നിരണം: പമ്പാ നദിയിലെ അപ്പർ കുട്ടനാട് വാട്ടർ സ്റ്റേഡിയത്തിൽ നടന്ന നാലാമത് അപ്പർ കുട്ടനാട് ജലോത്സവത്തിൽ തലവടി ചുണ്ടൻ ജേതാക്കളായി. തലവടി ടൗൺ ബോട്ട് ക്ലബ്ബിന്റെ നേതൃത്വത്തിൽ മത്സരിച്ച തലവടി ചുണ്ടനാണ് വാശിയേറിയ ഫൈനലിൽ ഒന്നാം സ്ഥാനം നേടിയത്. അപ്പർ കുട്ടനാട് വാട്ടർ സ്റ്റേഡിയത്തിൽ നടന്ന ചടങ്ങിൽ ആഭ്യന്തരമന്ത്രി രമേശ് ചെന്നിത്തല ജലോത്സവം ഉദ്ഘാടനം ചെയ്തു.
മേൽപ്പാടം ബോട്ട് ക്ലബ്ബിന്റെ മേൽപ്പാടം ചുണ്ടൻ രണ്ടാം സ്ഥാനവും നിരണം ബോട്ട് ക്ലബ്ബിന്റെ നിരണം ചുണ്ടൻ മൂന്നാം സ്ഥാനവും കരസ്ഥമാക്കി. ലൂസേഴ്സ് ഫൈനലിൽ കുമരകം ടൗൺ ബോട്ട് ക്ലബ്ബിന്റെ നിരണം പുണ്യാളൻ വിജയിച്ചു.
വെപ്പ് എ ഗ്രേഡ് വിഭാഗത്തിൽ എഫ്.ബി.സി. നക്കവലയുടെ നെപ്പോളിയൻ വള്ളം ഒന്നാം സ്ഥാനം നേടി.
തിരുവല്ല എംഎൽഎ അഡ്വ. വർഗീസ് മാമൻ, മാന്നാർ അബ്ദുൽ ലത്തീഫ്, അഡ്വ. സാം ഈപ്പൻ, കടപ്ര പഞ്ചായത്ത് പ്രസിഡന്റ് ലിജി ആർ. പണിക്കർ, സിനി ആർട്ടിസ്റ്റുകളായ ടോഷ് ക്രിസ്റ്റി, സാം ജീവൻ തുടങ്ങിയവർ പങ്കെടുത്തു.
അപ്പർ കുട്ടനാട് ബോട്ട് ക്ലബ് പ്രസിഡന്റ് ജെയിംസ് കുരുവിളയും സെക്രട്ടറി ലല്ലു കാട്ടിലും ജലമേളയ്ക്ക് നേതൃത്വം നൽകി. യു.കെ.ബി.സി. രക്ഷാധികാരി കോശി എബ്രഹാം ഇലഞ്ഞിക്കൽ പതാക ഉയർത്തി. കെ.എസ്.ബി.ആർ.എ. പ്രസിഡന്റ് ആർ.കെ. കുറുപ്പ് ജലഘോഷയാത്ര ഫ്ലാഗ് ഓഫ് ചെയ്തു.
കുട്ടനാട് എംഎൽഎ റജി ചെറിയാൻ സമ്മാനദാനം നിർവഹിച്ചു. നിരണം, വീയപുരം, കടപ്ര, മാന്നാർ പഞ്ചായത്തുകളിലെ ജനങ്ങളുടെ സഹകരണത്തോടെയാണ് അപ്പർ കുട്ടനാട് ബോട്ട് ക്ലബ്ബിന്റെ നേതൃത്വത്തിൽ വള്ളംകളി സംഘടിപ്പിച്ചത്. വൻ ജനപങ്കാളിത്തത്തോടെ നടന്ന ജലമേള വിജയകരമായി പൂർത്തിയാക്കിയതിന് സംഘാടകർ നന്ദി അറിയിച്ചു.
