എസ്‌യുവി പ്രേമികൾക്ക് സന്തോഷവാർത്ത: പുതിയ സാങ്കേതികവിദ്യകളുമായി സ്കോർപിയോ എൻ ഓഗസ്റ്റിൽ അവതരിപ്പിക്കും

ഇന്ത്യയിലെ ജനപ്രിയ എസ്‌യുവിയായ മഹീന്ദ്ര സ്കോർപിയോ എൻ പുതുക്കിയ 2026 മോഡലുമായി എത്തുന്നു. വരുന്ന ഓഗസ്റ്റ് 14-ന് വാഹനം ഔദ്യോഗികമായി പുറത്തിറക്കുമെന്നാണ് വിവരങ്ങൾ. വിപണി ലോഞ്ചിന് മുന്നോടിയായി തന്നെ പുതിയ മോഡലുകൾ ഡീലർഷിപ്പുകളിൽ എത്തിത്തുടങ്ങിയിട്ടുണ്ട്. വാഹനത്തിന്റെ ഇന്റീരിയറിൽ വരുത്തിയ പ്രധാന മാറ്റങ്ങളുടെ ചിത്രങ്ങളും വിവരങ്ങളുമാണ് ഇപ്പോൾ പുറത്തുവന്നിരിക്കുന്നത്. ക്യാബിൻ അനുഭവം കൂടുതൽ പ്രീമിയവും ആഡംബരപൂർണ്ണവുമാക്കുന്നതിലാണ് മഹീന്ദ്ര ഇത്തവണ ശ്രദ്ധ കേന്ദ്രീകരിച്ചിരിക്കുന്നത്.

ക്യാബിനിലെ ഏറ്റവും പ്രധാന മാറ്റം വലിയ 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റമാണ്. നിലവിലെ 8 ഇഞ്ച് സ്‌ക്രീനിന് പകരമെത്തുന്ന ഈ സിസ്റ്റം വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവ പിന്തുണയ്ക്കും. ഇതിനൊപ്പം താർ റോക്‌സിലുള്ളതുപോലെ 10.25 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേയും പുതിയ സ്കോർപിയോ എൻ-ൽ നൽകിയിട്ടുണ്ട്.

മറ്റൊരു പ്രധാന ആകർഷണം പനോരമിക് സൺറൂഫാണ്. ഇത് വാഹനത്തിനകത്ത് കൂടുതൽ വിശാലതയും വെളിച്ചവും നൽകും. കൂടാതെ, എസി വെന്റുകളുടെ ഡിസൈൻ പുതുക്കുകയും ഗ്ലോസ് ബ്ലാക്ക്, സിൽവർ ബെസൽ ഫിനിഷുകൾ നൽകി സെന്റർ കൺസോളിന്റെ ലുക്ക് വർദ്ധിപ്പിക്കുകയും ചെയ്തിട്ടുണ്ട്. ഡ്രൈവിംഗ് എളുപ്പമാക്കാൻ 360 ഡിഗ്രി ക്യാമറയും, മൊബൈൽ ഉപകരണങ്ങൾ വേഗത്തിൽ ചാർജ് ചെയ്യാൻ മുന്നിലും പിന്നിലും 65W ടൈപ്പ്-സി ഫാസ്റ്റ് ചാർജിങ് പോർട്ടുകളും നൽകിയിട്ടുണ്ട്.

നിലവിലുള്ള മോച്ച ബ്രൗൺ-ബ്ലാക്ക് ലെതറെറ്റ് സീറ്റുകൾ, സോണി ഓഡിയോ സിസ്റ്റം, വയർലെസ് ചാർജിങ്, പവർഡ് ഫ്രണ്ട് സീറ്റുകൾ, ക്രൂസ് കൺട്രോൾ, ഇഎസ്പി (ESC), ഹിൽ അസിസ്റ്റ് തുടങ്ങിയ പ്രീമിയം ഫീച്ചറുകൾ പുതിയ മോഡലിലും തുടരും.

മെക്കാനിക്കൽ വിഭാഗത്തിൽ മാറ്റങ്ങളൊന്നുമില്ല. നിലവിലെ 203 PS കരുത്തുള്ള 2.0 ലിറ്റർ ടർബോ പെട്രോൾ എഞ്ചിനും, 175 PS വരെയുള്ള 2.2 ലിറ്റർ ഡീസൽ എഞ്ചിനും തന്നെയായിരിക്കും വാഹനത്തിന് കരുത്ത് പകരുക. മാനുവൽ, ഓട്ടോമാറ്റിക് ഗിയർബോക്‌സ് ഓപ്ഷനുകൾ ലഭ്യമാണ്. പുതിയ ഫീച്ചറുകളോടെ എത്തുന്ന സ്കോർപിയോ എൻ, പ്രീമിയം എസ്‌യുവി വിപണിയിലെ മത്സരം കൂടുതൽ ശക്തമാക്കും.