തിരുവനന്തപുരം: സി.പി.എം സംസ്ഥാന സമിതി യോഗത്തിൽ പാർട്ടി സെക്രട്ടേറിയറ്റ് തയ്യാറാക്കിയ വിശാല കരട് റിപ്പോർട്ടിനെതിരെ പ്രതിനിധികളുടെ രൂക്ഷവിമർശനം. പാർട്ടി നേരിടുന്ന യഥാർത്ഥ പ്രശ്നങ്ങളോ സംഘടനാ തലത്തിലെ വീഴ്ചകളോ ഉൾക്കൊള്ളാൻ കരട് റിപ്പോർട്ടിന് സാധിച്ചിട്ടില്ലെന്ന് പ്രതിനിധികൾ കുറ്റപ്പെടുത്തി. കണ്ണൂരിൽ നിന്നുള്ള പ്രതിനിധികളാണ് വിമർശനങ്ങൾക്ക് നേതൃത്വം നൽകിയത്.
തെരഞ്ഞെടുപ്പുകളിലെ സ്ഥാനാർത്ഥി നിർണ്ണയത്തിലുണ്ടായ പാളിച്ചകളെക്കുറിച്ചോ മറ്റ് പ്രധാന സംഘടനാ വീഴ്ചകളെക്കുറിച്ചോ റിപ്പോർട്ടിൽ വ്യക്തമായ പരാമർശങ്ങളില്ലെന്ന് യോഗത്തിൽ വിമർശനമുയർന്നു. കേന്ദ്ര കമ്മിറ്റിയുടെ കണ്ടെത്തലുകൾ എവിടെപ്പോയെന്നും പൊതുവായ ചില കാര്യങ്ങൾ മാത്രമാണ് കരടിൽ ഉള്ളതെന്നും പ്രതിനിധികൾ ചൂണ്ടിക്കാട്ടി. വെറുമൊരു പ്രവർത്തന റിപ്പോർട്ടിന്റെ മാതൃകയിൽ തയ്യാറാക്കിയ ഈ കരടുമായി മുന്നോട്ട് പോകാനാകില്ലെന്നാണ് ഉയർന്ന പ്രധാന നിലപാട്. വീഴ്ചകൾ കൃത്യമായി ചൂണ്ടിക്കാട്ടാത്ത ഒരു റിപ്പോർട്ട് വെച്ച് പാർട്ടിയിൽ എങ്ങനെ തിരുത്തൽ പ്രക്രിയ സാധ്യമാകുമെന്നും യോഗത്തിൽ ചോദ്യങ്ങളുയർന്നു. ഇരുപതോളം പ്രതിനിധികളാണ് ചർച്ചയിൽ പങ്കെടുത്തത്.
