്ബന്ദിയില്‍’ നിന്ന് ‘വോട്ട്ബന്ദിയിലേക്ക്’, വോട്ട് മോഷണത്തില്‍ നിന്ന് അവകാശങ്ങളുടെ മോഷണത്തിലേക്ക്, ജനവിധിയുടെ മോഷണത്തില്‍ നിന്ന് ഉത്തരവാദിത്തത്തിന്റെ മോഷണത്തിലേക്ക് — വോട്ട് ചോര്‍, ഗദ്ദി ചോര്‍ (വോട്ട് കള്ളന്മാരേ, അധികാരമൊഴിയുക)," എന്ന മുദ്രാവാക്യം ഉയര്‍ത്തിക്കൊണ്ടാണ് ജയറാം രമേശ് തന്റെ കുറിപ്പ് അവസാനിപ്പിച്ചത്. തിരഞ്ഞെടുപ്പ് ക്രമക്കേടുകള്‍ സംബന്ധിച്ച ആരോപണങ്ങളും തിരഞ്ഞെടുപ്പ് കമ്മീഷന്റെ കൂടുതല്‍ സുതാര്യത ആവശ്യപ്പെട്ടുള്ള കോണ്‍ഗ്രസിന്റെ പ്രതിഷേധങ്ങളും തുടരുന്നതിനിടെയാണ് ഈ പരാമര്‍ശങ്ങള്‍.

Related articles

See all
Popular News

"ക്രമക്കേടുകള്‍ തുറന്നുകാട്ടാന്‍ തിരഞ്ഞെടുപ്പില്‍ മത്സരിക്കും; ഭയമില്ലാതെ സംസാരിക്കാനുള്ള...

Popular News

കീറി, പക്ഷേ മാറിപ്പോയി; സോണിയ ഗാന്ധിയുടെ പുസ്തകത്തിനെതിരെയുള്ള പ്രതിഷേധത്തില്‍ ബാൽ താക്കറെ...

Popular News

‘ഇന്ത്യയെന്നാല്‍ ഇന്ദിര’, ഓർമ്മകളിൽ ഇന്നും ജ്വലിക്കുന്ന ഉരുക്കുവനിതയ്ക്ക് ഇന്ന് 109-ാം ജന്...

Popular News

'ഇന്ത്യൻ സമ്പദ്‌വ്യവസ്ഥ 'സാമ്പത്തിക ദുരന്തം; പരിഷ്കാരങ്ങൾ വൈകിയാൽ രാജ്യം വലിയ പ്രതിസന്ധിയി...

Save your stories

Sign in