കോമൺവെൽത്ത് ഗെയിംസിന്റെ പത്താം ദിനത്തിൽ ബോക്‌സിങ് റിംഗിൽ നിന്ന് ഇന്ത്യയ്ക്ക് ഇരട്ട സ്വർണത്തിളക്കം. വനിതകളുടെ 57 കിലോഗ്രാം വിഭാഗത്തിൽ ജെയ്‌സ്മിൻ ലമ്പോറിയയും 54 കിലോഗ്രാം വിഭാഗത്തിൽ പ്രീതി പവാറുമാണ് ഇന്ത്യക്കായി പൊന്നണിഞ്ഞത്. ഫൈനലിൽ എതിരാളിയായ കാനഡയുടെ സ്കാർലെറ്റ് ഡെൽഗാഡോയെ കൃത്യമായ പഞ്ചുകളിലൂടെ 5-0 എന്ന നിലയിൽ തകർത്താണ് പ്രീതി സ്വർണം ഉറപ്പിച്ചത്. വടക്കൻ അയർലൻഡിന്റെ മിഷേലെ വാൽഷിനെ 5-0 എന്ന സ്കോറിന് തോൽപ്പിച്ചാണ് ജെയ്‌സ്മിൻ ലമ്പോറിയയുടെ സ്വർണനേട്ടം.
അതേസമയം അഥലറ്റിക്‌സ് ട്രാക്കിലും ഇന്ത്യയ്ക്ക് നേട്ടമുണ്ടായി. പുരുഷന്മാരുടെ ട്രിപ്പിൾ ജംപിൽ 16.58 മീറ്റർ ദൂരം ചാടിയ പ്രവീൺ ചിത്രവേൽ വെള്ളിയും, 16.52 മീറ്റർ ദൂരം കണ്ടത്തിയ പ്രഭു തിരുമാരൻ വെങ്കലവും സ്വന്തമാക്കി. ബോക്‌സിംഗിലെ ഇരട്ട സ്വർണത്തോടെ ഗെയിംസിൽ ഇന്ത്യയുടെ ആകെ സ്വർണനേട്ടം ഏഴായി ഉയർന്നു.
നിലവിൽ 7 സ്വർണവും 13 വെള്ളിയും 7 വെങ്കലവുമടക്കം 27 മെഡലുകളുമായി ഇന്ത്യ മെഡൽപ്പട്ടികയിൽ ആറാം സ്ഥാനത്താണ്. 56 സ്വർണമടക്കം 132 മെഡലുകളുമായി ഓസ്‌ട്രേലിയ ബഹുദൂരം മുന്നിൽ ഒന്നാമതായി തുടരുന്നു. 18 സ്വർണവുമായി ഇംഗ്ലണ്ട് രണ്ടാമതും, 17 സ്വർണവുമായി കാനഡ മൂന്നാമതുമുണ്ട്. സ്‌കോട്ട്‌ലൻഡ് (10 സ്വർണം), നൈജീരിയ (9 സ്വർണം) എന്നീ രാജ്യങ്ങളാണ് പട്ടികയിൽ ഇന്ത്യയ്ക്ക് തൊട്ടുമുന്നിലുള്ളത്.
